ଝାରସୁଗୁଡ଼ା: ଝାରସୁଗୁଡ଼ା ଜିଲ୍ଲାରେ ବେଆଇନ ଭାବେ ଅନେକ ବାଂଲାଦେଶୀ ନାଗରିକ ରହୁଥିବା ଅଭିଯୋଗ ହୋଇ ଆସୁଥିଲା। ଗତ ୨ ଦିନ ହେଲା ସେମାନଙ୍କର ଚିହ୍ନଟ ପ୍ରକ୍ରିୟା ଆରମ୍ଭ ହୋଇଥିବାବେଳେ ୪୪୪ ଜଣ ସନ୍ଦିଗ୍ଧଙ୍କୁ ପୁଲିସ ଅଟକ ରଖି ପରିଚୟପତ୍ର ଯାଞ୍ଚ କରୁଛି। ତେବେ ଏହି ଘଟଣାରେ ଆଜି ତୃଣମୂଳ କଂଗ୍ରେସ (ଟିଏମ୍ସି) ସାଂସଦ ମହୁଆ ମୈତ୍ରଙ୍କ ଏକ ଭିଡିଓ ବାର୍ତ୍ତାକୁ ନେଇ ରାଜନୀତି ସରଗରମ ହୋଇଛି। ମହୁଆ ବିଜେଡି ଶାସନକୁ ପରୋକ୍ଷରେ ପ୍ରଶଂସା କରି ବିଜେପିକୁ ଟାର୍ଗେଟ୍ କରିଥିଲା ବେଳେ ତାହାର କଡ଼ା ଜବାବ ଦେଇଛନ୍ତି ବିଜେପି ବିଧାୟକ ଟଙ୍କଧର ତ୍ରିପାଠୀ।
ମହୁଆ ତାଙ୍କ ଭିଡିଓ ବାର୍ତ୍ତାରେ ତାଙ୍କ ନିର୍ବାଚନମଣ୍ଡଳୀ କୃଷ୍ଣନଗର ମିର୍ଜାପୁରର ୨୩ ଜଣ ଶ୍ରମିକଙ୍କୁ ବେଆଇନ ଭାବେ ଅଟକ ରଖାଯାଇଥିବା ଅଭିଯୋଗ କରିଛନ୍ତି। ସେ କହିଛନ୍ତି, ଅଟକ ରଖାଯାଇଥିବା ସମସ୍ତ ଶ୍ରମିକଙ୍କ ପାଖରେ ଠିକ୍ ପ୍ରମାଣପତ୍ର ଅଛି। ଭାରତବାସୀ ଦେଶର ସବୁ ରାଜ୍ୟକୁ ଯାଇପାରିବେ, ଏହା ତାଙ୍କର ଅଧିକାର। ଶ୍ରମିକଙ୍କୁ ଅଟକ ରଖି ହଇରାଣ କରିବା ଠିକ୍ ନୁହେଁ। ପୂର୍ବ ସରକାରରେ ଓଡ଼ିଶାରେ ଏମିତି ହେଉ ନଥିଲା। ଗତ ବର୍ଷକ ମଧ୍ୟରେ ଏମିତି ଘଟଣା ନିତିଦିନିଆ ହୋଇଗଲାଣି। ଉକ୍ତ ଶ୍ରମିକମାନଙ୍କୁ ତୁରନ୍ତ ମୁକ୍ତ କରିବା ପାଇଁ ସେ ମୁଖ୍ୟ ଶାସନ ସଚିବ ଓ ଡିଜିପିଙ୍କୁ ଅନୁରୋଧ କରିଛନ୍ତି। ମହୁଆ ଆହୁରି ଚେତାବନୀ ଦେଇଛନ୍ତି ଯେ ଓଡ଼ିଶାକୁ ୫୦% ପର୍ଯ୍ୟଟନ ରାଜସ୍ବ ବେଙ୍ଗଲରୁ ଯାଉଛି। ଯଦି ଆମ ଶ୍ରମିକଙ୍କୁ ଅଟକାଇବେ, ତେବେ ଆମ ପର୍ଯ୍ୟଟକ ଯିବେ ତ?
ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀ ସାମ୍ବାଦିକ ସମ୍ମିଳନୀ କରି ଟିଏମ୍ସି ସାଂସଦ ଶ୍ରୀମତୀ ମୈତ୍ରଙ୍କ ଉପରେ ବର୍ଷିଛନ୍ତି। ଭାରତ ଏକ ଧର୍ମଶାଳା ନୁହେଁ ଯେ, ଯିଏ ଯେମିତି ଆସିବେ ରହିବେ। ବେଆଇନ ଭାବେ ରହୁଥିବା ଲୋକଙ୍କ ଉପରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ। ଯାହା ପାଖରେ ଠିକ୍ ପ୍ରମାଣପତ୍ର ଥିବ, ତାଙ୍କୁ ଛଡ଼ାଯିବ। ମହୁଆ ପ୍ରଥମେ ସ୍ପଷ୍ଟ କରନ୍ତୁ ଯେ ସେ ରାଜ୍ୟବାସୀଙ୍କ ସହ ଅଛନ୍ତି ନା ବେଆଇନ ଭାବେ ରହୁଥିବା ବିଦେଶୀଙ୍କ ସହ ଅଛନ୍ତି। ସେଥିପାଇଁ ମହୁଆ ବିଜେଡି ନାମ ନେଇ ବାଂଲାଦେଶୀଙ୍କୁ ସମର୍ଥନ କରୁଛନ୍ତି। ବିଜେଡି ଯାହା କହିପାରୁନି, ତାଙ୍କର ନୂଆ ନୂଆ ବୋହୂଙ୍କ ମୁହଁରେ ତାହା କୁହାଉଛି ବୋଲି ବିଧାୟକ ଶ୍ରୀ ତ୍ରିପାଠୀ କଟାକ୍ଷ କରିଛନ୍ତି।
ଏହି ଘଟଣା ପରେ ଉତ୍ତରାଞ୍ଚଳ ପୁଲିସ ଆଇଜି ହିମାଂଶୁ ଲାଲ୍ ମଧ୍ୟ ତାଙ୍କ ‘ଏକ୍ସ’ ହ୍ୟାଣ୍ଡେଲରେ ଉତ୍ତର ରଖିଛନ୍ତି। ଜାତୀୟ ସ୍ବାର୍ଥ ଓ ସୁରକ୍ଷା ସହ ସାଲିସ କରାଯାଇ ପାରିବନି ବୋଲି ସେ ସ୍ପଷ୍ଟ କରିଛନ୍ତି। ଏହି ବ୍ୟକ୍ତିମାନଙ୍କୁ ଯେଉଁ ସ୍ଥାନରେ ଅଟକ ରଖାଯାଇଛି, ସେଠାରେ ପର୍ଯ୍ୟାପ୍ତ ଖାଦ୍ୟ, ପାଣି, ସ୍ବଚ୍ଛତା ଓ ଚିକିତ୍ସା ସୁବିଧା ଯୋଗାଇ ଦିଆଯାଉଛି। ଯାଞ୍ଚ ପ୍ରକ୍ରିୟା ବରିଷ୍ଠ ଅଧିକାରୀଙ୍କୁ ନେଇ ଗଠିତ ଏକ ଯୁଗ୍ମ ତଦନ୍ତକାରୀ ଟିମ୍ (ଜେଆଇଟି) ଦ୍ବାରା ଜାରି ରହିଛି। ଏହି ପ୍ରକ୍ରିୟାର ଉଦ୍ଦେଶ୍ୟ କୌଣସି ସମ୍ପ୍ରଦାୟ ବା ଅଞ୍ଚଳକୁ ଟାର୍ଗେଟ୍ କରିବା ନୁହେଁ। ଏହା ଆଇନ ଓ ଦେଶର ସୁରକ୍ଷାକୁ ସୁନିଶ୍ଚିତ କରିବ। ଯେଉଁ ବ୍ୟକ୍ତିଙ୍କ ନିକଟରେ ବୈଧ ଦସ୍ତାବିଜ୍ ରହିଛି ସେମାନେ ଫେରି ସାରିଲେଣି, ନଚେତ୍ ଫେରିବା ପ୍ରକ୍ରିୟାରେ ରହିଛନ୍ତି ବୋଲି ଶ୍ରୀ ଲାଲ୍ କହିଛନ୍ତି। ସବିଶେଷ ଖବର ଅନୁଯାୟୀ ଯାଞ୍ଚ ପରେ ଭାରତୀୟ ନାଗରିକ ବୋଲି ପ୍ରମାଣିତ ହୋଇଥିବା ୨୫ ଜଣଙ୍କୁ ମୁକ୍ତ କରାଯାଇଛି।
ଉଲ୍ଲେଖଯୋଗ୍ୟ, ଗତ ୭ ତାରିଖ ରାତିରୁ ଝାରସୁଗୁଡ଼ା ଜିଲ୍ଲାର ସମସ୍ତ ଥାନାଞ୍ଚଳରେ ରହୁଥିବା ସନ୍ଦିଗ୍ଧ ବାଂଲାଦେଶୀଙ୍କୁ ଚିହ୍ନଟ ପରେ ସେମାନଙ୍କୁ ଝାରସୁଗୁଡ଼ାର ବ୍ଲାକ୍ ଡାଇମଣ୍ଡ ଇଞ୍ଜିନିୟରିଂ କଲେଜ ଓ ବ୍ରଜରାଜନଗରର ସୁରଭି କଲ୍ୟାଣ ମଣ୍ଡପରେ ରଖାଯାଇଛି। ଯାଞ୍ଚ ପ୍ରକ୍ରିୟା ସମୟରେ ଅଟକ ଜଣେ ବ୍ୟକ୍ତି ଭିଡିଓ ବାର୍ତ୍ତା କରି ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ।
Advertisment

Sambad is now on WhatsApp
Join and get latest news updates delivered to you via WhatsApp