ଭୁବନେଶ୍ବ: ରାଜଧାନୀର ଏକାଧିକ ସ୍ଥାନରେ ଲାଗିଛି କଂଗ୍ରେସକୁ ବଦନାମ କରିବା ଭଳି ବେନାମୀ ପୋଷ୍ଟର। କାହା ସୌଜନ୍ୟରୁ ଏଭଳି ବେନାମୀ ପୋଷ୍ଟର ଲାଗିଛି ସ୍ପଷ୍ଟ ହୋଇ ନାହିଁ। ତେବେ ଏଭଳି ପୋଷ୍ଟର ଲଗାଯିବା ପଛରେ ବିଜେପି ନା ପିସିସି ସଭାପତି ଭକ୍ତ ଦାସଙ୍କ ବିରୋଧୀ ଗୋଷ୍ଠୀ ଅଛନ୍ତି ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ନାରୀ ନିର୍ଯାତନା ପ୍ରସଙ୍ଗରେ ବିରୋଧୀ ଦଳମାନେ ଲଗାତାର ସରକାରଙ୍କୁ ଘେରି ଆସୁଛନ୍ତି। ଏଭଳି ସମୟରେ ବିରୋଧୀ କଂଗ୍ରେସକୁ ବଦନାମ କରିବା ଭଳି ପୋଷ୍ଟର ଲଗାଯିବା ରାଜ୍ୟ ରାଜନୀତିରେ ଆଲୋଚନାର ନୂଆ ଖୋରାକ ଯୋଗାଇଛି।
ବିଭିନ୍ନ ସ୍ଥାନରେ ଲାଗିଥିବା ପୋଷ୍ଟରରେ କଂଗ୍ରେସ ନେତା ରାହୁଲ ଗାନ୍ଧୀ ଓ ନିଲମ୍ବିତ ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନଙ୍କ ଫଟୋ ରହିଛି। ଏଥିରେ ରାହୁଲଙ୍କୁ ଦେଶଦ୍ରୋହୀ ବୋଲି ଲେଖା ଯାଇଥିବା ବେଳେ ଦୁଇ ଦିନ ତଳେ ଦୁଷ୍କର୍ମ ଅଭିଯୋଗରେ ଗିରଫ ହୋଇଥିବା ଉଦିତଙ୍କୁ ଦୁଷ୍କର୍ମକାରୀ ବୋଲି ଲେଖାଯାଇଛି। ଆଉ ଏକ ପୋଷ୍ଟରରେ ପିସିସି ସଭାପତି ଶ୍ରୀ ଦାସଙ୍କ ଇସ୍ତଫା ଦାବି କରାଯାଇଛି। ଦିନବ୍ୟାପୀ ଏଭଳି ପୋଷ୍ଟରକୁ ନେଇ ଗଣମାଧ୍ୟମ ଓ ସାଧାରଣ ଲୋକଙ୍କ ଭିତରେ ଆଲୋଚନା ଦେଖିବାକୁ ମିଳିଥିଲା। ଏଭଳି ବେନାମୀ ପୋଷ୍ଟରକୁ ନେଇ ଚିହିଁକି ଉଠିଛନ୍ତି ପିସିସି ସଭାପତି। ଶ୍ରୀ ଦାସ କହିଛନ୍ତି, ବିଜେପି ଲୁଚିକି ଏଭଳି ପୋଷ୍ଟର ମାରିଛି। କଂଗ୍ରେସ କାର୍ଯ୍ୟକ୍ରମକୁ ଦେଖି ବିଜେପି ଭୟଭୀତ ହୋଇଛି। ଏବେ ଆନ୍ଦୋଳନାତ୍ମକ ରୂପ ଦେଖିଛନ୍ତି, ଆଗକୁ ରାଜନୈତିକ ରୂପ ଦେଖିବେ ବୋଲି ସେ କହିଛନ୍ତି। ବିଧାୟକ ତାରାପ୍ରସାଦ ବାହିନୀପତି କହିଛନ୍ତି, ଯୁବ ବିଜେପି ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ଯେଉଁସବୁ କଥା କୁହାଯାଇଥିଲା, ପୋଷ୍ଟରରେ ମଧ୍ୟ ସମାନ କଥା କୁହାଯାଇଛି। ବିଜେପିର ଯଦି ସତ୍‌ସାହସ ଅଛି ତାହାଲେ ପୋଷ୍ଟରରେ ଦଳର ନାଁ ଲେଖନ୍ତୁ। ଏତେ ତଳସ୍ତରକୁ ଯିବାର କ’ଣ ଆବଶ୍ୟକତା ରହିଛି ବୋଲି ସେ ପ୍ରଶ୍ନ କରିଛନ୍ତି। ଅପରପକ୍ଷରେ ବିଜେପି ବିଧାୟକ ବାବୁ ସିଂହ କହିଛନ୍ତି, କାଚ ଘରେ ରହି ଅନ୍ୟକୁ ଟେକା ମାରିଲେ ଯାହା ଅବସ୍ଥା କଂଗ୍ରେସର ବର୍ତ୍ତମାନ ସେହି ଅବସ୍ଥା।