ଚେୟାରରେ ବସିଯିବାରୁ ଦଳିତ ଯୁବକଙ୍କୁ ମାଡ଼

ଦାନଗଦୀ: ଯାଜପୁର ଜିଲ୍ଲା କଳିଙ୍ଗନଗର ଥାନା ନିମପାଲି ପିଙ୍ଗଳରେ ଡ୍ରାମା ସମୟରେ ଗଣ୍ଡଗୋଳ ଘଟିଛି। ମେଲୋଡି ପରେ ମଞ୍ଚ ପାଖରେ ଥିବା ଚେୟାରରେ ନିମପାଲି ଦଳିତ ସାହିର ଯୁବକ ବାବୁଲି ମଲିକ ଓ ବିଚିତ୍ର ମଳିକ ବସିଯିବାରୁ ସେମାନଙ୍କୁ ମାଡ଼ ମରାଯାଇଛି। ବିଭୂତି ବଳ ଓ ପପୁଣି ଆଇଚ ଦୁହିଁଙ୍କୁ ଜାତି ଉଠାଇ ଗାଳିଗୁଲଜ କରିଥିଲେ। ଏଥିସହ ମାଡ ମାରି ବିଦା କରିଦେଇଥିଲେ। ଡ୍ରାମା ଦେଖୁଥିବା ଦଳିତ ମହିଳାମାନେ ପ୍ରତିବାଦ କରିବାରୁ ସେମାନଙ୍କୁ ଯାତ୍ରା ମଝିରେ ଟଣାଓଟରା କରି ଗାଳିଗୁଲଜ କରିଥିଲେ। ଖବର ପାଇ ପୁଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା।

ଆଜି ଏ ନେଇ କଳିଙ୍ଗନଗର ଥାନାରେ ୨୫/୨୩ ରେ ଜାତିଗତ ନିର୍ଯାତନା ନିବାରଣ ଆଇନ ଅନୁଯାୟୀ ମାମଲା ରୁଜୁ କରାଯାଇଛି। ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବା ପାଇଁ ୟୁନାଇଟେଡ୍‌ ଫୋରମ ରାଜ୍ୟ କାର୍ଯ୍ୟକାରୀ ସଭାପତି ମନୋରଂଜନ ଜେନା, ଜିଲ୍ଲା ସଂଯୋଜକ ଉମାକାନ୍ତ ମଲ୍ଲିକ, ଜିଲ୍ଲା ସମ୍ପାଦକ ବିଶ୍ୱନାଥ ପାତ୍ର ପ୍ରଭୃତି ଅତିରିକ୍ତ ଏସପିଙ୍କ ନିକଟରେ ଦାବି କରିଛନ୍ତି।