ବାଲେଶ୍ବର ଛାତ୍ରୀ ଆତ୍ମାହୁତି: ରାଜନେତା ରାସ୍ତାରେ, ପୁଲିସ-ବିଜେଡି ମୁହଁାମୁହିଁ

ଭୁବନେଶ୍ୱର: ଫକୀରମୋହନ ସ୍ବୟଂଶାସିତ ମହାବିଦ୍ୟାଳୟ ଛାତ୍ରୀ ମୃତ୍ୟୁକୁ ନେଇ ବିଜେଡି ଆନ୍ଦୋଳନକୁ ଜୋର୍‌ଦାର କରିଛି। ମୃତ ଛାତ୍ରୀଙ୍କୁ ନ୍ୟାୟ ପ୍ରଦାନ ଦାବିରେ ଦଳ ଆଜି ଲୋକସେବା ଭବନ ଘେରାଉ କରିବା ସମୟରେ ଲୋୟର ପିଏମ୍‌ଜି ରଣକ୍ଷେତ୍ର ପାଲଟିଥିଲା। ପୁଲିସ-ବିଜେଡି ନେତାମାନେ ମୁହାଁମୁହିଁ ହୋଇଥିଲେ। ସ୍ଥିତି ଏମିତି ହୋଇଥିଲା ଯେ ବିଜେଡି କର୍ମୀଙ୍କ ଉପରକୁ ପୁଲିସ ପାଣି ସହ ଲୁହବୁହା ଗ୍ୟାସ୍‌, ରବର ବୁଲେଟ୍‌ ମାଡ଼ କରିଥିଲା। ଯେଉଁଥିରେ ବିଜେଡି ନେତା ପ୍ରଣବପ୍ରକାଶ ଦାସ, ପ୍ରୀତିରଞ୍ଜନ ଘଡ଼ାଇ, ସାଂସଦ ସୁଲତା ଦେଓ ଆହତ ହୋଇଛନ୍ତି। ତିନିଜଣ ଯାକ ‌ରାଜଧାନୀର ବିଭିନ୍ନ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। 

ସେହିପରି ଛବି ମାହାଲି, ନୀଳମାଧବ ମହାନ୍ତି, ସଙ୍କେତ ରାୟଙ୍କ ସମେତ ଶତାଧିକ ବିଜେଡି କର୍ମୀ ମଧ୍ୟ ଆହତ ହୋଇ ମେଡିକାଲରେ ଚିକିତ୍ସାଧୀନ ରହିଥିବା ଜଣାପଡ଼ିଛି। ଅପରପକ୍ଷରେ ଆନ୍ଦୋଳନ ସମୟରେ ପାଞ୍ଚ ଜଣ ପୁଲିସ ଆହତ ହୋଇ କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଖବର ସଂଗ୍ରହ କରୁଥିଲା ବେଳେ ଦୁଇ ଜଣ ସାମ୍ବାଦିକ ବି ଆହତ ହୋଇଛନ୍ତି। ବିଜେଡିର ଲୋକସେବା ଭବନ ଘେରାଉ ଡାକରା ପରେ ଆଜି ହଜାର ହଜାର କର୍ମୀ ସକାଳ ୯ଟା ବେଳକୁ ମାଷ୍ଟରକ୍ୟାଣ୍ଟିନ୍‌ ଛକରେ ଏକାଠି ହୋଇଥିଲେ। ସାରା ରାଜ୍ୟରୁ ବିଜେଡି କର୍ମୀମାନେ ବସ୍‌, ଟ୍ରେନ୍‌, କାର୍‌ ଯୋଗେ ପହଞ୍ଚିବା ପରେ ପୂର୍ବାହ୍ନରେ ବିଶାଳ ଶୋଭାଯାତ୍ରା ଆରମ୍ଭ ହୋଇଥିଲା। ବରିଷ୍ଠ ନେତାମାନଙ୍କ ନେତୃତ୍ବରେ କର୍ମୀମାନେ ଆଗକୁ ଯାଉଥିବା ବେଳେ ସେମାନଙ୍କୁ ଅଟକାଇବାକୁ ପୁଲିସ ମଧ୍ୟ ବ୍ୟାପକ ପ୍ରସ୍ତୁତି କରିଥିଲା। ପୂର୍ବରୁ ତିନିଟି ବାରିକେଡ୍‌ କରୁଥିବା ପୁଲିସ ଆଜି ୫ଟି ବାରିକେଡ୍‌ କରି ଆନ୍ଦୋଳନକାରୀଙ୍କୁ ଅଟକାଇବାକୁ ପ୍ରୟାସ କରିଥିଲା। ତେବେ ସେମାନେ ପ୍ରଥମ ବାରିକେଡ୍‌ ଭାଙ୍ଗି ଦେଇଥିଲେ। ଦ୍ବିତୀୟ ବାରିକେଡ୍‌ ଭାଙ୍ଗିବାକୁ ଉଦ୍ୟମ କରିବା ସମୟରେ ପୁଲିସର କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ବିନା ସୂଚନାରେ ପୁଲିସ ପକ୍ଷରୁ ପାଣି ମାଡ଼ ଆରମ୍ଭ ହୋଇଥିଲା। ପରେ ପରେ ଲୁହବୁହା ଗ୍ୟାସ୍‌ ଓ ରବର ବୁଲେଟ୍‌ ପ୍ରୟୋଗ କରାଯାଇଥିଲା। ଆନ୍ଦୋଳନକାରୀଙ୍କ ପକ୍ଷରୁ କୌଣସି ପ୍ରକାର ଅପ୍ରୀତିକର ପରିସ୍ଥିତି ସୃଷ୍ଟି କରାଯାଇ ନ ଥିବା ବେଳେ ପୁଲିସର ହଠାତ୍‌ ପାଣି ଓ ଗ୍ୟାସ୍‌ ମାଡ଼କୁ କେହି ବୁଝି ପାରି ନ ଥିଲେ। ଯେଉଁଥିରେ ବିଜେଡି ନେତା ଓ କର୍ମୀମାନେ ଆହତ ହୋଇଥିଲେ। ପୁଲିସ ବରିଷ୍ଠ ନେତା ଅରୁଣ ସାହୁ, ସଞ୍ଜୟ ଦାସବର୍ମା, ଅତନୁ ସବ୍ୟସାଚୀ ନାୟକ, ବ୍ୟୋମକେଶ ରାୟ, ଦେବୀରଞ୍ଜନ ତ୍ରିପାଠୀ ପ୍ରମୁଖଙ୍କୁ ଉଠାଇ ନେଇଥିଲା। ଉଭୟ ପକ୍ଷ ମଧ୍ୟରେ ପାଖାପାଖି ଏକ ଘଣ୍ଟା ଛକାପଞ୍ଝା ପରେ ଆନ୍ଦୋଳନକାରୀ ଛତ୍ରଭଙ୍ଗ ଦେଇଥିଲେ।