ପରିବେଶ ସ୍ବଚ୍ଛତା ଦିଗରେ ପୂର୍ବତଟ ରେଳପଥର ପଦକ୍ଷେପ : ସବୁ ଟ୍ରେନ୍ ବାୟୋଟଏଲେଟ୍ ଯୁକ୍ତ
ଭୁବନେଶ୍ବର : ଯାତ୍ରୀଙ୍କୁ ସ୍ୱଚ୍ଛ ଓ ପରିବେଶ ଅନୁକୂଳ ଯାତ୍ରା ସୁବିଧା ଯୋଗାଇଦେବା ଓ ‘ସ୍ୱଚ୍ଛ ରେଳ, ସ୍ୱଚ୍ଛ ଭାରତ’ ଅଭିଯାନରେ ଦେଇଥିବା ପ୍ରତିଶ୍ରୁତିକୁ ପୂରଣ କରିବା ଉଦ୍ଦେଶ୍ୟରେ ପୂର୍ବତଟ ରେଳପଥ ଅଧୀନ ଟ୍ରେନ୍ଗୁଡ଼ିକରେ ବାୟୋ-ଟଏଲେଟ୍ ଶତ ପ୍ରତିଶତ ସ୍ଥାପନା କାର୍ଯ୍ୟ ଶେଷ ହୋଇଛି। ଏହି ବାୟୋ-ଟଏଲେଟ୍ଗୁଡ଼ିକ ବ୍ୟାକ୍ଟେରିଆ ସହାୟତାରେ ମାନବ ପରିଶିଷ୍ଟକୁ ଜଳ ଓ ବାୟୋ ଗ୍ୟାସ୍ରେ ପରିଣତ କରିବ। ପୂର୍ବତଟ ରେଳପଥରେ ୩୨୪୭ଟି କୋଚ୍ରେ ବର୍ତ୍ତମାନ ପରିବେଶ ଅନୁକୂଳ ବାୟୋ-ଟଏଲେଟ୍ ସଂଯୋଗ କରାଯାଇଛି। ସେଥିମଧ୍ୟରୁ ୨୫୩୪ ଆଇସିଏଫ୍ କୋଚ୍ ଓ ୭୧୩ଟି ଏଲ୍ଏଚ୍ବି କୋଚ୍ ବାୟୋ-ଟଏଲେଟ୍ ଦ୍ୱାରା ସୁସଜ୍ଜିତ ହୋଇଛି। ବାୟୋ-ଟଏଲେଟ୍ ଦ୍ବାରା ଟ୍ରାକ୍କୁ କଳଙ୍କି ଲାଗିବାରୁ ରକ୍ଷା କରାଯାଇପାରିବ। ରେଳବାଇ ସାମଗ୍ରୀର ରକ୍ଷଣାବେକ୍ଷଣ ଖର୍ଚ୍ଚ ହ୍ରାସ ପାଇବ। ଟ୍ରେନ୍ ପରିଚାଳନାରେ ନିରାପତ୍ତା ସୁଦୃଢ଼ କରିବ।
Sambad is now on WhatsApp
Join and get latest news updates delivered to you via WhatsApp
ପୂର୍ବତଟ ରେଳପଥ ଭେଞ୍ଚୁରି ପଦ୍ଧତିର ଚିନ୍ତାଧାରା ଲାଗୁ କରି ବାୟୋ-ଟଏଲେଟ୍ର କାର୍ଯ୍ୟକାରିତାରେ ମଧ୍ୟ ଉନ୍ନତି ଆଣିଛନ୍ତି। ଏହି ନୂତନ ପଦ୍ଧତି ଦ୍ୱାରା ଟଏଲେଟ୍ ମଧ୍ୟରେ ଉପଯୁକ୍ତରୂପେ ମୁକ୍ତ ବାୟୁ ଚଳାଚଳ ସୁନିଶ୍ଚିତ ହୋଇଥାଏ। ବାୟୋ-ଟଏଲେଟ୍ଗୁଡ଼ିକରେ ମଧ୍ୟ ସହଜରେ ମଇଳା ସଫା ହୋଇଯିବା ନିମନ୍ତେ କୋମଳ ଫ୍ଲସ୍ ସିଷ୍ଟମ୍ ବ୍ୟବସ୍ଥା କରାଯାଇଛି। ଟଏଲେଟ୍ ପ୍ୟାନ୍ଗୁଡ଼ିକ ମଧ୍ୟକୁ ଅବର୍ଜନା ପଦାର୍ଥ ଜମା ନହେବା ନିମନ୍ତେ ପ୍ରତ୍ୟେକ ଟଏଲେଟ୍ରେ ବାୟୋଟ୍ୟାଙ୍କ୍ ସଂଯୁକ୍ତ କରାଯାଇ ଲିଟରବିନ୍ର ବ୍ୟବସ୍ଥା ହୋଇଛି। ବାୟୋ-ଟଏଲେଟ୍ଗୁଡ଼ିକର ଉପଯୁକ୍ତ ବ୍ୟବହାର ବିଷୟରେ ଯାତ୍ରୀଙ୍କୁ ସଚେତନ କରିବା ପାଇଁ କ’ଣ କରିବା ଉଚିତ ଓ କ’ଣ ନ କରିବା ଉଚିତ ସମ୍ପର୍କରେ ସଚିତ୍ର ବାର୍ତା ପ୍ରଦର୍ଶିତ କରାଯାଇଛି।