ଜଗତସିଂହପୁର: ପାରାଦୀପରେ ଠାବ ହୋଇଛନ୍ତି ଏକ ବାଂଲାଦେଶୀ ପରିବାର। ସେମାନଙ୍କ ପାଖରେ କୌଣସି କାଗଜପତ୍ର ନ ଥିବା ବେଳେ ଗଳାବାଟ ଦେଇ ପାରାଦୀପରେ ପହଞ୍ଚିଥିବା ଲକ୍ ଥାନ ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଜଣେ ବ୍ୟକ୍ତି ସେମାନଙ୍କୁ ବସ୍ ଯୋଗେ ପାରାଦୀପ ଆଣି ଏଠାରେ ଭଡ଼ା ଘରେ ରଖିଥିବା ଜଣାପଡ଼ିଛି। ବାଂଲାଦେଶୀ ବୋଲି ସ୍ପଷ୍ଟ ହେବା ପରେ ଉପଜିଲ୍ଲାପାଳ, କୁଜଙ୍ଗ ତହସିଲଦାର ଲକ୍‌ ଥାନାରେ ପହଞ୍ଚି ସବିଶେଷ ତଥ୍ୟ ହାସଲ କରିଛନ୍ତି। ଏ ସମ୍ପର୍କରେ ସରକାରଙ୍କୁ ଅବଗତ କରାଯିବ ବୋଲି ଜଣାପଡ଼ିଛି। ସେହିପରି ଅଠରବାଙ୍କୀ ମେଡିକାଲର ଡାକ୍ତର ପହଞ୍ଚି ସେମାନଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରିଛନ୍ତି।

Advertisment

ମିଳିଥିବା ସୂଚନା ଅନୁସାରେ, ଧରାପଡ଼ିଥିବା ପରିବାର ଗତ କିଛିଦିନ ତଳେ ପାରାଦୀପ ଆସିଛନ୍ତି। ପରିବାରରେ ବାପା, ମା’, ଝିଅ ଓ ପୁଅ ରହିଛନ୍ତି। ଲକ୍ ଥାନା ଅନ୍ତର୍ଗତ ଜରଦାରୀପଡ଼ାରେ ଭଡ଼ା ଘରେ ଥିବା ବେଳେ ପୁଲିସ ଯାଞ୍ଚରେ ଧରାପଡ଼ିଥିଲେ। ପରେ ସେମାନଙ୍କୁ ଥାନାକୁ ଆଣି ପୁଲିସ ଟିମ୍ ପଚରାଉଚରା କରିଥିଲା। ପଚରାଉଚରା ସମୟରେ ଜଣାପଡ଼ିଥିଲା ଯେ ସେମାନେ ଜଳପଥରେ ସୁନ୍ଦରବନରେ ପହଞ୍ଚିଥିଲେ। ସେଠାରୁ କୋଲକାତା ଆସିଥିଲେ। ଜରଦାରୀପଡ଼ାର ଜଣେ ବ୍ୟକ୍ତିଙ୍କ ସହ କୋଲକାତା ବସ୍‌ଷ୍ଟାଣ୍ଡରେ ଏହି ବାଂଲାଦେଶୀ ପରିବାରର ଦେଖା ସାକ୍ଷାତ ହୋଇଥିଲା।  

ଅଟକ ରଖି ପୁଲିସର ଜେରା
ଜାଲ୍‌ କାଗଜପତ୍ରରେ ଅନେକ ପରିବାର ଆସିଥିବା ସନ୍ଦେହ

ସେମାନଙ୍କୁ ଓ ନାବାଳିକା ଝିଅକୁ ନିର୍ଯାତନା ଦିଆ ଯାଉଥିବାରୁ ପଳାଇ ଆସିଥିବା କହିଥିଲେ। ଜରଦାରୀପଡ଼ାର ବ୍ୟକ୍ତି ସେମାନଙ୍କୁ ପାରାଦୀପ ଆସିବା ପାଇଁ କହିବା ସହ ଏଠାରେ ରୋଜଗାର ବ୍ୟବସ୍ଥା କରାଇଦେବେ ବୋଲି ପ୍ରତିଶ୍ରୁତି ଦେଇଥିଲେ। ଜରାଦାରୀପଡ଼ାରେ ପହଞ୍ଚିବା ପରେ ଏକ ଭଡ଼ା ଘରେ ରହିଥିଲେ। କିନ୍ତୁ ଅନେକ କଥା ସନ୍ଦେହ ଭିତରକୁ ଆସିଛି। ଯେଉଁ ବ୍ୟକ୍ତି ବାଂଲାଦେଶୀ ପରିବାରକୁ ଏଠାକୁ ଆଣିଥିଲେ ସେ କେମିତି ସେମାନଙ୍କ ସମ୍ପର୍କରେ ଆସିଥିଲେ? ପୂର୍ବରୁ କୌଣସି ଯୋଗାଯୋଗ ରହିଥିଲା କି? କେବଳ ଏହି ଗୋଟିଏ ନା ଆହୁରି କିଛି ବାଂଲାଦେଶୀଙ୍କୁ ସେଠାରେ ଆଶ୍ରୟ ଦିଆଯାଇଛି? ଏମିତି ଅନେକ ପ୍ରଶ୍ନ ଏବେ ମୁଣ୍ଡ ଟେକିଛି। ପୁଲିସ ଏନେଇ ତଦନ୍ତ ଜାରି ରଖିଛି। ପରିବାରରେ ନାବାଳକ, ନାବାଳିକା ଥିବାରୁ ପୁଲିସ ସେମାନଙ୍କ ପରିଚୟ ଗୁପ୍ତ ରଖିଛି।

ଅନ୍ୟପକ୍ଷରେ ପାରାଦୀପକୁ ବାଂଲାଦେଶୀଙ୍କୁ ଅଣାଯିବା ପଛରେ ଏକାଧିକ ରୢାକେଟ୍ କାମ କରୁଛି। ପାରାଦୀପରେ ରହିବା ପରେ ଏଠାକାର ପରିଚୟପତ୍ର ବାହାର କରି ଦେଉଛନ୍ତି। ମାଛ ମାରିବା ସହ ବିଭିନ୍ନ କଳକାରଖାନାରେ କାମ କରୁଛନ୍ତି। ବାଂଲାଦେଶ ଅନୁପ୍ରବେଶକାରୀଙ୍କ ସଂଖ୍ୟା ଏହି କାରଣରୁ ପାରାଦୀପ ଅଞ୍ଚଳରେ ବଢ଼ି ଚାଲିଥିବା କୁହାଯାଉଛି। କେନ୍ଦ୍ରାପଡ଼ା ପରେ ଜଗତସିଂହପୁର ଜିଲ୍ଲାରେ ସର୍ବାଧିକ ବାଂଲାଦେଶୀ ଥିବା କୁହାଯାଉଛି।