ଛାତିଥରା ଦୁର୍ଘଟଣା : କାର୍ ଧକ୍କାରେ ଜଳିଗଲା ବାଇକ୍, ୨ ମୃତ
ଚିତ୍ରଡ଼ା/ରାସଗୋବିନ୍ଦପୁର : ବାରିପଦା-ଅମର୍ଦ୍ଦା ରାଜ୍ୟ ରାଜପଥର ଝିଙ୍କିରିଆ ପାଖ ଭରଡ଼ାନଣ୍ଡା ନିକଟରେ ଆଜି ରାତି ପ୍ରାୟ ୧୦ଟା ବେଳେ ଘଟିଯାଇଛି ଏକ ଛାତିଥରା ଦୁର୍ଘଟଣା। ଦ୍ରୁତଗତିରେ ଆସୁଥିବା ଏକ କାର୍ ଓ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବାରୁ ଘଟଣାସ୍ଥଳରେ ହିଁ ୨ ଜଣଙ୍କ ମୃତ୍ୟୁ ହୋଇଯାଇଛି। ତେବେ ମୃତକଙ୍କ ପରିଚୟ ମିଳିପାରିନି। ଦୁର୍ଘଟଣା ଏତେ ଭୟଙ୍କର ଥିଲା ଯେ ଧକ୍କା ହେବା ପରେ ବାଇକ୍ଟି ପ୍ରାୟ ୩୦ ଫୁଟ୍ ଯାଏଁ ଛିଟିକି ପଡ଼ିବା ସହ ହୁ ହୁ ହୋଇ ଜଳିଯାଇଥିଲା।
ଏକ ସୁଇଫ୍ଟ କାର୍ (ଓଡି-୦୨ଭି-୦୪୪୦) ସହ ଆପାଚେ ବାଇକ୍ର ଧକ୍କା ହୋଇଥିଲା। ବାଇକ୍ ଆରୋହୀ ଦ୍ବୟ ଘଟଣାସ୍ଥଳରେ ପ୍ରାଣ ହରାଇଥିଲେ। ଦୁର୍ଘଟଣା ପରେ କାର୍ ଚାଳକ ଫେରାର୍ ହୋଇ ଯାଇଥିବା ଜଣାପଡ଼ିଛି। ଖବରପାଇ ରାସଗୋବିନ୍ଦପୁର ପୁଲିସ, ମୋରଡ଼ା ପୁଲିସ ଓ ରାସଗୋବିନ୍ଦପୁର ଅଗ୍ନିଶମ ବାହିନୀ ସଙ୍ଗେ ସଙ୍ଗେ ଘଟଣାସ୍ଥଳରେ ପହଞ୍ଚିଥିଲେ। ସେତେବେଳକୁ ବାଇକ୍ଟି ସମ୍ପୂର୍ଣ୍ଣ ଜଳିଯାଇଥିଲା। ତେଣୁ ବାଇକ୍ର ନମ୍ବର ବି ଜଣାପଡ଼ିନି। ସେହିପରି କାର୍ର ବମ୍ଫର ଚୁର୍ମାର ହୋଇଯାଇଛି। ମୃତକ ୨ ଜଣଙ୍କୁ ରାସଗୋବିନ୍ଦପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିବା ବେଳେ ରିପୋର୍ଟ ଲେଖା ହେବା ପର୍ଯ୍ୟନ୍ତ ସେମାନଙ୍କ ପରିଚୟ ମିଳିପାରିନି।
