ସୂର୍ଯ୍ୟମନ୍ଦିର ସ୍ଥିତି ଅନୁଧ୍ୟାନ କଲେ ଆମିକସ୍ କ୍ୟୁରି : ଗର୍ଭଗୃହରେ ୧୭ ଫୁଟ୍ ବାଲି ଦବିଛି
ବିଶେଷଜ୍ଞଙ୍କ ରିପୋର୍ଟ ଉପରେ ନିର୍ଭର କରୁଛି ବାଲି କଢ଼ାଯିବା ନିଷ୍ପତ୍ତି, ଡିସେମ୍ବର ସୁଦ୍ଧା ଉଚ୍ଛେଦ ହେବ ଲୁହାପାଇପ୍ ଭାରା, ମନ୍ଦିରର ସୁରକ୍ଷା ପାଇଁ ଲାଗିବ କଳଙ୍କି ପ୍ରତିରୋଧ ବିମ୍
କୋଣାର୍କ : କୋଣାର୍କ ସୂର୍ଯ୍ୟମନ୍ଦିରର ସୁରକ୍ଷା ଚିନ୍ତା ଏବେ ମୁଖ୍ୟ ପ୍ରସଙ୍ଗ ପାଲଟିଛି। ଗତ ୩ ତାରିଖରେ ସିବିଆର୍ଆଇ ବିଶେଷଜ୍ଞ ଟିମ୍ ମନ୍ଦିରର ସ୍ଥିତି ଅନୁଧ୍ୟାନ କରିଥିଲେ। ବିଶେଷଜ୍ଞ ଟିମ୍ର ଗସ୍ତକୁ ୧୦ ଦିନ ବିତିଥିବା ବେଳେ ଓଡ଼ିଶା ହାଇକୋର୍ଟଙ୍କ ଦ୍ବାରା ନିଯୁକ୍ତ ଆମିକସ୍ କ୍ୟୁରି ଏନ୍.କେ.ମହାନ୍ତି ଆଜି ଅପରାହ୍ନରେ ସୂର୍ଯ୍ୟ ମନ୍ଦିର ପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
୧୯୦୩ ମସିହାରେ ମୁଖଶାଳାର ଗର୍ଭଗୃହରେ ଭର୍ତି ହୋଇଥିବା ୧୦ ହଜାର ମେଟ୍ରିକ୍ ଟନ୍ ବାଲି ମଧ୍ୟରୁ ୧୭ ଫୁଟ୍ ବାଲି ଦବିଥିବା ନେଇ ଆମିକସ୍ କ୍ୟୁରି ଗଣମାଧ୍ୟମକୁ ସୂଚନା ଦେଇଛନ୍ତି। ତେବେ ସିବିଆର୍ଆଇ ବିଶେଷଜ୍ଞ ଟିମ୍ଙ୍କ ରିପୋର୍ଟ ଆସିବା ପରେ ମନ୍ଦିର ଗର୍ଭଗୃହରୁ ବାଲି କଢ଼ାଯିବା ସଂପର୍କରେ ନିଷ୍ପତ୍ତି ନିଆଯିବ ବୋଲି ସେ ସୂଚନା ଦେଇଛନ୍ତି। ମନ୍ଦିରକୁ ଲୁଣା ପବନରୁ ରକ୍ଷା କରିବା ପାଇଁ ମନ୍ଦିର ଚାରିପାଖରେ ବ୍ୟାପକ ବୃକ୍ଷରୋପଣ କରାଯିବା ସହ ନିୟମିତ ବ୍ୟବଧାନରେ କେମିକାଲ୍ ପ୍ରଲେପ ଦିଆଯିବ। ମନ୍ଦିରର ସୁରକ୍ଷାକୁ ଦୃଷ୍ଟିରେ ରଖି ଦୀର୍ଘସ୍ଥାୟୀ ଓ ଉନ୍ନତ ମାନର କେମିକାଲ୍ ବ୍ୟବହାର କରାଯିବ। ସେହିପରି ମନ୍ଦିରରେ ଜମି ରହୁଥିବା ବର୍ଷା ପାଣି ନିଷ୍କାସନ ପାଇଁ ସ୍ଥାୟୀ ପ୍ରତିକାର ବ୍ୟବସ୍ଥା କରାଯିବ। ସଂପ୍ରତି ମନ୍ଦିର ଚାରିପାଖରେ ଲାଗିଥିବା ଲୁହା ପାଇପ୍ ଖୋଲାଯିବା କାର୍ଯ୍ୟ ଡିସେମ୍ବର ସୁଦ୍ଧା ସମାପ୍ତ ହେବ। ଲୁହା ପାଇପ୍ କଢ଼ାଯିବା ପରେ ମନ୍ଦିରର ସୁରକ୍ଷା ପାଇଁ ଅତ୍ୟାଧୁନିକ ଜ୍ଞାନକୌଶଳରେ ନିର୍ମିତ କଳଙ୍କି ପ୍ରତିରୋଧ ବିମ୍ କିମ୍ବା ଚ୍ୟାନେଲ୍ ଲଗାଯିବ ବୋଲି ସେ ସୂଚନା ଦେଇଥିଲେ। ଆମିକସ୍ କ୍ୟୁରିଙ୍କ ଗସ୍ତ ସମୟରେ ଏଏସ୍ଆଇ ଭୁବନେଶ୍ବର ସର୍କଲର ସୁପରିନଟେଣ୍ଡେଣ୍ଟ ଅରୁଣ ମଲ୍ଲିକ ଓ ଏଏସ୍ଆଇର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।