ହଜାରେ ପାଇଁ ପାହାରେ: ଟଙ୍କା ନେବାକୁ ରୁଣ୍ଡ ହୋଇଥିବାବେଳେ ପହଞ୍ଚିଲା ପୁଲିସ, ବ୍ୟାଙ୍କ ଭୁଲିଗଲା ସାମାଜିକ ଦୂରତ୍ୱର କଥା
ଜୟପୁର: ହଜାରେ ଟଙ୍କା ନେବାକୁ ଆସିଲେ ପାହାରେ ଖାଇଲେ | କୋରାପୁଟ ଜିଲ୍ଲାର ଜୟପୁରସ୍ଥିତ ବ୍ୟାଙ୍କ ଅଫ ଇଣ୍ଡିଆ ସମ୍ମୁଖରେ ଆଜି ଏମିତି ଏକ ଦୃଶ୍ୟ ଦେଖିବାକୁ ମିଳିଛି | ମିଳିଥିବା ସୂଚନା ମୁତାବକ ଜୟପୁର ନିକଟସ୍ଥ ଫାମ୍ପୁନି, ବଡଜିଉନା, ଏକମ୍ବା ସମେତ ଅଧିକାଂଶ ଗ୍ରାମର ବହୁ ସଂଖ୍ୟାରେ ଆଦିବାସୀ ଲୋକ ସେମାନଙ୍କ ଜମାଖାତାରୁ ବ୍ୟାଙ୍କକୁ ଟଙ୍କା ଉଠାଇବାକୁ ଆସିଥିଲେ | ସେମାନଙ୍କ ଜନଧନ ଆକାଉଣ୍ଟରେ ହଜାରେ ଟଙ୍କା ଲେଖାଏଁ ଜମା ହୋଇଥିବାର ଶୁଣି ବହୁ ସଂଖ୍ୟାରେ ମହିଳାମାନେ ସହରର ମୁଖ୍ୟ ରାସ୍ତାରେ ଥିବା ବ୍ୟାଙ୍କ ଅଫ ଇଣ୍ଡିଆ ଶାଖାକୁ ଆସିଥିଲେ |
Sambad is now on WhatsApp
Join and get latest news updates delivered to you via WhatsApp
୨୦ କିଲୋମିଟର ଦୂରରୁ ଚାଲି ଚାଲି ମହିଳାମାନେ ଆସିଥିବା ବେଳେ ଶହ ଶହ ସଂଖ୍ୟାରେ ବ୍ୟାଙ୍କ ସାମ୍ନାରେ ରୁଣ୍ଡ ହୋଇଥିଲେ | ସାମାଜିକ ଦୂରତ୍ୱକୁ ନ ମାନି ଶହ ଶହ ସଂଖ୍ୟାରେ ମହିଳା ରୁଣ୍ଡ ହୋଇଥିବା ଜାଣି ପୁଲିସ ସେଠାରେ ପହଂଚି ମହିଳାଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି। ଲକଡାଉନ୍ ନିୟମ ମାନି ନଥିବା ଓ ସାମାଜିକ ଦୂରତା ବଜାୟ ରଖି ନଥିବାରୁ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା।
ତେବେ ସାମାଜିକ ଦୂରତ୍ୱ ରକ୍ଷା ପାଇଁ ବ୍ୟାଙ୍କ ପକ୍ଷରୁ କୌଣସି ବ୍ୟବସ୍ଥା କରାଯାଇ ନଥିବାବେଳେ ପୁଲିସ ପହଂଚି ନିରୀହ ଆଦିବାସୀ ମହିଳାମାନଙ୍କୁ ଘଉଡାଇଥିଲା | ତେବେ ପ୍ରଶାସନ ଓ ବ୍ୟାଙ୍କ ପକ୍ଷରୁ କୌଣସି ବ୍ୟବସ୍ଥା ନ କରାଯାଇ ମହିଳାଙ୍କ ଉପରେ ଏଭଳି କାର୍ଯ୍ୟାନୁଷ୍ଠାନକୁ ନେଇ ବୁଦ୍ଧିଜୀବୀ ପ୍ରଶ୍ନ ଉଠାଇଛନ୍ତି |