ସରକାରଙ୍କ ପକ୍ଷରୁ ପ୍ଲାଷ୍ଟିକ୍‌ ଚାଉଳ ଯୋଗାଣ ଅଭିଯୋଗ

ନୀଳଗିରି: ନୀଳଗିରିରେ ସରକାରଙ୍କ ପକ୍ଷରୁ ମିଳୁଥିବା ଟଙ୍କିକିଅ ଚାଉଳ ନକଲି! ସେଗୁଡ଼ିକ ପ୍ଲାଷ୍ଟିକ୍‌ ଚାଉଳ ବୋଲି ଅଭିଯୋଗ ହୋଇଛି। ବ୍ଲକ୍‌ ଅଧୀନ ଭଉଁରିଆବାଡ଼ ପଞ୍ଚାୟତ ଅଧୀନ ବୟରସାହି ଗ୍ରାମବାସୀ ଶାନ୍ତିଲତା ସିଂ, ମହେଶ୍ବର ସିଂ, ଇନ୍ଦ୍ର ସିଂ, ମୁଗୁରି ସିଂ ପ୍ରମୁଖ ଗତ ରବିବାର ଦିନ ଡିଲର ବୁଦ୍ଧିରାମ ସିଂ’ଙ୍କଠାରୁ ସରକାରୀ ଟଙ୍କିକିଆ ଚାଉଳ ଆଣିଥିଲେ। ସେହି ଚାଉଳ ରାନ୍ଧି ଖାଇବା ପରେ ପେଟ ଯନ୍ତ୍ରଣା ହୋଇଥିଲା। ଫଳରେ ସେମାନେ ଚାଉଳ ନକଲି ବୋଲି ସଂଦେହ କରିଥିଲେ। ଘରେ ଥିବା ଚାଉଳ ଯାଞ୍ଚ କରିବା ପରେ ତାହା ପ୍ଲାଷ୍ଟିକ୍‌ ଚାଉଳ ବୋଲି ଅଭିଯୋଗ ହୋଇଛି।

ସେହିପରି ଡିଲର ଶ୍ରୀ ସିଂ’ଙ୍କ ଅଧୀନରେ ୩୦୦ରୁ ଅଧିକ ହିତାଧିକାରୀ ଥିବା ବେଳେ ଜଡ଼ିବାଲି, ବୟରସାହି ଆଦି ଗ୍ରାମର ୭୫ ପ୍ରତିଶତ ଲୋକ ଉକ୍ତ ଚାଉଳ ନେଇସାରିଲେଣି ଏବଂ ତାକୁ ଖାଇ ପେଟ ଯନ୍ତ୍ରଣା ଭୋଗୁଛନ୍ତି ବୋଲି ଅଭି‌ଯୋଗ ଆସୁଛି। ଏ ସଂପର୍କରେ ଡିଲର ଶ୍ରୀ ସିଂ’ଙ୍କୁ ପଚାରିବାରୁ ସେ ଅତି ‌ଖାମଖିଆଲ ଭାବେ ଚାଉଳରେ ଭିଟାମିନ୍‌ ମିଶିଛି ବୋଲି କହିଛନ୍ତି। ସେହିପରି ସରପଞ୍ଚ ସଞ୍ଜୟ କୁମାର ସିଂ’ଙ୍କୁ ପଚାରିବାରୁ ସେ ଅଭିଯୋଗର ତଦନ୍ତ କରାଯିବ ବୋଲି କହିଛନ୍ତି।