ବଡ ଖବର: ଲକଡାଉନବେଳେ ଖୋଲା ରହିବ ବ୍ୟାଙ୍କ
ଭୁବନେଶ୍ୱର/କଟକ: ଲକଡାଉନବେଳେ ଖୋଲା ରହିବ ବ୍ୟାଙ୍କ | କିନ୍ତୁ ବ୍ୟାଙ୍କର କର୍ମଚାରୀଙ୍କର ସଂଖ୍ୟା ୨୫ ପ୍ରତିଶତରୁ ଅଧିକ ହେବ ନାହିଁ | କଟକ ଭୁବନେଶ୍ୱର କମିଶନରେଟ ପୁଲିସ କମିଶନର ସୁଧାଂଶୁ ଷଡ଼ଙ୍ଗୀ ଏବାବଦରେ ସୂଚନା ଦେଇଛନ୍ତି | ଏଥିପାଇଁ ବ୍ୟାଙ୍କ କର୍ମଚାରୀମାନେ ବ୍ୟାଙ୍କକୁ ଯିବାବେଳେ ପରିଚୟ ପତ୍ର ସାଙ୍ଗକୁ ବ୍ୟାଙ୍କ ମ୍ୟାନେଜରଙ୍କ ଲିଖିତ ପତ୍ର (ଯେଉଁଥିରେ ୨୫ ପ୍ରତିଶତ କର୍ମଚାରୀ ତାଲିକାରେ ଆପଣଙ୍କ ନାମ ଥିବ) ପୁଲିସ କର୍ମଚାରୀଙ୍କୁ ଦେଖାଇବେ | ଏହା ବ୍ୟତୀତ ଯେଉଁମାନଙ୍କୁ ବ୍ୟାଙ୍କ ମ୍ୟାନେଜର ଡାକି ନାହାଁନ୍ତି ସେମାନେ ଆସିବେ ନାହିଁ | ଏହି ଅନୁମତି ପତ୍ର କେବଳ ଘରୁ ବ୍ୟାଙ୍କକୁ ଯିବା ପାଇଁ ଓ ବ୍ୟାଙ୍କରୁ ଘରକୁ ଯିବା ପାଇଁ ପ୍ରଯୁଜ୍ୟ ହେବ |
Sambad is now on WhatsApp
Join and get latest news updates delivered to you via WhatsApp
କମିଶନର ସ୍ପଷ୍ଟ କରିଛନ୍ତି ଯେ ବ୍ୟାଙ୍କ କର୍ମଚାରୀ ଏହାକୁ ବ୍ୟବହାର କରି ପନିପରିବା କିଣିବେ ନାହିଁ କି ବନ୍ଧୁ ସମ୍ପର୍କୀୟଙ୍କୁ ଭେଟିବେ ନାହିଁ | ସେହିପରି ଇନ୍ସ୍ୟୁରାନ୍ସ ଅଫିସ ସବୁ ବନ୍ଦ ରହିବ | ସେହିପରି ଆଇଟି କମ୍ପାନୀମାନେ କେବଳ ୧୦ ପ୍ରତିଶତ କର୍ମଚାରୀମାନଙ୍କୁ ଅଫିସକୁ ଡାକିପାରିବେ | ଅନ୍ୟ କର୍ମଚାରୀମାନେ ଘରୁ କାମ କରିପାରିବେ | ଯଦି କର୍ମଚାରୀଙ୍କ ଉଦ୍ଦିଷ୍ଟ ସଂଖ୍ୟାରୁ ଅଧିକ କର୍ମଚାରୀ ଆସନ୍ତି ତେବେ ଅନୁମତିକୁ ବିରୋଧ କରୁଛନ୍ତି ବୋଲି ଧରାଯିବ |
ଯେଉଁମାନେ ସରକାରୀ କର୍ମଚାରୀ ଅଛନ୍ତି ସେମାନେ ନିଜର ପରିଚୟ ପତ୍ର ବ୍ୟବହାର କରିବେ ଓ ଏକ ମୋବିଲାଇଜେସନ ଲେଟର ମଧ୍ୟ ଦେଖାଇବାକୁ ପଡିବ | ସେହିପରି ଭୁବନେଶ୍ୱର ସହର ବାହାରକୁ କେହି ଯିବେ ନାହିଁ କି ସହର ଭିତରକୁ କେହି ଆସିବେ ନାହିଁ | ଯଦି ଅତ୍ୟାବଶ୍ୟକ କାର୍ଯ୍ୟ ପାଇଁ ଆସୁଥାନ୍ତି ତେବେ ଆପଣଙ୍କୁ ପାସ ଆବଶ୍ୟକ | ଯିଏ ପାସ ଚାହିଁବେ ସେମାନେ ପୁଲିସ କଣ୍ଟ୍ରୋଲ ରୁମ ୧୦୦କୁ କଲ କରିପାରିବେ ଓ ଏସଏମଏସ ମାଧ୍ୟମରେ ପାସ ପାଇପାରିବେ |