ପୁରୀ: ଶ୍ରୀକ୍ଷେତ୍ରରେ ଥିବା ଐତିହାସିକ ଏମାର ମଠର ‘ରଘୁନନ୍ଦନ ଲାଇବ୍ରେରି’ ବିଶ୍ୱସ୍ତରୀୟ ପାଠାଗାରରେ ପରିଣତ ହେବ। ଏଥି ପାଇଁ ପ୍ରଶାସନ ଉଦ୍ୟମ କରୁଛି। ଲାଇବ୍ରେରିର ସୁରକ୍ଷା ପାଇଁ ସବୁ ପ୍ରକାରର ବନ୍ଦୋବସ୍ତ କରାଯିବ ବୋଲି ପୁରୀ ଜିଲ୍ଲାପାଳ ବଳଓ୍ଵନ୍ତ ସିଂହ ବୁଧବାର ସୂଚନା ଦେଇଛନ୍ତି। ମଠକୁ ଭଙ୍ଗାଯିବା ପରେ ଲାଇବ୍ରେରିକୁ ଅନ୍ୟତ୍ର ସ୍ଥାନାନ୍ତର ନ କରାଯାଇ ପୁଣି ଥରେ ପୂର୍ବରୁ ଥିବା ସ୍ଥାନରେ ଅତ୍ୟାଧୁନିକ ପାଠାଗାର ପାଇଁ କୋଠା ନିର୍ମାଣ ହେବ। ଲାଇବ୍ରେରିକୁ ଡିଜିଟାଲାଇଜେଶନ କରିବା ପାଇଁ ଉଦ୍ୟମ କରାଯିବ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲାପାଳ କହିଛନ୍ତି, ରଘୁନନ୍ଦନ ଲାଇବ୍ରେରିରେ ୪୦୦୦ ରୁ ୫୦୦୦ ପୁସ୍ତକ ରହିଛି। ଏଠାରେ ବିରଳ ଜିନିଷ ଯଥା ଗ୍ରନ୍ଥାବଳୀ, ତାଳପତ୍ର ପୋଥି ଆଦି ମୂଲ୍ୟବାନ ଜିନିଷ ରହିଛି। ଆଗାମୀ ଦୁଇ ବର୍ଷ ପରେ ଅର୍ଥାତ ୨୦୨୧ରେ ଶହେ ବର୍ଷ ପୂର୍ତ୍ତି ଅବସରରେ ରଘୁନନନ୍ଦନ ଲାଇବ୍ରେରି ଅତ୍ୟାଧୁନିକ ରୂପରେ ଲୋକାର୍ପଣ ହେବ।
ବିଶ୍ୱ ଐତିହ୍ୟସ୍ଥଳୀ କରିବା ପାଇଁ ଶ୍ରୀମନ୍ଦିର ଚାରିପାଖରୁ ୭୫ ମିଟର ପର୍ଯ୍ୟନ୍ତ ଅଞ୍ଚଳରେ ଉଚ୍ଛେଦ ପ୍ରକ୍ରିୟା ଜାରି ରହିଛି। ଲଙ୍ଗୁଳି ମଠ ଭାଙ୍ଗିବା ପରେ ବୁଧବାର ଐତିହାସିକ ଏମାର ମଠ ଭଙ୍ଗାଯିବା ପାଇଁ ପ୍ରକ୍ରିୟା ଆରମ୍ଭ ହୋଇଛି। ମଠକୁ ଭାଙ୍ଗିବା ପାଇଁ ଜିଲ୍ଲା ପ୍ରଶାସନ ଆଜି ମଠର ମହନ୍ତଙ୍କୁ ବିଧିବଦ୍ଧ ଭାବେ ନୋଟିସ୍ କରିଛି। ତେବେ ଏହି ନୋଟିସକୁ ସ୍ୱାସ୍ଥ୍ୟଗତ କାରଣ ଦର୍ଶାଇ ମହନ୍ତ ଗ୍ରହଣ କରିନାହାନ୍ତି । ଫଳରେ କାନ୍ଥରେ ଲଟକା ଲଗାଇ ଦେଇଛି ମୁନିସିପାଲିଟି। ଶ୍ୱାସ ଥିବାରୁ ସେ ବାହାରକୁ ବାହାରି ପାରିବେ ନାହିଁ ବୋଲି କହି ନୋଟିସ ଗ୍ରହଣ କରିନାହାନ୍ତି ମହନ୍ତ।
ଅନ୍ୟପଟେ ଏହି ମଠରେ ଥିବା ଐତିହାସିକ ରଘୁନନ୍ଦନ ଲାଇବ୍ରେରିକୁ ସ୍ଥାନାନ୍ତର କରାଯାଇଛି। ଏହି ପୁରୁଣା ଲାଇବ୍ରେରିରେ ଥିବା ଆଲମିରା ଓ ବହିକୁ ଅନ୍ୟ ଏକ ମଠକୁ ସ୍ଥାନାନ୍ତର କରାଯାଇଛି। ଏମାର ମଠ ସହ ଏଥିରେ ଥିବା ଦୋକାନ ଘରଗୁଡିକୁ ମଧ୍ୟ ଭଙ୍ଗାଯିବ ଯ ମେଘନାଦ ପାଚେରୀ ଠାରୁ ମାତ୍ର ଅଳ୍ପ ଦୂରରେ ଥିବା ଏମାର ମଠକୁ ପୂର୍ବରୁ ଜିଲ୍ଲାପ୍ରଶାସନ ବିପଦସଂକୁଳ ଘୋଷଣା କରିଥିଲେ । ତେବେ ମଠ ପରିସରରେ ଥିବା ମନ୍ଦିର ଓ ପୂଜା ପାଉଥିବା ଠାକୁରଙ୍କୁ ପୂର୍ବଭଳି ରଖାଯିବାକୁ ନିଷ୍ପତ୍ତି ନିଆଯାଇଛି। ଏହାପରେ ବଡ ଆଖଡା ମଠ ଭଙ୍ଗାଯିବ। ସେଥିପାଇଁ ବଡ ଆଖଡା ମଠରେ ଥିବା ସିଂହଦ୍ୱାର ଥାନାର ଜିନିଷ ପତ୍ର ସ୍ଥାନାନ୍ତର ପ୍ରକ୍ରିୟା ଆରମ୍ଭ ହୋଇଛି।
ତେବେ ୧୦୦ତମ ପ୍ରତିଷ୍ଠା ଦିବସ ପାଳିବା ପୂର୍ବରୁ ଇତିହାସ ପାଲଟିବ ରଘୁନନ୍ଦନ ଲାଇବ୍ରେରି। ବହୁ ପୁରାତନ ଐତିହ୍ୟ ମଠ ଏମାରମଠ ଧରାଶାୟୀ ହେବା ସହ ଇତିହାସ ପାଲଟିଯିବ ଏହି ମଠ ପରିସରରେ ଥିବା ରଘୁନନ୍ଦନ ପାଠାଗାର। ଏହି ଲାଇବ୍ରେରିରେ ଜଗନ୍ନାଥ ସଂସ୍କୃତି ସହ ବହୁ ପୁସ୍ତକ ଓ ତାଳପତ୍ର ପୋଥି ରହିଛି। ଏହା ସହ ବହୁ ହିନ୍ଦୀ, ଇଂଲିଶ, ସଂସ୍କୃତି ଓ ଓଡିଆ ଭାଷାର ବହୁ ଦୁର୍ମୁଲ୍ୟ ପୁସ୍ତକ ରହିଛି କିନ୍ତୁ ଏହାକୁ ଭାଙ୍ଗିବା ପରେ ଏହା ଅସ୍ତିତ୍ୱ ହରାଇବ ବୋଲି ଆଶଙ୍କା ପ୍ରକାଶ ପାଇଛି। କାରଣ ଏହାକୁ ସ୍ଥାନାନ୍ତର କରିବାକୁ ନୋଟିସ ହୋଇଥିଲେ ବି ସେଭଳି କିଛି ଆଖିଦୃଶିଆ ପଦକ୍ଷେପ ନିଆଯାଇନାହିଁ। ଫଳରେ ୧୯୨୧ ମସିହାରେ ପ୍ରତିଷ୍ଠା କରାଯାଇଥିବା ଏହି ପ୍ର୍ରାଚୀନ ଗ୍ରନ୍ଥାଗାରର ଭବିଷ୍ୟତ ନେଇ ଉଠିଛି ପ୍ରଶ।