ଆଉ ପାଦେ ଆଗେଇଲା ବୃତ୍ତଙ୍ଗ ପ୍ରକଳ୍ପ: ମିଳିଲା ଦ୍ବିତୀୟ ପର୍ଯ୍ୟାୟ ପରିବେଶ ମଞ୍ଜୁରି

ନୟାଗଡ଼/ଦଶପଲ୍ଲା: ନୟାଗଡ଼ ଜିଲ୍ଲାବାସୀଙ୍କ ଦୀର୍ଘ ପ୍ରାୟ ପାଞ୍ଚ ଦଶନ୍ଧିର ସ୍ବପ୍ବ ପୂରଣ ହୋଇଛି। ବହୁ ପ୍ରତୀକ୍ଷିତ ବୃତ୍ତଙ୍ଗ ଜଳସେଚନ ପ୍ରକଳ୍ପକୁ ଦ୍ବିତୀୟ ପର୍ଯ୍ୟାୟ ପରିବେଶ ମଞ୍ଜୁରି ମିଳିଛି। କେନ୍ଦ୍ର ସରକାରଙ୍କ ଜଙ୍ଗଲ, ପରିବେଶ ଏବଂ ଜଳବାୟୁ ମନ୍ତ୍ରାଳୟର ମଞ୍ଜୁରି ପରେ ଏହି ପ୍ରକଳ୍ପ ବାସ୍ତବ ରୂପ ନେବାକୁ ଯାଉଥିବାରୁ ଜିଲ୍ଲାର ହଜାର ହଜାର ଚାଷୀଙ୍କ ମୁହଁରେ ଉତ୍ସାହ ଦେଖାଦେଇଛି। ଏହି ପ୍ରକଳ୍ପ ଦ୍ବାରା ନୟାଗଡ଼ ଜିଲ୍ଲାର ଦଶପଲ୍ଲା, ଖଣ୍ଡପଡ଼ା, ନୂଆଗାଁ ଓ ଓଡ଼ଗାଁ ବ୍ଲକର ୨୩ ହଜାର ୩ ଶହ ହେକ୍ଟର ଜମି ଜଳସେଚିତ ହେବାସହ ପାନୀୟଜଳର ମଧ୍ୟ ସୁବନ୍ଦୋବସ୍ତ ହୋଇପାରିବ।

ଟାକରା ପଞ୍ଚାୟତର ମଞ୍ଜାରୀ ନିକଟରେ ଥିବା ମାଈ ଓ ଢାବଲଦେଈ ପାହାଡ଼ର ସଂଯୋଗରେ ଏହି ପ୍ରକଳ୍ପ ନିର୍ମାଣ କରାଯିବ। ସମୁଦାୟ ୩,୫୫୨ ହେକ୍ଟରରେ ନିର୍ମାଣ ହେବାକୁ ଥିବା ଏହି ପ୍ରକଳ୍ପ ମଧ୍ୟରେ ୧୫୨୪.୧୭ ହେକ୍ଟର ଜଙ୍ଗଲ ଜମି, ୭୯୦.୮୮ ହେକ୍ଟର ସରକାରୀ ଜମି ଓ ୧୨୩୭.୦୧ ହେକ୍ଟର ବେସରକାରୀ ଜମି ଥିବାବେଳେ ୨୧୨୧.୪୧ ହେକ୍ଟର ଜମି ଜଳ ପ୍ଲାବିତ ହେବ। ପ୍ରକଳ୍ପକୁ କାର୍ଯ୍ୟକାରୀ କରିବା ପାଇଁ ବୃତ୍ତଙ୍ଗ ଜଳସେଚନ କ୍ରିୟାନୁଷ୍ଠାନ କମିଟିର ପଦଯାତ୍ରାଠାରୁ ଆରମ୍ଭ କରି ବିଧାନସଭାରେ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ନାନା ପ୍ରଶ୍ନ ଉଠାଇଥିଲେ। ଗତ ସାଧାରଣ ନିର୍ବାଚନ ପୂର୍ବରୁ ରାଜ୍ୟ ସରକାର ପ୍ରାଥମିକ ପର୍ଯ୍ୟାୟରେ ୧୭୦୦ କୋଟି ଟଙ୍କା ମଞ୍ଜୁର କରିଥିବା ନେଇ ଘୋଷଣା କରିଥିଲେ।

ତେବେ, ପ୍ରଥମ ପର୍ଯ୍ୟାୟ ପରିବେଶ ମଞ୍ଜୁରି ସମୟରେ ଦଶପଲ୍ଲା ତହସିଲର ୩ଟି ସର୍କଲ ଚଡ଼େୟାପଲ୍ଲୀ, କୁଲୁରୁକୁମ୍ପା ଓ ନେଳିଗୁଡ଼ା ସର୍କଲର ପ୍ରାୟ ୧୬ ହଜାର ୯ଶହ ୬୫ ଏକର ଜାଗାକୁ କଞ୍ଜର୍ଭେସନ ରିଜର୍ଭ ଘୋଷଣା ପାଇଁ ସର୍ତ୍ତାବଳୀ ରହିଥିଲା। କିଛିମାସ ତଳେ ଭୁବନେଶ୍ବରରେ ବସିଥିବା ଉଚ୍ଚସ୍ତରୀୟ ବୈଠକରେ ଏସବୁ ଜାଗା ମଧ୍ୟରେ ବିକାଶମୂଳକ କାର୍ଯ୍ୟପାଇଁ ପ୍ରାୟ ୪ ହଜାର ୩ ଶହ ହେକ୍ଟର ସ୍ଥାନ ସମେତ ୯୬ଟି ଗ୍ରାମକୁ ଏଥିରୁ ବାଦ୍‌ଦେବାକୁ ନିଷ୍ପତ୍ତି ହୋଇଥିଲା। ଏ ନେଇ କେନ୍ଦ୍ର ସରକାର ମଧ୍ୟ ସହମତି ପ୍ରକାଶ କରିଥିଲେ। ଉଭୟଙ୍କ ସହମତି କ୍ରମେ ବିକାଶମୂଳକ କାର୍ଯ୍ୟପାଇଁ ଏସବୁ ସ୍ଥାନ ଏବଂ ଗ୍ରାମକୁ ବାଦ୍‌ ଦିଆଯିବାକୁ ନିଷ୍ପତ୍ତି ହେବାପରେ ତହସିଲ ପକ୍ଷରୁ ସେସବୁ ସ୍ଥାନ ଏବଂ ଗ୍ରାମକୁ ଚିହ୍ନଟ କରାଯାଇ ଜିଲ୍ଲାପାଳଙ୍କ ନିକଟରେ ରିପୋର୍ଟ ଦାଖଲ କରାଯିବା ସହ କେନ୍ଦ୍ର ସରକାରଙ୍କ ନିକଟକୁ ପଠାଯାଇଥିଲା। ଅନ୍ୟପକ୍ଷରେ, ଜଙ୍ଗଲ କ୍ଷୟର ଭରଣା ବା ନୂତନ ବନୀକରଣ ଏବଂ ହାତୀ କରିଡର୍‌ ପାଇଁ ପ୍ରଥମ ପର୍ଯ୍ୟାୟରେ ଜଳସମ୍ପଦ ବିଭାଗ ୭୫ କୋଟି ୮୫ ଲକ୍ଷ ୨୯ ହଜାର ୩୧୪ ଟଙ୍କା ଏବଂ ଦ୍ବିତୀୟ ପର୍ଯ୍ୟାୟରେ ୮୦ କୋଟି ୨୯ ଲକ୍ଷ ୭୨ ହଜାର ୫ଶହ ଟଙ୍କା ବନବିଭାଗ ନିକଟରେ ଦାଖଲ କରିଥିବା ଜଣାପଡ଼ିଛି।