ଥୁଆମୂଳ ରାମପୁର ଅଞ୍ଚଳରେ ବ୍ୟାଙ୍କ ସେବା ବାଧାପ୍ରାପ୍ତ, ବ୍ୟାଙ୍କ ସମସ୍ୟାର ସମାଧାନ ନେଇ ଜିଲ୍ଲାପାଳଙ୍କୁ ଦାବିପତ୍ର
ଭବାନୀପାଟଣା : କଳାହାଣ୍ଡି ଜିଲ୍ଲାର ଆଦିବାସୀ ଅଧ୍ୟୁଷିତ ଦୁର୍ଗମ ଥୁଆମୂଳ ରାମପୁର ବ୍ଳକରେ ୨୪ ଟି ପଞ୍ଚାୟତ ଥିବା ବେଳେ ମାତ୍ର ୨ ଟି ବ୍ୟାଙ୍କ ଅଛି । ସେଥି ମଧ୍ୟରୁ ଗୋଟିଏ ଗୁଣପୁର ଠାରେ ଉତ୍କଳ ଗ୍ରାମ୍ୟ ବ୍ୟାଙ୍କ ଥିବା ବେଳେ ଅନ୍ୟଟି ଥୁଆମୂଳ ରାମପୁର ଠାରେ ଷ୍ଟେଟବ୍ୟାଙ୍କ ଅଛି । ବର୍ତ୍ତମାନ ସରକାରଙ୍କ ବିଭିନ୍ନ ଉନ୍ନୟନମୂଳକ କାର୍ଯ୍ୟର ପ୍ରାପ୍ୟ ଶ୍ରମିକ ଏବଂ ଉପଭୋକ୍ତାଙ୍କ ବ୍ୟାଙ୍କ ଆକାଉଣ୍ଟକୁ ସିଧାସଳଖ ପ୍ରଦାନ କରାଯାଉଛି । ଆଗକୁ ସରକାର ବୃଦ୍ଧା, ବିଧବା ଏବଂ ଭିନ୍ନକ୍ଷମ ହିତାଧିକାରୀଙ୍କ ଭତ୍ତା ମଧ୍ୟ ସିଧାସଳଖ ତାଙ୍କ ବ୍ୟାଙ୍କ ଖାତାକୁ ଦେବାକୁ ଯୋଜନା କରିଛନ୍ତି । ହେଲେ ଥୁଆମୂଳ ରାମପୁର ଠାରେ ଥିବା ୨ଟି ବ୍ୟାଙ୍କ ଅଞ୍ଚଳବାସୀ ବା ଖାତାଧାରୀଙ୍କୁ ଉଚିତ ସେବା ଯୋଗାଇ ଦେଉନଥିବା ଅଭିଯୋଗ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଏହି ବ୍ୟାଙ୍କମାନଙ୍କରେ ଲୋକେ ଟଙ୍କା ଉଠାଣ ପାଇଁ ରାତି ୩ଟା ସମୟରୁ ଆସି ଟୋକନ କରିବାକୁ ପଡୁଛି । ଖାତାଦାରଙ୍କ ଜରୁରୀ ଥିବା ବେଳେ ଚାହିଁଲେ ମଧ୍ୟ ୨୦ ହଜାର ଟଙ୍କା ଉଠାଇ ପାରୁନାହାନ୍ତି । ସେହିଭଳି ଲୋକେ ରାତି ୩ ଟାରୁ ୫୦/୬୦ କିଲୋମିଟର ଦୂରରୁ ଆସି ମଧ୍ୟ ଟୋକନ ନ ପାଇ ଫେରି ଯାଉଥିବା ଅଭିଯୋଗ ହୋଇଛି । ତେଣୁ ଥୁଆମୂଳ ରାମପୁର ବ୍ଲକର ଡୁମେରପଦର, ଗୋପୀନାଥ ପୁର, ଗୁଣପୁର ଠାରେ ଏଟିଏମ ସ୍ଥାପନ କରିବା ସହ ବ୍ଲକ ମୁଖ୍ୟାଳୟ ଠାରେ ଅନ୍ୟ ଏକ ଜାତୀୟକରଣ ବ୍ୟାଙ୍କ ଖୋଲିବା ପାଇଁ ଆଜି କଳାହାଣ୍ଡି ଜିଲ୍ଲାପାଳଙ୍କୁ ଦାବୀପତ୍ର ପ୍ରଦାନ କରାଯାଇଥିଲା । ଏହି ପ୍ରତିନିଧି ଦଳରେ ଜିଲ୍ଲାପରିଷଦ ସଦସ୍ୟ ମୂରଲୀଧର ନାଏକ, ସମିତିସଭ୍ୟ ମନୋରଞ୍ଜନ ନାଏକ, ପୂର୍ବ ବ୍ଲକ ଅଧ୍ୟକ୍ଷା ଦ୍ରୌପଦୀ ମାଝୀ, ଆଦିବାସୀ ସଂଘର ସନାତନ ମାଝୀ, ସୁଭମର ଅଶୋକ ସିଂ ପ୍ରମୁଖ ଉପସ୍ଥିତ ଥିଲେ।