କଟକ : କଟକ ଜିଲ୍ଲାର ୨୦ଟି ଗାଁ କୁ ଆଜି ବି ଅପହଞ୍ଚ ଆମ୍ବୁଲାନ୍ସ ସେବା। କେଉଁଠି ରାସ୍ତା ନାହିଁ ତ ଆଉ କେଉଁଠି ନଈ, ନାଳ, ବନ୍ୟଜନ୍ତୁ ସାଜିଛନ୍ତି ପ୍ରତିବନ୍ଧକ। ସ୍ବାସ୍ଥ୍ୟ ସେବାରୁ ବଂଚିତ ଅଂଚଳବାସୀ। ଗର୍ଭବତୀ ମା’ ବି ଆସିପାରୁନି ସ୍ବାସ୍ଥ୍ୟକେନ୍ଦ୍ର ପର୍ଯ୍ୟନ୍ତ। ଟୀକାକରଣ କଥା ନ କହିବା ଭଲ। ରାଜ୍ୟର ଅଗ୍ରଣୀ ଜିଲ୍ଲା କଟକର ଏଭଳି ଚିତ୍ର ବିକାଶର ନାରାକୁ ଆହ୍ବାନ ଦେଉଛି।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲାର ନରସିଂହପୁର, ବଡମ୍ବା ଓ ଟାଙ୍ଗୀ ଅଂଚଳରେ ଏଭଳି ଗାଁ ରହିଛି। ନରସିଂହପୁର ବ୍ଲକ୍ର ସାତକୋଶିଆ ପାଦଦେଶରେ ଥିବା ବାଙ୍କଧର, କଇଁତରା, ଦଲକ, ବେଣୀପଥର, ନଣ୍ଡଗୋଳ, ଖାରୁଆଣି, ବୋରସ, କୁଶଳ, ଟାଙ୍ଗୀର ମଙ୍ଗରାଜପୁର ପଞ୍ଚାୟତର ବାଞ୍ଜିଆମା, ଗରୁଡ ଗାଁ ପଂଚାୟତର ୪ଟି ଗାଁ ସମେତ ଜିଲ୍ଲାର ୨୦ରୁ ଅଧିକ ଗାଁରେ ସରୁଆ ରାସ୍ତା, ପାଦଚଲା ରାସ୍ତା ଓ ନଈ, ନାଳ ସମସ୍ୟା ଯୋଗୁଁ ଆମ୍ବୁଲାନ୍ସ ଯାଇପାରୁନି। ଗୁରୁତର ରୋଗୀଙ୍କୁ ମଧ୍ୟ ଅନେକ ସମୟରେ ମେଡିକାଲ ପର୍ଯ୍ୟନ୍ତ ଆଣିପାରୁନାହାନ୍ତି ଗ୍ରାମବାସୀ ଓ ସଂପର୍କୀୟ। ଗୋଟିଏପଟେ ରାସ୍ତା ସମସ୍ୟା ତ ଅନ୍ୟପଟେ ବନ୍ୟଜନ୍ତୁ ଭୟ। ସଂଜ ନଇଁଲେ ସବୁ ବନ୍ଦ। ବିଶେଷ କରି ଏହି ସବୁ ଅଞ୍ଚଳ ହାତୀ ଉପଦ୍ରବ ଅଞ୍ଚଳ ହୋଇଥିବାରୁ ଲୋକଙ୍କ ଜୀବନ ଦୁର୍ବିସହ ହୋଇପଡୁଛି। ଡାକ୍ତରୀ ଚିକିତ୍ସା ବଦଳରେ ଗାଁରେ ଝଡାଫୁଙ୍କାକୁ ବିଶ୍ବାସ କରି ମେଡିକାଲ ପର୍ଯ୍ୟନ୍ତ ଆସିପାରନ୍ତିନି ସେମାନେ। ସରକାର ସ୍ବାସ୍ଥ୍ୟସେବା କ୍ଷେତ୍ରରେ ଅନେକ ଭଲ ପଦକ୍ଷେପ ନେଉଥିବାବେଳେ ଏସବୁ ଠୁ ଦୂରରେ ଏହି ସବୁ ଅଂଚଳ।
ଟାଙ୍ଗୀର ବାଞ୍ଜିଆମା ଗ୍ରାମରେ ଆଜି ବି ଗର୍ଭବତୀ ମହିଳାମାନେ ମେଡିକାଲକୁ ଆସନ୍ତିନି। ଘରେ ପ୍ରସବ ହୁଏ ସନ୍ତାନ। ସେ ସବୁ ଅଂଚଳକୁ ରାସ୍ତା ଘାଟ ସମସ୍ୟା ରହିଥିବାରୁ ନା ସନ୍ତାନ ପ୍ରସବ ନା ଟୀକାକରଣ ପାଇଁ ସେମାନେ ମେଡିକାଲ ପର୍ଯ୍ୟନ୍ତ ଆସନ୍ତି। କିନ୍ତୁ ସେହି ଉପାନ୍ତ ଅଂଚଳର କିଛି ଗାଁରେ ଲୋକଙ୍କ ଭିତରେ ସଚେତନତା, ଆଶା ଓ ଅଙ୍ଗନବାଡି କର୍ମୀଙ୍କ ପାଇଁ କିଛି ମା’ ଏବେ ମେଡିକାଲ ପର୍ଯ୍ୟନ୍ତ ଆସିଲେଣି। ହେଲେ ଗର୍ଭବତୀଙ୍କୁ ୩/୪ କିଲୋମିଟର ଦୂର ବୋହି ଅଣାଯିବା ପରେ ଅପେକ୍ଷା କରିଥିବା ଆମ୍ବୁଲାନ୍ସରେ ରୋଗୀଙ୍କୁ ମେଡିକାଲ ପର୍ଯ୍ୟନ୍ତ ଅଣାଯାଇଥାଏ। ପ୍ରଶାସନ ପକ୍ଷରୁ ଏହି ସବୁ ଗାଁ ଗୁଡିକରେ ଯେଉଁଭଳି ସଚେତନତା କାର୍ଯ୍ୟକ୍ରମ କରାଯିବା କଥା ତା କରାଯାଉନି। ଏ ସଂପର୍କରେ ସ୍ବାସ୍ଥ୍ୟ ବିଭାଗର ଜଣେ ବରିଷ୍ଠ ଅଧିକାରୀଙ୍କ କହିବା କଥା େହଲା ରାସ୍ତା ସମସ୍ୟା ପାଇଁ ଜିଲ୍ଲାର ୨୦ଟି ଗାଁକୁ ଆମ୍ବୁଲାନ୍ସ ଯାଇପାରୁନି। କିନ୍ତୁ ବିକଳ୍ପ ବ୍ୟବସ୍ଥା ଭାବେ ସେସବୁ ଅଂଚଳରେ ଷ୍ଟ୍ରେଚର ବ୍ୟବସ୍ଥା କରାଯାଇଥିବା ସେ ସୂଚନା ଦେଇଛନ୍ତି। କିନ୍ତୁ ବାସ୍ତବରେ ଅଧିକାଂଶ ଗାଁରେ ଷ୍ଟ୍ରେଚର ନଥିବା ଜଣାପଡିଛି।