ପୁରୀ : ଭକ୍ତନିବାସ ପାଇଁ ଖାଲି ହେଉଛି ଶ୍ରୀମନ୍ଦିର ରାଜକୋଷ। ଆୟ ତୁଳନାରେ ବ୍ୟୟ ହେଉଛି ତିନିଗୁଣା ଅର୍ଥ। ତଥାପି ନା ସାଧାରଣ ନା ଭକ୍ତ ଏଥିରୁ କିଛି ସୁବିଧା ପାଉଛନ୍ତି। ଶ୍ରୀମନ୍ଦିର ପ୍ରଶାସନ ବି ଲାଭବାନ ହେଉନି। ଓଲଟା ଅଧାଦିନ ବଡ଼ ଅଧିକାରୀ ଓ ପ୍ରଭାବଶାଳୀଙ୍କ ଚର୍ଚ୍ଚାରେ ଶ୍ରୀମନ୍ଦିର ରାଜକୋଷର ଅଯଥା ଅପବ୍ୟୟ କରାଯାଉଥିବା ଅଭିଯୋଗ ହେଉଛି। ଏଭଳି ସ୍ଥିତିରେ ପିପିପି ମୋଡ୍‌ରେ ଭକ୍ତନିବାସ ଚଳାଇବାକୁ ଦାବି ହେଉଥିଲେ ମଧ୍ୟ ନିଷ୍ପତ୍ତି ଝୁଲି ରହିଛି।

Advertisment

publive-image

ଶ୍ରୀମନ୍ଦିର ପ୍ରଶାସନ ଅଧୀନରେ ଥିବା ନୀଳାଦ୍ରି, ନୀଳାଚଳ ଓ ଶ୍ରୀଗୁଣ୍ଡିଚା ଭକ୍ତନିବାସ ସହ ଏବେ ଜେଲ୍‌ ରୋଡ୍‌ ପୁରୁଷୋତ୍ତମ ଭକ୍ତନିବାସ ନୂଆ କରି ଯୋଡ଼ି ହୋଇଛି। ଆଗକୁ ବୃନ୍ଦାବତୀ ଭବନ ଓ ବଗଲା ଧର୍ମଶାଳା ବି ଯୋଡ଼ିହେବାକୁ ଯାଉଛି। ଭକ୍ତନିବାସର ମୂଳ ଲକ୍ଷ୍ୟ ଥିଲା ଭକ୍ତଙ୍କୁ ସୁଲଭ ମୂଲ୍ୟରେ ରହିବା ବ୍ୟବସ୍ଥା ଯୋଗାଇବା। କିନ୍ତୁ ଉଚ୍ଚା ଦର ଯୋଗୁ ସାଧାରଣ ଭକ୍ତ ଏଠାରେ ରହିବାକୁ ଅସମର୍ଥ। ତଥ୍ୟ ମୁତାବକ, ୨୦୨୦-୨୧ ଆର୍ଥିକ ବର୍ଷରେ ନୀଳାଚଳ ଭକ୍ତନିବାସର ପରିଚାଳନା ଓ ରକ୍ଷଣାବେକ୍ଷଣ ପାଇଁ ୯୧,୫୬, ୭୯୬ ଟଙ୍କା ଖର୍ଚ୍ଚ କରାଯାଇଥିଲା। ଶ୍ରୀଗୁଣ୍ଡିଚା ଭକ୍ତନିବାସ ପାଇଁ ୮୭,୫୬,୯୫୪ ଟଙ୍କା ଓ ନୀଳାଦ୍ରି ଭକ୍ତନିବାସ ପାଇଁ ୯୮,୬୫,୬୬୬ ଟଙ୍କା ଖର୍ଚ୍ଚ କରାଯାଇଥିଲା। ୨୦୨୧-୨୨ରେ ନୀଳାଚଳ ଭକ୍ତନିବାସ ପାଇଁ ୪୯,୪୫,୧୫୫ ଟଙ୍କା, ଶ୍ରୀଗୁଣ୍ଡିଚା ଭକ୍ତନିବାସ ପାଇଁ ୫୩,୬୮, ୭୪୨ ଟଙ୍କା ଓ ନୀଳାଦ୍ରି ଭକ୍ତନିବାସ ପାଇଁ ୭୧,୪୨,୭୪୪ ଟଙ୍କା ଖର୍ଚ୍ଚ କରାଯାଇଥିଲା। ୨୦୨୨-୨୩ରେ ନୀଳାଚଳ ଭକ୍ତନିବାସ ଓ ଶ୍ରୀଗୁଣ୍ଡିଚା ଭକ୍ତନିବାସ ପାଇଁ ୧ କୋଟି ଟଙ୍କା ଲେଖାଏଁ ବଜେଟ୍‌ ପ୍ରସ୍ତୁତ ହୋଇଥିବାବେଳେ ଯଥାକ୍ରମେ ୫୩,୦୪,୮୪୫ ଟଙ୍କା ଓ ୪୬,୮୧,୨୫୮ ଟଙ୍କା ଖର୍ଚ୍ଚ ହେବ ବୋଲି ପୂର୍ବ ଆକଳନ କରାଯାଇଛି। ଏହାବାଦ ଯେଉଁ ଆଉଟ୍‌ସୋର୍ସିଂ ସଂସ୍ଥା ଜରିଆରେ ଠିକା କର୍ମଚାରୀମାନେ ଭକ୍ତନିବାସ ଦାୟିତ୍ବରେ ରହୁଛନ୍ତି, ସେ ବାବଦକୁ ବାର୍ଷିକ ୧ କୋଟିରୁ ଦେଢ଼ କୋଟି ଟଙ୍କା ପ୍ରଦାନ କରାଯାଉଛି। ୨୦୨୨-୨୩ରେ ଏମାନଙ୍କ ପାଇଁ ୨ କୋଟି ୩୦ ଲକ୍ଷ ଟଙ୍କାର ଏକ ବଜେଟ୍‌ ବି ପ୍ରସ୍ତୁତ ହୋଇଛି।

publive-image

କିନ୍ତୁ ଆୟ ଉପରେ ନଜର ପକାଇଲେ, ୨୦୨୦-୨୧ରେ ନୀଳାଚଳ ଭକ୍ତନିବାସରୁ ମାତ୍ର ୬୫,୧୭,୩୩୭ ଟଙ୍କା ଆୟ କରାଯାଉଛି। ସେହିଭଳି ଶ୍ରୀଗୁଣ୍ଡିଚା ଭକ୍ତନିବାସରୁ ୧କୋଟି ୧୭ ଲକ୍ଷ ୨୦ ହଜାର ୫୭୩ ଟଙ୍କା ଓ ନୀଳାଦ୍ରି ଭକ୍ତନିବାସରୁ ୧ କୋଟି ୯ ଲକ୍ଷ ୫ହଜାର ୭୫୩ ଟଙ୍କା ଆୟ ହୋଇଛି। କିନ୍ତୁ ଏହା ପର ହିସାବ ମୁଣ୍ଡରେ ହାତ ଦେବା ଭଳି ହୋଇଛି। ୨୦୨୧-୨୨ ଆର୍ଥିକ ବର୍ଷରେ ଡିସେମ୍ବର ପର୍ଯ୍ୟନ୍ତ ନୀଳାଚଳ ଭକ୍ତନିବାସରୁ ମାତ୍ର ୧୮,୯୦,୭୧୦ ଟଙ୍କା ଆୟ ହୋଇଥିବାବେଳେ ଶ୍ରୀଗୁଣ୍ଡିଚା ଭକ୍ତନିବାସରୁ ୨୨, ୪୩,୪୩୦ ଟଙ୍କା ଓ ନୀଳାଦ୍ରି ଭକ୍ତନିବାସରୁ ୪୯,୨୨,୦୭୮ ଟଙ୍କା ଆୟ ହୋଇଛି। ଜାନୁଆରିରୁ ମାର୍ଚ୍ଚ ଭିତରେ ପ୍ରାୟ ୩୦ ଲକ୍ଷ ଆୟ ପାଇଁ ଲକ୍ଷ୍ୟ ରଖାଯାଇଥିଲେ ବି ଏହି ଲକ୍ଷ୍ୟ ବି ଶ୍ରୀମନ୍ଦିର ପ୍ରଶାସ ହାସଲ କରିପାରିନି। ୨୦୨୨-୨୩ ଆର୍ଥିକ ବର୍ଷ ଆରମ୍ଭ ହୋଇଥିବାବେଳେ ଅଦ୍ୟାବଧି ବି ସେତେଟା ଲାଭ ଆସି ନଥିବା ବିଶ୍ବସ୍ତ ସୂତ୍ରରୁ ଜଣାପଡ଼ିଛି।

ଅଭି ଯୋଗ ହୋଇଛି, ଅଧିକାଂଶ ସମୟରେ ପ୍ରଭାବଶାଳୀ ବ୍ୟକ୍ତି, ଅଧିକାରୀ ଓ ସେମାନଙ୍କ ସଂପର୍କୀୟମାନେ ମାଗଣାରେ ଏଠାରେ ରୁମ୍‌ ମାଡ଼ି ବସୁଛନ୍ତି। ଯେଉଁଥିପାଇଁ ଏହି ରୁମ୍‌ଗୁଡ଼ିକରୁ ଯେଉଁ ଆୟ ହେବା କଥା ତାହା ହୋଇପାରୁନି। ସେପଟେ ଭକ୍ତନିବାସ ସହ ସଂପୃକ୍ତ କିଛି ଅଧିକାରୀ ଓ କର୍ମଚାରୀ ବି ମଝିରେ ଦୁର୍ନୀତିର ବାଟ ଖୋଲି ଦେଇଥିବାରୁ ଶ୍ରୀମନ୍ଦିର ପ୍ରଶାସନ ପାଖକୁ ଏହି ଟଙ୍କା ଆସିବା ପୂର୍ବରୁ ସେମାନଙ୍କ ପକେଟ୍‌କୁ ଚାଲିଯାଉଛି। ଏ ସଂପର୍କରେ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି, ଭକ୍ତନିବାସ କ୍ଷତିରେ ଚାଲିବା କଥା ସତ। କିନ୍ତୁ କିଛି ବର୍ଷ କୋଭିଡ୍‌ ଜନିତ କଟକଣା ପାଇଁ ଏଭଳି ସ୍ଥିତି ଦେଖା ଦେଇଥିଲା। ତଥାପି ପିପିପି ମୋଡ୍‌ରେ ଆମେ ଏହା ଚଳାଇବାକୁ ଯୋଜନା କରୁଛୁ। ଏ ସଂପର୍କରେ ଶ୍ରୀମନ୍ଦିର ପରିଚାଳନା କମିଟି ବୈଠକରେ ବି ଆଲୋଚନା ହୋଇଛି ବୋଲି ଶ୍ରୀ ଜେନା କହିଛନ୍ତି।