ସର୍ବଭାରତୀୟ କବାଡ଼ି ପ୍ରତିଯୋଗିତା: ପୁରୁଷରେ ଦକ୍ଷିଣ-ପୂର୍ବ ରେଳବାଇ, ମହିଳାରେ କୋଲକାତା ବିଜେତା
ବିଳାସପୁରର ଯୋଗେଶ ନିତମ ଶ୍ରେଷ୍ଠ ପୁରୁଷ ଓ ଛତିଶଗଡ଼ର ଛାୟା ଶ୍ରେଷ୍ଠ ମହିଳା ଖେଳାଳି
ରସୁଲପୁର : ଯାଜପୁର ଜିଲ୍ଲା ରସୁଲପୁର ବ୍ଲକ୍ ଖଣ୍ଡିତରଠାରେ ୪ଦିନ ହେଲା ଚାଲିଥିବା ୬୭ତମ ସର୍ବଭାରତୀୟ କବାଡ଼ି ପ୍ରତିଯୋଗିତା ଗୁରୁବାର ସନ୍ଧ୍ୟାରେ ଉଦ୍ଯାପିତ ହୋଇଛି। ଚଳିତ ବର୍ଷ ଦକ୍ଷିଣ-ପୂର୍ବ ରେଳବାଇ ପୁରୁଷ ବିଭାଗରେ ଚାମ୍ପିଅନ ହୋଇଥିବାବେଳେ ମହିଳା ବିଭାଗରେ କୋଲକାତା ବିଜେତା ହୋଇଛି। ରଜ ୩ ଦିନଯାକ ବର୍ଷା ପାଇଁ ଖେଳ ବାଧାପ୍ରାପ୍ତ ହୋଇଥିଲେ ବି ଆୟୋଜକମାନେ କୌଣସି ପ୍ରକାରେ ମ୍ୟାଚ୍ ଆୟୋଜନ କରାଇଥିଲେ।
Sambad is now on WhatsApp
Join and get latest news updates delivered to you via WhatsApp
ପୁରୁଷ ବିଭାଗରେ ୩୬ଟି ଓ ମହିଳା ବିଭାଗରେ ୨୦ଟି ଏଭଳି ମୋଟ ୫୬ଟି ମ୍ୟାଚ୍ ଖେଳା ଯାଇଥିଲା। ପ୍ରବଳ ବର୍ଷା ଯୋଗୁ ୪ଟି ମ୍ୟାଚ୍ ବାତିଲ ହୋଇଛି। ଗୁରୁବାର ସକାଳ ୫ଟା ୩୦ରୁ ଖେଳ ଆରମ୍ଭ ହୋଇଥିଲା। ଗତ ରାତିରେ ଉଭୟ ପୁରୁଷ ଓ ମହିଳା ବିଭାଗର କ୍ବାର୍ଟର ଫାଇନାଲ ଲାଇନ ଅପ୍ ଚୂଡ଼ାନ୍ତ ହୋଇ ଯାଇଥିଲା। ପୁରୁଷ ବିଭାଗ ପ୍ରଥମ କ୍ବାର୍ଟର ଫାଇନାଲରେ ଜଗତସିଂହପୁର କିଶୋର କ୍ଲବ୍କୁ ୩୬-୧୯ ପଏଣ୍ଟରେ ହରାଇ ପ୍ରଥମେ ସେମିଫାଇନାଲକୁ ଯାଇଥିଲା। ଦ୍ବିତୀୟ କ୍ବାର୍ଟର ଫାଇନାଲରେ ଦକ୍ଷିଣ-ପୂର୍ବ ରେଳବାଇ ଓଡ଼ିଶା ପୁଲିସକୁ ୪୦-୨୧ ପଏଣ୍ଟରେ ହରାଇଥିଲା। ତୃତୀୟ କ୍ବାର୍ଟର ଫାଇନାଲରେ ପୂର୍ବତଟ ରେଳବାଇ ନାଗପୁରକୁ ୪୪-୨୦ର ବଡ଼ ବ୍ୟବଧାନରେ ହରାଇଥିଲା। ଚତୁର୍ଥ କ୍ବାର୍ଟର ଫାଇନାଲରେ ବିଳାସପୁର କୋଲକାତା ପୁଲିସକୁ ୩୬-୩୩ ପଏଣ୍ଟରେ ହରାଇ ସେମିଫାଇନାଲକୁ ଉତ୍ତୀର୍ଣ୍ଣ ହୋଇଥିଲା।
ପୁରୁଷ ବିଭାଗର ପ୍ରଥମ ସେମିଫାଇନାଲ ଦକ୍ଷିଣ-ପୂର୍ବ ରେଳବାଇ ବନାମ ଜଗତସିଂହପୁର ଏବଂ ଦ୍ବିତୀୟ ସେମିଫାଇନାଲ ବିଳାସପୁର ଓ ପୂର୍ବତଟ ରେଳବାଇ ମଧ୍ୟରେ ଖେଳା ହୋଇଥିଲା। ମହିଳା ବିଭାଗ ପ୍ରଥମ ସେମିଫାଇନାଲ ଛତିଶଗଡ଼ ଓ କିଟ୍ ବିଶ୍ବବିଦ୍ୟାଳୟ ମଧ୍ୟରେ ଏବଂ ଦ୍ବିତୀୟ ସେମି ଫାଇନାଲ ଚନ୍ଦନ ନଗର ପଶ୍ଚିମବଙ୍ଗ ଓ କେକେଏ ପଟିଆ ମଧ୍ୟରେ ଖେଳା ହୋଇଥିଲା। ଦକ୍ଷିଣପୂର୍ବ ରେଳବାଇ ସେମିଫାଇନାଲରେ ଜଗତସିଂହପୁରକୁ ୫୦-୩୭ ପଏଣ୍ଟରେ ହରାଇ ଫାଇନାଲକୁ ଯାଇଥିଲା। ଦ୍ବିତୀୟ ସେମିଫାଇନାଲରେ ପୂର୍ବତଟ ରେଳବାଇ ବିଳାସପୁରକୁ ୪୫-୪୪ ପଏଣ୍ଟରେ ହରାଇ ଫାଇନାଲ ଖେଳିଥିଲା। ଗ୍ରାଣ୍ତ ଫାଇନାଲରେ ଦକ୍ଷିଣ ପୂର୍ବ ରେଳବାଇ ପୂର୍ବତଟ ରେଳବାଇକୁ ୫୨-୩୭ ପଏଣ୍ଟରେ ହରାଇ ଚଳିତ ବର୍ଷର ଚାମ୍ପିଅନ୍ ହୋଇଥିଲା। ମହିଳା ବିଭାଗରେ ଫାଇନାଲ ଖେଳିଥିବା ଚନ୍ଦନ ନଗର କୋଲକାତା କଡ଼ା ମୁକାବିଲାମୂଳକ ମ୍ୟାଚ୍ରେ ୩୩-୩୧ ପଏଣ୍ଟରେ ହରାଇ ବିଜେତା ହୋଇଥିଲା। ବିଳାସପୁରର ଯୋଗେଶ ନିତମ ଶ୍ରେଷ୍ଠ ପୁରୁଷ ଓ ଛତିଶଗଡ଼ର ଛାୟା ଶ୍ରେଷ୍ଠ ମହିଳା ଖେଳାଳି ଭାବେ ପୁରସ୍କୃତ ହୋଇଥିଲେ।
ଜେକେଏ ସଭାପତି ପ୍ରଦୀପ ସେଠୀଙ୍କ ପୌରୋହିତ୍ୟରେ ଅନୁଷ୍ଠିତ ପୁରସ୍କାର ବିତରଣ ସଭାରେ ମୁଖ୍ୟ ଅତିଥି ଭାବେ କ୍ରୀଡ଼ା ଓ ଯୁବସେବା ବିଭାଗ ମନ୍ତ୍ରୀ ତୁଷାରକାନ୍ତି ବେହେରା, ସମ୍ମାନିତ ଅତିଥି ଭାବରେ ଧର୍ମଶାଳା ବିଧାୟକ ପ୍ରଣବ କୁମାର ବଳବନ୍ତରାୟ ଯୋଗଦେଇ ଉଭୟ ବିଭାଗର ଚାମ୍ପିଅନ ଓ ରନର୍ସଅପ୍ ଟିମ୍କୁ ଟ୍ରଫି ଓ ନଗଦ ଅର୍ଥ ପୁରସ୍କାର ପ୍ରଦାନ କରିଥିଲେ।
ଅନ୍ୟ ଅତିଥିମ଼ାନଙ୍କ ମଧ୍ୟରେ ରସୁଲପୁର ବ୍ଲକ୍ ଅଧ୍ୟକ୍ଷ ଅରୁଣ ରାଉତ, ପ୍ରାୟୋଜକ କମ୍ପାନି ନେରୋଲାକର ଆଞ୍ଚଳିକ ବିକ୍ରୟ ପ୍ରବନ୍ଧକ ସଞ୍ଜୀବ କୁମାର ମହାନ୍ତି ଓ ରାମକୋ କମ୍ପାନିର ଅଧିକାରୀ ଅଜିତ କୁମାର ସାହୁ ଓ ଜିତେଶ ସିଂ ଯୋଗଦେଇଥିଲେ। ଜେକେଏ ସହସଂପାଦକ ଅଧ୍ୟାପକ ସମରେନ୍ଦ୍ର ଦାଶ ଅତିଥି ପରିଚୟ ଦେବା ସହିତ ସ୍ବାଗତ ଭାଷଣ ଦେଇଥିଲେ। ସଂପାଦକ ରବୀନ୍ଦ୍ର ପୃଷ୍ଟି ସଂପାଦକୀୟ ବିବରଣୀ ପାଠ କରିଥିଲେ। ଉପସଭାପତି ସନ୍ତୋଷ କୁମାର ପୃଷ୍ଟି ଧନ୍ୟବାଦ ଦେଇଥିଲେ।