ଏମ୍ସ ପ୍ରବେଶିକା ପରୀକ୍ଷା ଫଳ ପ୍ରକାଶ : ଓଡ଼ିଶାର ୩୧୭ ଜଣ କୃତକାର୍ଯ୍ୟ, ଦିଲ୍ଲୀର ଭାବିକ୍ ବଂଶଲ ଟପର୍
ଭୁବନେଶ୍ବର : ଦେଶରେ ଥିବା ୧୫ଟି ଏମ୍ସରେ ନାମଲେଖା ଲାଗି ସର୍ବଭାରତୀୟସ୍ତରରେ ଅନୁଷ୍ଠିତ ଏମ୍ସ ପ୍ରବେଶିକା ପରୀକ୍ଷା ଫଳ ପ୍ରକାଶ ପାଇଛି। ପରୀକ୍ଷା ଦେଇଥିବା ମୋଟ ୩ ଲକ୍ଷ ୩୮ ହଜାର ୪୫୭ ଜଣ ଛାତ୍ରଛାତ୍ରୀଙ୍କ ମଧ୍ୟରୁ ୧୧ ହଜାର ୩୮୦ ଜଣ କୃତକାର୍ଯ୍ୟ ହୋଇଛନ୍ତି। ୭ ହଜାର ୩୫୨ ଜଣ ଛାତ୍ର, ୪ ହଜାର ୨୭ ଜଣ ଛାତ୍ରୀ ଓ ଜଣେ କିନ୍ନର ରୢାଙ୍କ ହାସଲ କରିଛନ୍ତି। ଦେଶର ୪ ଜଣ ଛାତ୍ରଛାତ୍ରୀ ଶତ ପ୍ରତିଶତ ସ୍କୋର କରିଛନ୍ତି। ଦିଲ୍ଲୀର ଭାବିକ୍ ବଂଶଲ ସାରା ଦେଶରେ ଟପ୍ପର୍ ହୋଇଛନ୍ତି। ନିଟ୍ ପରୀକ୍ଷାରେ ଭାବିକ୍ ସର୍ବଭାରତୀୟସ୍ତରରେ ଦ୍ବିତୀୟ ସ୍ଥାନରେ ରହିଥିଲେ। ଏମ୍ସ ପରୀକ୍ଷାରେ ସେ ପଦାର୍ଥ ବିଜ୍ଞାନ, ରସାୟନ ବିଜ୍ଞାନ ଓ ଜୀବବିଜ୍ଞାନରେ ଶତ ପ୍ରତିଶତ ମାର୍କ ରଖିଛନ୍ତି। ଓଡ଼ିଶାର ୯ ହଜାରରୁ ଅଧିକ ଛାତ୍ରଛାତ୍ରୀ ପରୀକ୍ଷା ଦେଇଥିଲେ। ଆଜି ରାତି ୧୦ଟା ସୁଦ୍ଧା ମିଳିଥିବା ସୂଚନା ଅନୁଯାୟୀ ୩୧୭ ଜଣ କୃତକାର୍ଯ୍ୟ ହୋଇଛନ୍ତି। ପ୍ରବେଶିକା ପରୀକ୍ଷାରେ କୃତିତ୍ବ ହାସଲ କରିଥିବା ଛାତ୍ରଛତ୍ରୀ ଏମ୍ସର ୧୨୦୭ ସିଟ୍ରେ ନାମ ଲେଖାଇବେ।
Sambad is now on WhatsApp
Join and get latest news updates delivered to you via WhatsApp
୨୦୧୯-୨୦ ଶିକ୍ଷାବର୍ଷରେ ୧୫ଟି ଏମ୍ସର ୧୨୦୦ ସିଟ୍ରେ ନାମଲେଖା ହେବ। ଭୁବନେଶ୍ବର ସମେତ ନୂଆଦିଲ୍ଲୀ, ଭୋପାଳ, ଯୋଧପୁର, ମଙ୍ଗଳଗିରି(ଗୁଣ୍ଟୁର), ନାଗପୁର, ପାଟଣା, ରାୟପୁର, ଋଷିକେଶ, ଭଥିଣ୍ଡା, ଦେଓଘର(ଝାଡଖଣ୍ଡ), ଗୋରଖପୁର, କଲ୍ୟାଣୀ(ପଶ୍ଚିମବଙ୍ଗ), ରାଏବରେଲି ଓ ତେଲେଙ୍ଗାନା ଏମ୍ସରେ ନାମଲେଖା ହେବ। ପରୀକ୍ଷାର୍ଥୀମାନେ ‘www.aiimsexams.org’ ୱେବସାଇଟ୍ରେ ସେମାନଙ୍କ ରୢାଙ୍କ ଯାଞ୍ଚ କରିପାରିବେ। ସୂଚନାଯୋଗ୍ୟ, ମେ’ ୨୫ ଓ ୨୬ ତାରିଖରେ ଦୁଇ ଦିନ ଧରି ପ୍ରବେଶିକା ପରୀକ୍ଷା ହୋଇଥିଲା। ଦେଶର ୧୫୧ଟି ସହରର ୩୩୯ ସେଣ୍ଟରରେ ୪ଟି ସିଫ୍ଟରେ ଅନ୍ଲାଇନ୍ରେ ଏହି ପ୍ରବେଶିକା ପରୀକ୍ଷା ଅନୁଷ୍ଠିତ ହୋଇଥିଲା।