ମିଛ କହି ହିତାଧିକାରୀଙ୍କୁ ଭୁତାଉଛନ୍ତି ବ୍ୟାଙ୍କ କର୍ତ୍ତୃପକ୍ଷ
କେସିସିବି ରାଉତପଡ଼ା ଶାଖାରେ ହିତାଧିକାରୀଙ୍କ ଦେଢ଼ କୋଟି ହଡ଼ପ ମାମଲା
ଖୋର୍ଦ୍ଧା: ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ(କେସିସିବି)ର ରାଉତପଡ଼ା ଶାଖାରେ ୧୦୦ ହିତାଧିକାରୀଙ୍କ ଦେଢ଼ କୋଟି ଟଙ୍କା ବ୍ୟାଙ୍କର କର୍ମଚାରୀ ମିଳିମିଶି ହଡ଼ପ କରିଛନ୍ତି । ଏନେଇ ବ୍ୟାଙ୍କର କର୍ତ୍ତୃପକ୍ଷ ଦୋଷୀ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଓ ହିତାଧିକାରୀଙ୍କ ଟଙ୍କା ଫେରାଇବା ବଦଳରେ ମିଛ ତଥ୍ୟ ଦେଇ ଭୁତାଇବାକୁ ଚେଷ୍ଟା କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
୧୩ ତାରିଖରେ ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କର ସିଇଓ ଅନନ୍ତ ସାମଲ ଟଙ୍କା ହଡ଼ପ ମାମଲାର ଅଗ୍ରଗତି ସମ୍ପର୍କରେ ସୂଚନା ଦେଇ କହିଥିଲେ ଯେ, ବ୍ୟାଙ୍କର ଆଭ୍ୟନ୍ତରୀଣ ତଦନ୍ତରେ ତିନିଜଣ କର୍ମଚାରୀ ପ୍ରାଥମିକ ଭାବେ ଟଙ୍କା ହଡ଼ପ ଘଟଣାରେ ସମ୍ପୃକ୍ତ ଥିବା ଜଣାପଡ଼ିଥିଲା । ଏହାପରେ, ସେମାନଙ୍କ ସ୍ଥାୟୀ ବାସସ୍ଥାନ ଥିବା ଥାନାରେ ଏତଲା ଦିଆଯାଇଛି । ପୂର୍ବତନ ବ୍ୟାଙ୍କ ସହକାରୀ ବୁଦ୍ଧିରାମ ଦାସଙ୍କ ନାମରେ ବୋଲଗଡ଼ ଥାନାରେ, ପୂର୍ବତନ ସହକାରୀ ପରିଚାଳକ ଶାନ୍ତିଲତା ଓଝାଙ୍କ ନାମରେ ନୟାଗଡ଼ ରଣପୁର ଥାନାରେ, ବ୍ୟାଙ୍କ ସହାୟକ ପ୍ରସନ୍ନ ତୋଷଙ୍କ ବିରୋଧରେ ବେଗୁନିଆ ଥାନାରେ ଏତଲା ଦିଆଯାଇଛି । ଏହା ସହ ବ୍ୟାଙ୍କର ପ୍ରଶାସକ ତଥା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ରଙ୍କ ନିର୍ଦ୍ଦେଶକ୍ରମେ ରାଜ୍ୟ ଅର୍ଥନୈତିକ ଅପରାଧ ଶାଖାର ଆଇଜିଙ୍କୁ ଏହାର ତଦନ୍ତ କରିବାକୁ ଅନୁରୋଧ କରି ଚଳିତ ମାସ ୭ ତାରିଖରେ ଚିଠି ଲେଖାଯାଇଛି ।
ତେବେ ଏନେଇ ବେଗୁନିଆ ଓ ବୋଲଗଡ଼ ଥାନା ଅଧିକାରୀଙ୍କୁ ପଚାରିବାରେ ଜଣାଯାଇଛି ଯେ ବ୍ୟାଙ୍କ ପକ୍ଷରୁ କୌଣସି ଲିଖିତ ଏତଲା ଦିଆଯାଇନାହିଁ । କେବଳ ଇଓଡବ୍ଲୁକୁ ଲେଖାଯାଇଥିବା ଚିଠିର ନକଲ ସେମାନଙ୍କ ନିକଟକୁ ପୋଷ୍ଟାଲରେ ପଠାଯାଇଛି । ଏନେଇ ଏସଡିପିଓ ସୁଶୀଲ କୁମାର ମିଶ୍ର ମଧ୍ୟ କହିଛନ୍ତି ଯେ ଏନେଇ ଅର୍ଥନୈତିକ ଅପରାଧ ଶାଖାକୁ ତଦନ୍ତ ପାଇଁ ଲେଖାଯାଇଥିବା ସେ ଖବରକାଗଜରୁ ପଢ଼ି ଜାଣିଛନ୍ତି, କିନ୍ତୁ ବ୍ୟାଙ୍କ ପକ୍ଷରୁ କୌଣସି ଲିଖିତ ଏତଲା ଦିଆଯାଇନାହିଁ ।
ବ୍ୟାଙ୍କର କୋଟି କୋଟି ଟଙ୍କା ହଡ଼ପ ଘଟଣାର ଅଭିଯୋଗର ପ୍ରଥମ ଦିନରୁ ହିଁ ବ୍ୟାଙ୍କ କର୍ତ୍ତୃପକ୍ଷଙ୍କ ଭୂମିକା ସନ୍ଦେହହଜନକ ଥିଲା । ହଡ଼ପ ଅଭିଯୋଗର ତୁରନ୍ତ ପରେ ତଦନ୍ତ ନିର୍ଦ୍ଦେଶ ନାମକୁ ମାତ୍ର ଦିଆଯାଇଥିବା ବେଳେ ତଦନ୍ତ ୧ ମାସ ପରେ ଆରମ୍ଭ ହୋଇ ମାର୍ଚ୍ଚ ଶେଷ ସପ୍ତାହରେ ଦାଖଲ ହୋଇଥିଲା । ଏପରିକି ପ୍ରଥମ ପର୍ଯ୍ୟାୟରେ ବ୍ୟାଙ୍କ ସିଇଓ ଏହି ହଡ଼ପ ଘଟଣାରେ ଜଣେ ବୁଦ୍ଧିରାମ ଦାସ କେବଳ ସମ୍ପୃକ୍ତ ଥିବା କହିଥିବା ବେଳେ ଇଓଡବ୍ଲକୁ ଲେଖିଥିବା ଚିଠିରେ ତିନିଜଣଙ୍କ ନାମ ଦର୍ଶାଇଥିଲେ । କେବଳ ଏତିକି ନୁହେଁ ସିଇଓ ପ୍ରଥମେ ନିଜ ପ୍ରତିକ୍ରିୟାରେ ୧ କୋଟି ୧୯ ଲକ୍ଷ ଟଙ୍କା ହଡ଼ପ ହୋଇଥିବା ବେଳେ ଜିଲ୍ଲାପାଳ ଶ୍ରୀ ମହାପାତ୍ର ଏହା ୧ କୋଟି ୫୦ଲକ୍ଷ ଟଙ୍କାରୁ ଅଧିକ ବୋଲି ନିଜ ପ୍ରତିକ୍ରିୟାରେ କହିଛନ୍ତି । କେବଳ ବ୍ୟାଙ୍କର ରାଉତପଡ଼ା ଶାଖାର ଜାଲିଆତି ଓ ଅନ୍ୟ ସମବାୟ ସମିତିର କର୍ମଚାରୀଙ୍କ ପଦୋନ୍ନତି ଓ ନିଯୁକ୍ତିରେ ମଧ୍ୟ ବ୍ୟାପକ ଜାଲିଆତି ହୋଇଥିବା ଏବଂ ଏଥିରେ ଖୋଦ୍ ବ୍ୟାଙ୍କ ସିଇଓ ସମ୍ପୃକ୍ତ ଥିବା ନେଇ ଖୋର୍ଦ୍ଧା ବିଧାୟକ ଜ୍ୟୋତିରୀନ୍ଦ୍ର ନାଥ ମିତ୍ର ସମବାୟ ସଚିବ ଓ ମନ୍ତ୍ରୀଙ୍କୁ ପତ୍ର ଲେଖି ଜଣାଇଛନ୍ତି । ଏପରିସ୍ଥଳେ, ଦୋଷୀଙ୍କ ବିରୋଧରେ ଥାନାରେ ମାମଲା ନେଇ ମଧ୍ୟ ପୁଣି ଭୁଲ ସୂଚନା ଦେବା ବ୍ୟାଙ୍କ କର୍ତୃପକ୍ଷଙ୍କ ଭୂମିକା ପ୍ରତି ଅଧିକ ସନ୍ଦେହ ସୃଷ୍ଟି ହୋଇଛି ।
ରାଜ୍ୟ ସରକାର ଏହି ଘଟଣାକୁ ଗୁରୁତର ସହ ଗ୍ରହଣ କରି ଗରିବ ହିତାଧିକାରୀଙ୍କୁ ନ୍ୟାୟ ପ୍ରଦାନ କରିବାକୁ ସାଧାରଣରେ ଦାବି ହେଉଛି ।