କୋଟିଆରେ ଆନ୍ଧ୍ର ସିପିଏମ୍‌ ନେତା: ଆଦିବାସୀଙ୍କୁ ଏକାଠି ହେବାକୁ ଆହ୍ବାନ

ପଟାଙ୍ଗି: ମାସକ ପରେ କୋଟିଆରେ ପୁଣି ଅନୁପ୍ରବେଶ କରିଛି ଆନ୍ଧ୍ର ସିପିଏମ୍‌ ଦଳ। ପୂର୍ବ ଭଳି ଲୋକଙ୍କୁ ଭେଟି ଓଡ଼ିଶା ବିରୋଧରେ ମତାଇଛନ୍ତି। କୋଟିଆରେ ଅଶାନ୍ତି ପାଇଁ ଓଡ଼ିଶା ସରକାର ଦାୟୀ ବୋଲି ଅଭିଯୋଗ କରିଛନ୍ତି। ରାଜନୈତିକ ଦଳର ନେତାଙ୍କ ଆଚରଣ ଏବଂ ଉଚ୍ଚାରଣରେ ଅଙ୍କୁଶ ଲଗାଇବା ସମ୍ଭବ ହେଉନି। ତେଣୁ ଓଡ଼ିଶା ବିରୋଧୀ ମେଳି କୋଟିଆରେ କରୁଛନ୍ତି। ଯାହାର ପ୍ରଭାବ କୋଟିଆବାସୀଙ୍କ ଉପରେ ପଡ଼ୁଥିବା ଦେଖିବାକୁ ମିଳିଛି।

ଫେବ୍ରୁଆରି ୧୯ତାରିଖରେ ସିପିଏମ୍‌ ନେତା କୋଟିଆ ଆସିଥିଲେ। ଧୂଳିପଦର, ଉପରସେମ୍ବି ଏବଂ ତଳଗଞ୍ଜେଇପଦର ଗ୍ରାମବାସୀଙ୍କୁ ଏକାଠି କରି ସଂଗ୍ରାମ କରିବାକୁ ଆହ୍ବାନ ଦେଇଥିଲେ। ଆଜି ସାଲୁର ମଣ୍ଡଳ ସଚିବ ମାରି ଶ୍ରୀନିବାସ ରାଓଙ୍କ ନେତୃତ୍ବରେ ଉପରସେମ୍ବି ଗାଁରେ ବୈଠକ ହୋଇଥିଲା। କୋଟିଆ ପଞ୍ଚାୟତର ୨୧ଖଣ୍ଡ ଗାଁ ପାଇଁ ଦୁଇ ରାଜ୍ୟ ମଧ୍ୟରେ ବିବାଦ ଚାଲିଛି। ବିବାଦ ଯୋଗୁଁ ୨୧ ଗାଁର ଆଦିବାସୀ ସୁବିଧା ନ ପାଇ ଯନ୍ତ୍ରଣା ଭୋଗୁଛନ୍ତି। ସମଗ୍ର ଅଞ୍ଚଳ ଉପରେ ଆଦିବାସୀଙ୍କ ଅଧିକାର ରହିଛି। ତେବେ ବିବାଦୀୟ ଗାଁଗୁଡ଼ିକରେ ଓଡ଼ିଶା ସରକାର ଆଦିବାସୀଙ୍କ ହିତ ଲାଗି କୌଣସି ନିୟମ ଲାଗୁ କରୁନାହାନ୍ତି। ଓଡ଼ିଶାରେ ବିଜେପି ଏବଂ ଆନ୍ଧ୍ରରେ ଏନ୍‌ଡିଏ ସରକାର ରହିଥିଲେ ସୁଦ୍ଧା ପୁରୁଣା ବିବାଦର ସମାଧାନ ହୋଇପାରୁନି। କୋଟିଆରେ ଜମିଜମା ସମସ୍ୟା ରହିଛି। ଯାହାର ସମାଧାନ କରିବାରେ ଓଡ଼ିଶା ସରକାର ବିଫଳ। ଯଦି ଓଡ଼ିଶା ସରକାର ସ୍ଥାନୀୟ ସମସ୍ୟାର ସମାଧାନ ଦିଗରେ ଦୃଷ୍ଟି ନ ଦିଅନ୍ତି ତେବେ ଆଦିବାସୀ ଏକାଠି ହୋଇ ଆନ୍ଦୋଳନ କରିବେ ବୋଲି ଶ୍ରୀନିବାସ ଚେତାବନୀ ଦେଇଥିଲେ।

ଦୁଇ ଦିନ ତଳେ ମଧ୍ୟ ସରକାରୀ ଜମିରେ ବାଡ଼ କରିବାକୁ କେନ୍ଦ୍ର କରି ଆନ୍ଧ୍ରର ନେତା ଭୁଲ ତଥ୍ୟ ଦେଇଥିଲେ। କୋଟିଆବାସୀଙ୍କୁ ମତାଇ ସାଲୁର ତହସିଲଦାରଙ୍କ ନିକଟରେ ଠିଆ କରାଇଥିଲେ। ଓଡ଼ିଶା ସରକାରଙ୍କ କାମରେ ହସ୍ତକ୍ଷେପ ନିମନ୍ତେ ଲୋକଙ୍କ ଦ୍ବାରା ଦାବିପତ୍ର ଦେଇଥିଲେ। ସେହି ଉଦ୍ୟମ ବିଫଳ ହେବାପରେ ଆଜି ଓଡ଼ିଶା ବିରୋଧରେ ଲୋକଙ୍କ ମନରେ ବିଷ ଭରିଛନ୍ତି। ଯଦି ଏଭଳି ନେତାଙ୍କ ଉପରେ କଟକଣା ନ ଲାଗିବ ତେବେ ଆଗକୁ କୋଟିଆରେ ଅଶାନ୍ତି ସୃଷ୍ଟି ହେବ ବୋଲି କୁହାଯାଉଛି।