ଚୋରି ଅଭିଯୋଗରେ ନାବାଳିକାଙ୍କୁ ଖୁଣ୍ଟରେ ବାନ୍ଧି ମାଡ଼; ଜୋତା ମାଳ ପିନ୍ଧାଇଲେ, ୪ ଅଟକ

ରାଇଘର : ଟଙ୍କା ଓ ଚପଲ ଚୋରି କରିଥିବା ଅଭିଯୋଗ କରି ଜଣେ ନାବାଳିକାଙ୍କୁ ଗୋଡ଼ାଇ ଗୋଡ଼ାଇ ଧରିବା ସହିତ ଏକ ଖୁଣ୍ଟରେ ବାନ୍ଧି ମାଡ଼ ମରାଯାଇଛି। ଏପରିକି ନାବାଳିକାଙ୍କୁ ବେକରେ ଜୋତା ମାଳ ପିନ୍ଧାଯାଇଛି। ଏଭଳି ଏକ ଅମାନବୀୟ ଘଟଣା ଘଟିଛି ନବରଙ୍ଗପୁର ଜିଲ୍ଲା କୁନ୍ଦେଇ ଥାନା ଅନ୍ତର୍ଗତ କାଉଡଲା ପଞ୍ଚାୟତର ତାରଙ୍ଗପୁରୀ (ନୂଆପାରା) ଗ୍ରାମରେ।

ସୂଚନା ଅନୁଯାୟୀ, ଶୁକ୍ରବାର ସକାଳ ପ୍ରାୟ ୮ଟାରେ ତାରଙ୍ଗପୁରୀ (ନୂଆପାରା) ଗାଁ ମଝିରେ ଜଣେ ୧୩ ବର୍ଷୀୟା ନାବାଳିକାଙ୍କୁ କିଛି ଗ୍ରାମବାସୀ ଗୋଡ଼ାଇ ଗୋଡ଼ାଇ ଧରିଥିଲେ। ଟଙ୍କା ଚୋରି କରିଥିବା ଅଭିଯୋଗରେ ଏକ କାଠ ଖୁଣ୍ଟରେ ନାବାଳିକାଙ୍କ ହାତ ଓ ଗୋଡ଼କୁ ବାନ୍ଧି ଦେଇଥିଲେ। ସେହିପରି ନାବାଳିକାଙ୍କ ବେକରେ ଜୋତା ମାଳ ପିନ୍ଧାଇବା ସହିତ ନିର୍ଦ୍ଦୟ ଭାବେ ବିଧା ଚାପୁଡ଼ା ମାରିଥିଲେ। ଟଙ୍କା ଚୋରି କରି ନଥିବା ନେଇ ନାବାଳିକା ଜଣଙ୍କ କହିଥିଲେ ମଧ୍ୟ କେହି କିଛି ଶୁଣି ନଥିଲେ। ଅନ୍ୟପଟେ ମାଡ଼ ମରାଯିବା ସମୟରେ ଆଉ କିଛି ଲୋକ ଏହି ସମୟରେ ଭିଡିଓ ଉତ୍ତୋଳନ କରି ଭାଇରଲ କରିବାରେ ବ୍ୟସ୍ତ ଥିଲେ। ଏହି ଘଟଣାକୁ ନେଇ ଶୁକ୍ରବାର ଅପରାହ୍ନରେ ସଂପୃକ୍ତ ନାବାଳିକାଙ୍କ ବାପା କୁନ୍ଦେଇ ଥାନାରେ ଲିଖିତ ଅଭିଯୋଗ କରିବା ପରେ କୁନ୍ଦେଇ ପୁଲିସ ୪ ଜଣଙ୍କୁ ଅଟକ ରଖି ପଚରାଉଚରା କରୁଛି।