କୃଷି ସାମଗ୍ରୀ ପରିବହନକୁ କଟକଣା ମୁକ୍ତ କରିଛନ୍ତି ରାଜ୍ୟ ସରକାର: ସୌରଭ ଗର୍ଗ
ଚାଷ ସଂପର୍କୀତ ସହାୟତା ପାଇଁ ଟୋଲ ଫ୍ରି ନମ୍ବର ୧୮୦୦୧୦୨୫୧୬୬ରେ ଯୋଗାଯୋଗ କରନ୍ତୁ ଚାଷୀ
ଭୁବନେଶ୍ୱର: ଲକଡାଉନ ଜାରି ରହିଥିବା ବେଳେ ରାଜ୍ୟ ସରକାର କୃଷି ସାମଗ୍ରୀ ପରିବହନକୁ କଟକଣା ମୁକ୍ତ କରିଛନ୍ତି । ସେହିପରି ସରକାର କୃଷି କାର୍ଯ୍ୟକୁ ମଧ୍ୟ ଲଗଡାଉନରୁ ବାଦ ଦେଇଛନ୍ତି । ଏଥି ସହ ଚାଷୀଙ୍କ ପାଇଁ ରାଜ୍ୟ ସରକାର ବିଭିନ୍ନ ପଦକ୍ଷେପ ନେଇଛନ୍ତି । ରାଜ୍ୟ ସରକାରଙ୍କ ପ୍ରମୁଖ କୃଷି ସଚିବ ସୌରଭ ଗର୍ଗ ଆଜି ଗୀତଗୋବିନ୍ଦ ସଦନରେ ଅନୁଷ୍ଠିତ ସାମ୍ବାଦିକ ସମ୍ମଳନୀରେ ଏହି ସୂଚନା ଦେଇଛନ୍ତି । ସେ କହିଛନ୍ତି ଯେ, ଓଡ଼ିଶା ଏକ କୃଷି ପ୍ରଧାନ ରାଜ୍ୟ । ରାଜ୍ୟର ଅଧିକାଂଶ ଲୋକେ ଚାଷ ଉପରେ ନିର୍ଭର କରୁଛନ୍ତି । ତେଣୁ ସରକାର ଚାଷ ଓ ଚାଷୀଙ୍କ ପାଇଁ ବିଭିନ୍ନ ପଦକ୍ଷେପ ନେଇଛନ୍ତି । ଏଥି ସହିତ ସେ କହିଛନ୍ତି, ଚାଷୀମାନେ ଇ-ସମୃଦ୍ଧି ଜରିଆରେ ନିଜର ନାମ ପଞ୍ଜୀକରଣ କରିପାରିବେ । ଚାଷ ସଂପର୍କିତ ସହାୟତା ପାଇଁ ଚାଷୀ ଟୋଲ ଫ୍ରି ନମ୍ବର (୧୮୦୦୧୦୨୫୧୬୬)ରେ କୃଷକ ସଶକ୍ତିକରଣ ବିଭାଗକୁ ଯୋଗାଯୋଗ କରନ୍ତୁ ବୋଲି ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କୃଷି ସଚିବ କହିଛନ୍ତି ବିଭିନ୍ନ କୃଷି କାର୍ଯ୍ୟ ଯଥା ଚାଷ ପାଇଁ ଜମି ପ୍ରସ୍ତୁତ କରିବା, ଧାନ ରୋଇବା, ଜମି ପ୍ରସ୍ତୁତି ଓ ଫସଲ ଅମଲ କରିବାରେ କୌଣସି ଅସୁବିଧା ନାହିଁ । କୃଷି ସାମଗ୍ରୀ ବିକ୍ରି ସମ୍ବନ୍ଧୀତ ଦୋକାନଗୁଡ଼ିକ ଖୋଲାରଖିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି । ଏହି ସାମଗ୍ରୀଗୁଡ଼ିକ ଉପଲବ୍ଧ କରିବା ପାଇଁ ନିର୍ଦ୍ଦେଶ ଦିଆଯାଇଛି । ସେହିଭଳି କୃଷି ଯନ୍ତ୍ରପାତିର ମରାମତି ଦୋକାନଗୁଡ଼ିକ ଖୋଲା ରଖିବା ପାଇଁ ଅନୁମତି ଦିଆଯାଇଛି । ଜିଲ୍ଲା, ପଂଚାୟତ ସ୍ତରରେ କୃଷି ସମ୍ବନ୍ଧୀତ ଦୋକାନଗୁଡ଼ିକ ଖୋଲା ରହିବ । କୃଷି ଅଧିକାରୀମାନେ ଚାଷୀମାନଙ୍କୁ ପରାମର୍ଶ ଦେବେ । ରାଜ୍ୟ ବିହନ ନିଗମ, ରାଜ୍ୟ କୃଷି ନିଗମ, ଓୟୁଏଟି ବିଜ୍ଞାନ କେନ୍ଦ୍ର ଖୋଲା ରହିବ ବୋଲି ଶ୍ରୀ ଗର୍ଗ କହିଛନ୍ତି ।
କୃଷି ସଚିବ କହିଛନ୍ତି, ଋବି ଋତୁରେ ଓଡ଼ିଶାରେ ୨୬.୬୬ ଲକ୍ଷ ହେକ୍ଟର ଜମିରେ ଚାଷ ହୋଇଛି । ଚାଷୀମାନଙ୍କ ପରିଶ୍ରମ ଯୋଗୁଁ ୧୫ ଲକ୍ଷ ମେଟ୍ରିିକ ଟନ ଫସଲ ଉପୁଜିବ । ଏଥିରେ ଧାନ, ଚିନାବାଦାମ, ସୋରିଷ, ସୂର୍ଯ୍ୟମୁଖୀ, ଡାଲିଜାତିୟ ଖାଦ୍ୟ ଆଦି ଫସଲ ସାମିଲ ଅଛି । ସରକାର ଚାଷୀଙ୍କୁ ସର୍ବନମ୍ନ ସହାୟତା ରାଶି ଦେବେ । ଚାଷୀମାନେ ଅନଲାଇନନ ମାଧ୍ୟମରେ ନିଜ ନାମ ପଂଜୀକରଣ କରିପାରିବେ । ଆଳୁ ଚାଷୀମାନଙ୍କୁ ସେମାନଙ୍କର ଆଳୁକୁ ଶୀତଲଭଣ୍ଡାରରେ ରଖିବାକୁ ପରାମର୍ଶ ଦିଆଯାଉଛି । ଲଙ୍କା ଚାଷୀମାନେ ଲଙ୍କାକୁ ଏବେ ଖରାରେ ଶୁଖାଇ ପରେ ବିକ୍ରି କରିପାରିବେ । ଚାଷୀମାନେ ଫସଲ ଅମଲ ସମୟରେ ସାମାଜିକ ଦୂରତ୍ୱ ରକ୍ଷା କରନ୍ତୁ ବୋଲି ସେ ପରାମର୍ଶ ଦେଇଛନ୍ତି । ବାଲେଶ୍ୱର, ପୁରୀ ଓ ଜଗତସିଂହପୁରରେ ପାନ ଚାଷୀଙ୍କ ପାଇଁ ସରକାର ମଧ୍ୟ ବ୍ୟବସ୍ଥା ରଖିଥିବା ସେ କହିଛନ୍ତି ।