ରୋମାନିଆରେ ଭାରତର ରାଷ୍ଟ୍ରଦୂତ: ବୁଲିଲେ ପାଠ ପଢ଼ିଥିବା ବୀରମିତ୍ରପୁର ସେଣ୍ଟମେରି ସ୍କୁଲ

ବୀରମିତ୍ରପୁର: ରୋମାନିଆରେ ଭାରତର ରାଷ୍ଟ୍ରଦୂତ ଥିବା ରାହୁଲ ଶ୍ରୀବାସ୍ତବ ଆଜି ବୀରମିତ୍ରପୁରସ୍ଥ ସେଣ୍ଟମେରି ଇଂଲିସ ମିଡିୟମ୍‌ ସ୍କୁଲ ପରିଦର୍ଶନ କରିଛନ୍ତି। ଆଜି ମଧ୍ୟାହ୍ନ ପ୍ରାୟ ଦେଢ଼ଟା ସମୟରେ ଶ୍ରୀ ଶ୍ରୀବାସ୍ତବ ବୀରମିତ୍ରପୁର ବାଟଦେଇ ଝାଡ଼ଖଣ୍ଡ ଯାଉଥିବାବେଳେ ହଠାତ୍‌ ସେଣ୍ଟମେରି ସ୍କୁଲ ପହଞ୍ଚିଥିଲେ। ସେଠାରେ ସ୍କୁଲର ଅଧ୍ୟକ୍ଷା ସିଷ୍ଟର ସୁନୀତା, ସହକାରୀ ଶିକ୍ଷକ କିଶୋର କୁମାର ପଣ୍ଡା ଓ ସ୍କୁଲର ସମସ୍ତ ଶିକ୍ଷକଶିକ୍ଷୟିତ୍ରୀ ତାଙ୍କୁ ସ୍ୱାଗତ କରିଥିଲେ।

ସୂଚନାଯୋଗ୍ୟ ଯେ, ଶ୍ରୀ ଶ୍ରୀବାସ୍ତବଙ୍କ ବାପା ବ୍ରଜକିଶୋର ଶ୍ରୀବାସ୍ତବ ବୀରମିତ୍ରପୁରସ୍ଥ ବିଏସ୍‌ଏଲ୍‌ କମ୍ପାନିରେ କାର୍ଯ୍ୟରତ ଥିବାବେଳେ ଶ୍ରୀ ଶ୍ରୀବାସ୍ତବ ସେଣ୍ଟମେରି ସ୍କୁଲରେ ପାଠ ପଢ଼ୁଥିଲେ। ଏଣୁ ସେହିବାଟ ଦେଇ ଯାଉଥିବାବେଳେ ପୁରୁଣାସ୍ମୃତି ତାଙ୍କୁ ସ୍କୁଲକୁ ଟାଣି ଆଣିଥିଲା। ଶ୍ରୀ ଶ୍ରୀବାସ୍ତବ ସ୍କୁଲ ପରିସର ଓ ଶ୍ରେଣୀଗୃହ ବୁଲି ଦେଖିଥିଲେ। ନିଜେ ବସୁଥିବା ଶ୍ରେଣୀଗୃହ ଦେଖିବା ସହ ପିଲାଦିନ କଥା ମନେପକାଇ ଅଧ୍ୟକ୍ଷାଙ୍କ ସହ ମତବିନିମୟ କରିଥିଲେ। ଏହି ଅବସରରେ ବୀରମିତ୍ରପୁର ତହସିଲଦାର ଗୌରୀ ନାଏକ, ଥାନା ଏସ୍‌ଆଇ ନିରୁପମା ମହାପାତ୍ର ପ୍ରମୁଖ ଉପସ୍ଥିତ ଥିଲେ। ଶ୍ରୀଶ୍ରୀବାସ୍ତବ ପ୍ରାୟ ଅଧଘଣ୍ଟା କାଳ ସ୍କୁଲ ପରିସରରେ ରହିବା ପରେ ଝାଡ଼ଖଣ୍ଡ ଅଭିମୁଖେ ବାହାରି ଯାଇଥିଲେ।