ଖୋର୍ଦ୍ଧା: ପ୍ରାୟ ୪୦-୫୦ ଦିନ ପୂର୍ବେ ବୋଲଗଡ଼ ଥାନା ଅସରଳା ଗାଁରେ ଏକ ଟ୍ରାକ୍ଟର ଋଣ ନେଇ ଖିଲାପ କରିଥିବା ଘଟଣାରେ ଉକ୍ତ ଟ୍ରାକ୍ଟର ଜବତ କରିବାକୁ ଯାଇଥିବା ଏକ ଘରୋଇ ଫାଇନାନ୍ସ କମ୍ପାନୀର ମହିଳା ଅଧିକାରୀଙ୍କୁ ପୁଲିସ ଉପସ୍ଥିତିରେ ମରଣାନ୍ତକ ଆକ୍ରମଣ ହୋଇଥିଲା । ତତ୍କାଳୀନ ଥାନା ଅଧିକାରୀ ଏହି ମାମଲାରେ ଅସହଯୋଗ କରୁଥିବା, ଲାଂଚ ମାଗୁଥିବା ନେଇ ଅଭିଯୋଗ କରି ଉକ୍ତ ମହିଳା ଅଧିକାରୀ ଆତ୍ମାହୁତିର ଧମକ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଆକ୍ରମଣର ଶିକାର ହୋଇଥିବା ତଥା ଫାଇନାନ୍ସ କମ୍ପାନୀର ଅଧିକାରୀ ତପସ୍ୱିନୀ ଦାଶ ପୂର୍ବାହ୍ଣରେ ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟକୁ ଆସିଥିଲେ । ତେବେ ଆରକ୍ଷୀ ଅଧୀକ୍ଷକଙ୍କ ଅନୁପସ୍ଥିତ ଥିବାରୁ ସେ ଫେରିଯାଇଥିଲେ । ଏନେଇ ଅଭିଯୋଗକାରିଣୀ ତପସ୍ୱିନୀ ଗଣମାଧ୍ୟମକୁ କହିଛନ୍ତି ଯେ ବାଙ୍କୋଇ ଫାଣ୍ଡି ଅନ୍ତର୍ଗତ ଅସରଳା ଗାଁର ରୋଜାଲିନ ପରିଡ଼ା ଏକ ଟ୍ରାକ୍ଟର ଋଣ କରି ନେଇଥିଲେ । ସେ ଅନେକ ଦିନ ଋଣର କିସ୍ତି ନଶୁଝିବା, ଋଣ ଆଦାୟ କରିବାକୁ ଯାଇଥିବା କର୍ମଚାରୀଙ୍କୁ ଅସହଯୋଗ କରିଥିବାରୁ ଜୁଲାଇ ୩୦ ତାରିଖରେ ବୋଲଗଡ଼ ଥାନା ପୁଲିସଙ୍କ ସହ ସେ ସେଠାକୁ ଯାଇଥିଲେ । ତେବେ ତାଙ୍କୁ ପୁଲିସ ଉପସ୍ଥିତିରେ ରୋଜାଲିନ, ରୋଜାଲିନଙ୍କ ସ୍ୱାମୀ କାଳିଆ ଭଂଜ ଓ କାଳିଆଙ୍କ ବାପା ପବିତ୍ର ଭଂଜ କୁରାଢ଼ୀରେ ମରଣାନ୍ତକ ଆକ୍ରମଣ କରିଥିଲେ । ସେ ଗୁରୁତର ଆହତ ହୋଇ ଦୀର୍ଘ ଦିନ ଚିକିତ୍ସାଳୟରେ ଚିକିତ୍ସାଧୀନ ଥିଲେ ।
ଏନେଇ ତପସ୍ୱିନୀଙ୍କ ଭାଇ ବାଙ୍କୋଇ ଫାଣ୍ଡି ଓ ବୋଲଗଡ଼ ଥାନାରେ ଲିଖିତ ଅଭିଯୋଗ କରିଥିଲେ । ଏହା ମଧ୍ୟରେ ୬ ମାସ ବିତିଯାଇଥିଲେ ମଧ୍ୟ ଅଭିଯୁକ୍ତଙ୍କୁ ପୁଲିସ ଗିରଫ କରିନାହିଁ । ଏନେଇ ସେ ଅଗଷ୍ଟ ୬ ତାରିଖରେ ଆରକ୍ଷୀ ଅଧୀକ୍ଷକଙ୍କୁ ସାକ୍ଷାତ କରି ବୋଲଗଡ଼ ଥାନା ଅଧିକାରୀ ୧୦ ହଜାର ଟଙ୍କା ଲାଂଚ ମାଗୁଥିବା ଓ ଅଭିଯୁକ୍ତଙ୍କ ସପକ୍ଷରେ ମାମଲାକୁ ରଫାଦଫା କରିବାକୁ ଉଦ୍ୟମ କରୁଥିବା ନେଇ ଅଭିଯୋଗ କରିଥିଲେ । ଏହାସତ୍ୱେ ମଧ୍ୟ ତାଙ୍କୁ ନ୍ୟାୟ ମଳିନଥିବାରୁ ଆଜି ସେ ପୁଣି ଥରେ ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟକୁ ଆସିଥିଲେ ।
ଯଦି ପୁଲିସ ଅଭିଯୁକ୍ତଙ୍କୁ ଗିରଫ ନକରେ ଓ ତାଙ୍କୁ ନ୍ୟାୟ ନମିଳେ ତେବେ ସେ ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟ ସମ୍ମୁଖରେ ଆତ୍ମାହୁତି ଦେବେ ବୋଲି ତପସ୍ମିନୀ କହିଛନ୍ତି । ଏହି ମାମଲାରେ ବୋଲଗଡ଼ ଥାନା ଅଧିକାରୀ କିମ୍ବା ଆରକ୍ଷୀ ଅଧୀକ୍ଷକଙ୍କ ପ୍ରତିକ୍ରିୟା ମିଳିପାରିନାହିଁ ।