ବଗଳା ଧର୍ମଶାଳା ଜମି କାହାରିକୁ ବିକ୍ରି କରାଯାଇନାହିଁ, କେବଳ ୧୨% ଜମିରେ ବିସ୍ଥାପିତଙ୍କୁ ଥଇଥାନ କରାଯାଇଛି : ପୁରୀ ଜିଲ୍ଲା ପ୍ରଶାସନର ସ୍ପଷ୍ଟୀକରଣ
ଭୁବନେଶ୍ୱର : ବଗଳା ଧର୍ମଶାଳା ଜମି ବିକ୍ରି ସଂପର୍କରେ ପୁରୀ ଜିଲ୍ଲା ପ୍ରଶାସନ ପକ୍ଷରୁ ସ୍ପଷ୍ଟୀକରଣ ଜାରି କୁହାଯାଇଛି ଯେ ଏହି ଜମି ବିକ୍ରି କରାଯାଇଥିବା କଥା ସତ୍ୟତା ଉପରେ ଆଧାରିତ ନୁହେଁ । ଏହି ଜମି କାହାରିକୁ ବିକ୍ରି କରାଯାଇନାହିଁ । ଏହି ଧର୍ମଶାଳାର ମାତ୍ର ୧୨ ପ୍ରତିଶତ ଅଞ୍ଚଳ ସେବାୟତ ଓ ମନ୍ଦିର ପରିସର ପାଇଁ ଜମିଛାଡ଼ିଥିବା ଲୋକମାନଙ୍କ ଥଇଥାନ ପାଇଁ ଆବଣ୍ଟନ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରଶାସନ ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ ବଗଳା ଧର୍ମଶାଳା ପରିସରରେ ଯେଉଁମାନଙ୍କୁ ଥଇଥାନ କରାଯାଇଛି, ସେମାନେ ମୁଖ୍ୟତଃ ଭିତର ସେବାୟତ ନିଯୋଗର ଅନ୍ତର୍ଭୁକ୍ତ ଓ ସେମାନେ ଗତ ଅନେକ ବର୍ଷ ଧରି ମନ୍ଦିର ନିକଟରେ ରହୁଥିଲେ । ମହାପ୍ରଭୁଙ୍କ ପ୍ରତି ଭକ୍ତି ଓ ସରକାରଙ୍କ ଅନୁରୋଧ କ୍ରମେ ସେମାନେ ନିଜର ଏହି ଭିଟାମାଟି ମନ୍ଦିର କରିଡର ପ୍ରକଳ୍ପ ପାଇଁ ଛାଡ଼ିଦେଇଥିଲେ ।
ବିସ୍ଥାପିତ ପରିବାରଗୁଡ଼ିକୁ ସରକାରଙ୍କ ଅନୁମୋଦିତ ଥଇଥାନ ପ୍ୟାକେଜ ଅନୁସାରେ ରାଜସ୍ୱ ଜମିରେ ଥଇଥାନ କରାଯାଇଛି ।
ପ୍ରଶାସନ ପକ୍ଷରୁ କୁହାଯାଇଛି ଯେ ବଗଳା ଧର୍ମଶାଳାରେ ମାତ୍ର ୨୦୦ ଲୋକ ରହିବା ପାଇଁ ବ୍ୟବସ୍ଥା ଥିଲା । କିନ୍ତୁ ଗରିବ ତୀର୍ଥଯାତ୍ରୀଙ୍କ ପାଇଁ ସରକାର ଏବେ ୨୦୦୦ ଲୋକ ରହିବା ପରି ଲଜ/ଧର୍ମଶାଳା ନିର୍ମାଣ କରୁଛନ୍ତି । ଆଗକୁ ଆହାରି ୮୦୦୦ ଲୋକ ରହିବା ପାଇଁ ବ୍ୟବସ୍ଥା କରାଯିବ । ଏଣୁ ସରକାର ବଗଳା ଧର୍ମଶାଳା କ୍ଷମତାକୁ ୫୦ ଗୁଣ ବୃଦ୍ଧି କରୁଛନ୍ତି ।
ଏଣୁ ଶ୍ରୀମନ୍ଦିର ପାଇଁ ତ୍ୟାଗ କରିଥିବା ସେବାୟତମାନଙ୍କୁ ଆମେ କୃତଜ୍ଞତା ପ୍ରଦର୍ଶନ କରିବା ଉଚିତ ବୋଲି ଏଥିରେ କୁହାଯାଇଛି ।