ରାଜଧାନୀରେ ପୁଣି ଆତଙ୍କରାଜ : ଛାତ୍ରଙ୍କୁ ଗୋଡ଼େଇ ଗୋଡ଼େଇ ହାଣିଲେ
ବିଚ୍ ରାସ୍ତାରେ ହାଇୱା ଚାଳକଙ୍କୁ ଆକ୍ରମଣ
ଭୁବନେଶ୍ବର, : ଅସୁରକ୍ଷିତ ହୋଇଗଲାଣି ରାଜଧାନୀ। ଭୁବନେଶ୍ବରର ଜନଗହଳିପୂର୍ଣ୍ଣ ସ୍ଥାନ ନୂଆପଲ୍ଲୀ ଓ କଟକ ରୋଡ୍ରେ ଦୁର୍ବୃତ୍ତମାନେ ଆତଙ୍କ ଖେଳାଇଛନ୍ତି। ଦୁଇଜଣ ଦୁର୍ବୃତ୍ତ ପଟିଆ ଅଞ୍ଚଳର ଜଣେ ନାବାଳକୁ ଗୋଡ଼େଇ ଗୋଡ଼େଇ ହାଣି ଲହୁଲୁହାଣ କରିଥିବା ବେଳେ ୭ଜଣ ଦୁର୍ବୃତ୍ତ ସଂଘବଦ୍ଧ ଭାବେ କଟକ ରୋଡ୍ରେ ଜଣେ ହାଇୱା ଚାଳକଙ୍କୁ ନିସ୍ତୁକ ମାଡ଼ ମାରିଛନ୍ତି। ଏପରିକି ଚାଳକଙ୍କୁ ମାଡ଼ ମାରିବାର ଦୃଶ୍ୟ ଜଣେ ଯୁବକ ଉତ୍ତୋଳନ କରୁଥିବାରୁ ତାଙ୍କୁ ମଧ୍ୟ ଛାଡ଼ିନାହାନ୍ତି ଦୁର୍ବୃତ୍ତ।
Sambad is now on WhatsApp
Join and get latest news updates delivered to you via WhatsApp
ସାମାନ୍ୟ ବଚସାକୁ କେନ୍ଦ୍ର କରି ଆଜି ରାତିରେ ନୂଆପଲ୍ଲୀ ଥାନା ଏନ୍-୩ ଅଞ୍ଚଳରେ ଜଣେ ଛାତ୍ରଙ୍କୁ ଗୋଡ଼େଇ ଗୋଡ଼େଇ ହାଣିଛନ୍ତି ଦୁଇ ଯୁବକ। ସେ ହେଲେ, ପଟିଆ ଅଞ୍ଚଳର ଅନନ୍ତ ମହାନ୍ତି(୧୭)। ସ୍ଥାନୀୟ ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଏକ ଘରୋଇ ହସ୍ପିଟାଲରେ ଭର୍ତ୍ତି କରାଇଛନ୍ତି। ତାଙ୍କର ପିଠି, ଗୋଡ଼ ଓ ମୁଣ୍ଡରେ ଗଭୀର କ୍ଷତ ସୃଷ୍ଟି ହୋଇଛି। ଏ ସଂପର୍କରେ ନୂଆପଲ୍ଲୀ ପୁଲିସ ଏକ ମାମଲା ରୁଜୁ କରି ଅନୁସନ୍ଧାନ ଚଳାଇଛି। ମିଳିଥିବା ସୂଚନା ଅନୁଯାୟୀ, ଅନନ୍ତ ନୂଆପଲ୍ଲୀକୁ ଟ୍ୟୁସନ୍ ଆସିଥିଲେ। ନୂଆପଲ୍ଲୀ ଏନ୍-୩ ଶନିମନ୍ଦିର ପାଖରେ ଦୁଇ ଯୁବକ ରାସ୍ତା ପାର୍ଶ୍ବରେ ବସି ଗାଳିମନ୍ଦ କରୁଥିଲେ। ସେହି ବାଟ ଦେଇଯାଉଥିବା ଅନନ୍ତ ଭାବିଲେ, ଯୁବକମାନେ ତାଙ୍କୁ ଗାଳି କରୁଛନ୍ତି। ଏ ସମ୍ପର୍କରେ ଦୁଇ ଯୁବକଙ୍କୁ ସେ ପଚାରିବାରୁ ସେମାନଙ୍କ ମଧ୍ୟରେ ପ୍ରବଳ ପାଟିତୁଣ୍ଡ ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ଦୁଇ ଯୁବକ ବିଚ୍ ରାସ୍ତାରେ ତାଙ୍କୁ ଗୋଡ଼େଇ ଗୋଡ଼େଇ ଖଣ୍ଡା, ଭୁଜାଲିରେ ଆକ୍ରମଣ କରିଥିଲେ। ଅନନ୍ତ ତଳେ ପଡ଼ିଯିବା ପରେ ଦୁର୍ବୃତ୍ତଦ୍ବୟ ଘଟଣାସ୍ଥଳରୁ ଫେରାର୍ ହୋଇଯାଇଥିଲେ। ଏହାକୁ ନେଇ ସ୍ଥାନୀୟ ଅଞ୍ଚଳରେ କିଛି ସମୟ ଲାଗି ଉତ୍ତେଜନା ଦେଖା ଯାଇଥିଲା। ଆକ୍ରମଣ କରିଥିବା ଦୁଇ ଯୁବକଙ୍କ ନାଁରେ ପୂର୍ବରୁ ଏକାଧିକ ମାମଲା ଥିବା ପୁଲିସ ସୂତ୍ରରୁ ଜଣାପଡ଼ିଛି। ସେମାନଙ୍କୁ ଧରିବା ଲାଗି ପୁଲିସ ବିଭିନ୍ନ ସ୍ଥାନରେ ରାତି ଅଧିଆ ଚଢ଼ଉ କରୁଥିବା ଜଣାଯାଇଛି।
ସେହିପରି ଅନ୍ୟ ଏକ ଘଟଣାକ୍ରମେ ରାତି ପ୍ରାୟ ସାଢ଼େ ୧୧ଟା ବେଳେ ଜଣେ ହାଇୱା ଚାଳକ ସଂଘବଦ୍ଧ ଆକ୍ରମଣର ଶିକାର ହୋଇଛନ୍ତି। ୭ଜଣ ଦୁର୍ବୃତ୍ତ ତାଙ୍କୁ ନିସ୍ତୁକ ମାଡ଼ ମାରିବା ସହ ହାଇୱାର କାଚ ବାଡ଼େଇ ଭାଙ୍ଗି ଦେଇଛନ୍ତି। ହାଇୱାଟି ଲକ୍ଷ୍ମୀସାଗରରୁ କଳ୍ପନା ଆଡ଼କୁ ଯାଉଥିଲା। ଏହି ସମୟରେ ଏକ ସ୍କୁଟିରେ ୩ଜଣ ଯୁବକ ହଠାତ୍ ଚିନ୍ତାମଣିଶ୍ବର ଛକ ନିକଟରୁ ବାହାରି ଆସିଲେ। ଏହା ଦେଖି ହାଇୱାର ଚାଳକ ଘାବରାଇ ଯାଇଥିଲେ। କିନ୍ତୁ ଗାଡ଼ି ଉପରେ ନିୟନ୍ତ୍ରଣ ରଖି ନିଶ୍ଚିତ ଦୁର୍ଘଟଣାରୁ ଯୁବକମାନଙ୍କୁ ବଞ୍ଚାଇ ଦେଇଥିଲେ। ତେବେ ଏଥିରେ ରାଗିଯାଇ ଯୁବକମାନେ ହାଇୱାର ପିଛା କରିବା ସହ କିଛି ଦୂରରେ ଅଟକାଇଥିଲେ। ସେମାନେ ମୋବାଇଲ୍ରେ ନିଜର ଆଉ ୪ଜଣ ସହଯୋଗୀଙ୍କୁ ଘଟଣାସ୍ଥଳକୁ ଡାକିଥିଲେ। ଏହାପରେ ଦୁର୍ବୃତ୍ତମାନେ ହାଇୱା କ୍ୟାବିନ୍ ଭିତରକୁ ଚଢ଼ି ଯାଇ ଚାଳକଙ୍କୁ ନିସ୍ତୁକ ମାଡ଼ ମାରିଥିଲେ। ଉପସ୍ଥିତ ଲୋକ ଏହି ଘଟଣାକୁ ଦେଖୁଥିଲେ ହେଁ ଯୁବକମାନଙ୍କୁ ପ୍ରତିରୋଧ କରିବା ପାଇଁ ସାହସ ଜୁଟାଇ ପାରିନଥିଲେ। ତେବେ ସେମାନଙ୍କ ମଧ୍ୟରୁ ଜଣେ ଯୁବକ ଏହି ପୂରା ଘଟଣାର ଭିଡିଓ ମୋବାଇଲ୍ରେ ଉତ୍ତୋଳନ କରୁଥିବାରୁ ସେ ମଧ୍ୟ ଦୁର୍ବୃତ୍ତଙ୍କ ଆକ୍ରମଣର ଶିକାର ହୋଇଥିଲେ। ଯୁବକମାନେ ତାଙ୍କୁ ମଧ୍ୟ ନିସ୍ତୁକ ମାଡ଼ ମାରିଥିଲେ। ଏହା ଦେଖି ସେଠାରେ ଥିବା ଅନ୍ୟ ଲୋକମାନେ ଛତ୍ରଭଙ୍ଗ ଦେଇଥିଲେ। ଦୁର୍ବୃତ୍ତମାନେ ଏମିତି ୩୫ ମିନିଟ୍ କାଳ ସେଠାରେ ଆତଙ୍କ ଖେଳାଇବା ପରେ ଉଭାନ୍ ହୋଇଯାଇଥିଲେ।