ରାୟଗଡ଼ା: ରାୟଗଡ଼ାର ଅଧିଷ୍ଠାତ୍ରୀ ଦେବୀ ମା’ ମଝିଘରିଆଣୀଙ୍କ ବାଲିଯାତ୍ରା ଆଜି ଉଦଯାପିତ ହୋଇଯାଇଛି। ୯ ଦିନ ଧରି ଚାଲିଥିବା ପୂଜାର ଉଦଯାପନୀ ଦିବସରେ ରୀତିନୀତି ଅନୁଯାୟୀ ମା’ଙ୍କ ସମସ୍ତ ନୀତି ଶେଷ ହେବା ପରେ ସଂଧ୍ୟାରେ ମୁଖ୍ୟ ପୂଜକ ମା’ଙ୍କ ପ୍ରତିମାକୁ ଧରି ନିଆଁରେ ଚାଲିବା ସହ କଣ୍ଟା ଦୋଳିରେ ଝୁଲିଥିଲେ। ବର୍ଷ ତମାମ ଭଲ ଫସଲ କାମନା କରି ମା’ଙ୍କ ନିକଟରେ ଏହି ପୂଜା କରାଯାଇଥାଏ।
Sambad is now on WhatsApp
Join and get latest news updates delivered to you via WhatsApp
ମା’ଙ୍କ ନବଦିନାତ୍ମକ ବାଲିଯାତ୍ରା ପାଇଁ ଭାଦ୍ରବ ଦ୍ବିତୀୟା ତିଥିରେ ନାଗାବଳୀ ନଦୀରୁ ବାଲି ସଂଗ୍ରହ କରାଯାଇଥାଏ। ବାଲି ସଂଗ୍ରହ ପରେ ମନ୍ଦିର ପାର୍ଶ୍ବରେ ଏହାକୁ ସ୍ଥାପନ କରାଯାଇ ନଅ ପ୍ରକାରର ବିହନ ବୁଣାଯାଇଥାଏ। ପଞ୍ଚମୀ ତିଥିରେ ମା’ଙ୍କ ଖଣ୍ଡା ପୂଜା ସହ ଦଶମୀ ତିଥିରେ ନବାନ୍ନ ଲାଗି ହୋଇଥାଏ। ଏହା ମଧ୍ୟରେ ପ୍ରତିଦିନ ଦୀପ, ଧୂପ, ଝୁଣା ଦେଇ ବିହନ ବୁଣାଯାଇଥିବା ସ୍ଥଳକୁ ପୂଜାର୍ଚନା କରାଯାଇଥାଏ। ବାଲିଯାତ୍ରା ସମାପନ ପୂର୍ବରୁ ପାଖାପାଖି ଅଢ଼େଇ ଫୁଟ ଉଚ୍ଚର ବିହନ ହେବା ପରେ ଶେଷ ଦିନରେ ଉକ୍ତ ବିହନକୁ ମା’ଙ୍କ ପାଖରେ ଲାଗି କରାଯିବାର ପରମ୍ପରା ରହିଛି। ପୂଜା ସମୟ ମଧ୍ୟରେ ବିହନ ଭଲ ହୋଇଥିଲେ ଚଳିତ ବର୍ଷର କୃଷି ନୀତି ନିର୍ଧାରଣ ସହ ଭଲ ଫସଲ ଆଶା କରାଯାଇଥାଏ ବୋଲି କହିଛନ୍ତି ମନ୍ଦିର ଟ୍ରଷ୍ଟି ରାଇସିଂ ବିଡ଼ିକା। କୋଭିଡ଼୍ କଟକଣା ପାଇଁ ମା’ଙ୍କ ବାଲିଯାତ୍ରାରେ ବେଶ୍ ସମାଗମ ହୋଇନଥିଲା। ସ୍ଥାନୀୟ ଅଞ୍ଚଳର କିଛି ଶ୍ରଦ୍ଧାଳୁଙ୍କ ସମେତ କେବଳ ପୂଜକ ପରିବାର ପୂଜାରେ ସାମିଲ୍ ହୋଇଥିଲେ। ଉଦଯାପନୀ ଦିବସରେ ନିଆଁରେ ଚାଲିବା ଓ କଣ୍ଟା ଦୋଳିରେ ଝୁଲିବା ଦୃଶ୍ୟକୁ ଦର୍ଶନ କରିବା ପାଇଁ ଅଳ୍ପ ସଂଖ୍ୟକ ଭକ୍ତଙ୍କ ସମାଗମ ହୋଇଥିଲା। ମା’ଙ୍କ ଯାତ୍ରା ଓ ସମସ୍ତ ରୀତିନୀତିକୁ ବରିଷ୍ଠ ପୂଜକ ଚନ୍ଦ୍ର ପୂଜାରୀ, ଚକ୍ର ପୂଜାରୀ, ତାରିଣୀ ପୂଜାରୀ, ରଜନୀକାନ୍ତ ପୂଜାରୀ, କେଦାର ପୂଜାରୀ, ରତ୍ନାକର ପୂଜାରୀ, ରବି ନାରାୟଣ ପୂଜାରୀ, କବିରାଜ ପୂଜାରୀ, ଲାଲୁ ପୂଜାରୀ, ମହେଶ ପୂଜାରୀ ପରିଚାଳନା କରିଥିଲେ।