ଭୁବନେଶ୍ୱରରେ ମା’ ଓ ଝିଅଙ୍କୁ ଆକ୍ରମଣ କରିବା ଘଟଣାର ଖୁଲାସା କଲେ ଭୁବନେଶ୍ୱର ଡିସିପି

ଭୁବନେଶ୍ୱର: ଭୁବନେଶ୍ୱରରେ ମା’ ଓ ଝିଅଙ୍କୁ ଆକ୍ରମଣ କରିବା ଘଟଣା । ପ୍ରେସମିଟରେ ପୂରା ଘଟଣାର ଖୁଲାସା କଲେ ଭୁବନେଶ୍ୱର ଡିସିପି । ଏହି ଘଟଣାରେ ଦୁଇ ଜଣଙ୍କୁ ଗିରଫ କରାଯାଇଛି । ଦୁଇଜଣ ହେଲେ ବୈଦୁତିକ ଗଣମାଧ୍ୟମରେ କାମ କରୁଥିବା ରୂପେଶ ପଣ୍ଡା ଓ ସଞ୍ଜୟ ପଣ୍ଡା । ୨ ଅଭିଯୁକ୍ତ ଲୁଟ୍ କରିବା ପାଇଁ ଷଡଯନ୍ତ୍ର କରିଥିଲେ । ଘର ଋଣରେ ଥିବାରୁ ଲୁଟ୍ ଉଦ୍ୟମ କରିଥିଲେ । ଛୁରୀ, ଖେଳନା ବନ୍ଧୁକ, ପ୍ଲାଷ୍ଟିକ୍ ଦଉଡି ସବୁ ଜବତ କରାଯାଇଛି । ଚିହ୍ନା ନପଡିବା ପାଇଁ ଝିଅ ବେଶରେ ଲୁଟ୍ କରିଥିଲେ । ୨ଜଣ ଅଭିଯୁକ୍ତ ଏହି ଯୋଜନା କରିଥିଲେ । ନୟାପଲ୍ଲୀ ଥାନା ଅଞ୍ଚଳରୁ ସଞ୍ଜୟକୁ ଗିରଫ କରାଯାଇଥିଲା । ଘଟଣାର ତଦନ୍ତ ଚାଲିଛି, ପୁଙ୍ଖାନୁପୁଙ୍ଖ ତଦନ୍ତ କରାଯାଉଛି ।

ଦୁଇ ଦିନ ହସ୍ପିଟାଲରେ ଚିକିତ୍ସିତ ହେବା ପରେ ରୂପେଶ ସୁସ୍ଥ ହୋଇଛି ବୋଲି ହସ୍ପିଟାଲ ପକ୍ଷରୁ ପୁଲିସକୁ ସୂଚନା ଦିଆଯାଇଥିଲା । ତେଣୁ ଏହି ମାମଲାର ତଦନ୍ତ କରୁଥିବା ଟିମ୍‌ ଆଜି ରୂପେଶକୁ ହସ୍ପିଟାଲରୁ ସିଧା ଥାନାକୁ ନେଇଥିଲା । ପଚରାଉଚରା ବେଳେ ପୁଣି ମନଗଢ଼ା କାହାଣୀ ଶୁଣାଇଲା ରୂପେଶ। ଏମିତିକି ଘଟଣା ଦିନ ଯେମିତି କହିଥିଲା, ଆହୁରି ଅଧିକ ବନେଇଚୁନେଇ କହିଥିଲା । ଅଫିସ ଯିବା ବାଟରେ ତା’କୁ ଦୁର୍ବୃତ୍ତମାନେ ଅପହରଣ କରି ମ୍ୟାକ୍ସି ପିନ୍ଧାଇଲେ ଓ ପ୍ରଫେସର ମିଶ୍ରାଙ୍କ ଘରେ ପଶି ଆକ୍ରମଣ କରିବାକୁ ନିର୍ଦ୍ଦେଶ ଦେଲେ । ନ ହେଲେ ତାକୁ ହତ୍ୟା କରିବେ ବୋଲି ଅପହରଣକାରୀମାନେ ଧମକ ଦେଲେ । ସେଦିନର ଏହି କାହାଣୀକୁ ପୁଣି ଆଜି ବଡ଼ ସୁନ୍ଦର ଭାବେ ରୂପେଶ ବର୍ଣ୍ଣନା କରିଥିଲା ।

ସୂଚନାଯୋଗ୍ୟ, ଶୈଳଶ୍ରୀବିହାର ଭିଆଇଏମ୍‌ କଲୋନିରେ ରହୁଥିବା ଅବସରପ୍ରାପ୍ତ ପ୍ରଫେସର ସୁରେଶ ମିଶ୍ରା ଘରେ ନଥିବା ବେଳେ ହଠାତ୍ ରୂପେଶ ମ୍ୟାକ୍ସି ପିନ୍ଧି ତାଙ୍କ ଘରେ ପଶିଥିଲା । ମୁଣ୍ଡରେ ହେଲ୍‌ମେଟ୍‌ ଥିବାରୁ ପ୍ରଫେସର ମିଶ୍ରାଙ୍କ ସ୍ତ୍ରୀ ଓ ଝିଅ ରୂପେଶକୁ ଚିହ୍ନି ପାରିନଥିଲେ । ସେମାନେ କବାଟ ଖୋଲିବା ମାତ୍ରେ ରୂପେଶ ଏକ ଖେଳଣା ବନ୍ଧୁକ ଓ ଛୁରି ଦେଖାଇ ମା’ ଝିଅଙ୍କୁ ରଶିରେ ବାନ୍ଧିବାକୁ ଉଦ୍ୟମ କରିଥିଲା । ମାତ୍ର ସାହସ ଜୁଟାଇ ମା’, ଝିଅ ରୂପେଶକୁ ପାଲଟା ଆକ୍ରମଣ କରିଥିଲେ। ଧସ୍ତା‌ଧସ୍ତିରେ ଉଭୟ ପକ୍ଷ ଆହତ ହୋଇଥିଲେ। ପାଟି ଶୁଣି ସ୍ଥାନୀୟ ଲୋକେ ସେଠାରେ ପହଞ୍ଚିଯିବା ପରେ ମ୍ୟାକ୍ସି ପିନ୍ଧା ଲୋକଟି ରୂପେଶ ବୋଲି ଜଣା ପଡ଼ିଥିଲା ।