ଗୋପପୁରେ ଗୋପୀଙ୍କ ବିଳାପ : କୃଷ୍ଣ-ବଳରାମଙ୍କ ମଥୁରା ଆଗମନ
ମଥୁରାନଗରୀ/ଗୋପପୁର : କୃଷ୍ଣ-ବଳାରାମଙ୍କୁ ଧରି ଅକ୍ରୂର ଗୋପପୁରରୁ ବିଦାୟ ନେବା ବେଳେ ମା’ ଯଶୋଦାଙ୍କ ସହ ଗୋପୀମାନେ ବିଳାପ କରୁଛନ୍ତି। ଗୋପପୁର ବେନି ଭାଇଙ୍କୁ ବିଦାୟ ଦେଇ କାନ୍ଦୁଛି। ଧନୁଯାତ୍ରା ମହୋତ୍ସବର ନବମ ଦିବସରେ ମଥୁରାନଗରୀରେ କଂସଙ୍କ ନଗର ଭ୍ରମଣ, ମଥୁରା ଆମ୍ରବନରେ ଶ୍ରୀକୃଷ୍ଣ ଭକ୍ତିିରେ ନିମଗ୍ନ ମୁନି ଋଷିଙ୍କ ଉପରେ କଂସଙ୍କ ଅତ୍ୟାଚାର ଏବଂ ଗୋପପୁରରୁ କୃଷ୍ଣ-ବଳରାମଙ୍କ ବିଦାୟ ଓ ମଥୁରାନଗରୀରେ କୃଷ୍ଣ-ବଳରାମ ଆଦିମାତା ମନ୍ଦିରରେ ବିଶ୍ରାମ ଦୃଶ୍ୟ ଅଭିନୀତ ହୋଇଛି।
Sambad is now on WhatsApp
Join and get latest news updates delivered to you via WhatsApp
କୃଷ୍ଣ-ବଳରାମଙ୍କ ମଥୁରାଗମନ ଖବର ପାଇ ଯୋଜନା ସାର୍ଥକ ହେଲା ଭାବି ଉଚ୍ଚ ଅଟ୍ଟହାସ୍ୟ କରୁଛନ୍ତି ମଥୁରା ନରେଶ। ମହାମନ୍ତ୍ରୀ ଅକ୍ରୂର ଗୋପପୁର ପହଞ୍ଚିବା ପରେ ତାଙ୍କୁ ଦେଖି ମୁରୁକି ମୁରୁକି ହସି ଉଠିଲେ ଭକ୍ତ ବତ୍ସଳ ଶ୍ରୀକୃଷ୍ଣ। ଅକ୍ରୂର ଜାଣି ପାରିଲେ ଏଇ ତାଙ୍କର ପରମ ଆରାଧ୍ୟ ଭଗବାନ ଶ୍ରୀକୃଷ୍ଣ। ଆନନ୍ଦରେ ତାଙ୍କ ଆଖିରୁ ବୋହି ଯାଇଛି ଲୋତକର ଧାରା। ପ୍ରଭୁଙ୍କ ପାଦ ପଦ୍ମରେ ପଡ଼ି କାନ୍ଦି ଉଠିଥିଲେ। ରାତ୍ରୀଯାପନ ପରେ ଅକ୍ରୂର କୃଷ୍ଣ-ବଳରାମଙ୍କୁ ନେଇ ମଥୁରା ଅଭିମୁଖେ ଯାତ୍ରା କରିବାକୁ ବାହାରିବା ସମୟରେ ବାଟ ଉଗାଳିଥିଲେ ଗୋପପୁରବାସୀ। କୃଷ୍ଣ ତାଙ୍କର ପ୍ରିୟ ସଖା ସଖୀ ଗୋପାଳ ଓ ଗୋପାଙ୍ଗନାମାନଙ୍କଠାରୁ ବିଦାୟ ନେଇଛନ୍ତି।
ମଥୁରାରେ ମହାରାଜ କଂସ ଅପରାହ୍ନରେ ନଗର ଭ୍ରମଣରେ ବାହାରିଥିଲେ। ମୃତ୍ୟୁକୁ ନେଇ ଭୀତତ୍ରସ୍ତ କଂସ କୃଷ୍ଣ ନାମ ଶୁଣିଲେ ବିରକ୍ତି ପ୍ରକାଶ କରୁଛନ୍ତି। ତାଙ୍କର ଏହି ଭ୍ରମଣ ବେଳେ ମଥୁରାର ଆମ୍ର ବନରେ ପହଞ୍ଚି ସେଠାରେ କୃଷ୍ଣ ଭକ୍ତିରେ ନିମଗ୍ନ ଥିବା ମୁନିଋଷିଙ୍କ ଉପରେ କ୍ରୋଧାନ୍ଵିତ ହୋଇ ଉଠିଥିଲେ। ମହାରାଜାଙ୍କ ଆଦେଶକ୍ରମେ ଦୈତ୍ୟମାନେ ମୁନିଋଷିଙ୍କୁ ପ୍ରବଳ ଅତ୍ୟାଚାର କରିଥିଲେ। ଏଣେ କଂସ ସ୍ୱପ୍ନରେ କୃଷ୍ଣକୁ ଦେଖି ଚମକି ପଡ଼ିଥିଲେ। ହେଲେ କୃଷ୍ଣ-ବଳରାମଙ୍କ ମଥୁରା ଆସୁଥିବା ସୂଚନା ପାଇ ଉତ୍ଫୁଲ୍ଲିତ ହୋଇ ମହାରାଜା କଂସ ଅଟ୍ଟହାସ୍ୟ କରିଛନ୍ତି। ପୁଣି ନାଚଗୀତରେ ବିଭୋର ହୋଇ ଉଠିଛନ୍ତି।