ବିପ୍ଳବୀ ଚକ୍ରଧରଙ୍କ ରାଜ୍ୟସ୍ତରୀୟ ଜୟନ୍ତୀ ପାଳନ ଦାବି
ଭୁବନେଶ୍ବର : କନିକାର ଅବିସମ୍ବାଦିତ ପ୍ରଜାନେତା ତଥା ଓଡ଼ିଶାର ଗାନ୍ଧୀବାଦୀ ପ୍ରବୀଣ ରାଜନେତା ବିପ୍ଳବୀ ଚକ୍ରଧର ବେହେରାଙ୍କର ପୁଣ୍ୟ ଜୟନ୍ତୀ ଜୁଲାଇ ୧୬ ତାରିଖକୁ ରାଜ୍ୟ ସରକାର ଚଳିତ ବର୍ଷଠାରୁ ତାଙ୍କର ସୂଚନା- ଲୋକସ˚ପର୍କ କିମ୍ବା ସ˚ସ୍କୃତି ବିଭାଗ ଆନୁକୂଲ୍ୟରେ ରାଜଧାନୀ ଭୁବନେଶ୍ବର ସହ ଭଦ୍ରକରେ ପାଳନ କରିବା ଲାଗି ଚାନ୍ଦବାଲି- ଭଦ୍ରକ ଅଞ୍ଚଳର ବହୁ ବୁଦ୍ଧିଜୀବୀ ଦାବି ଜଣାଇଛନ୍ତି। ‘ସମ୍ବାଦ’କୁ ଦେଇଥିବା ଏକ ପ୍ରେସ୍ ବିଜ୍ଞପ୍ତିରେ ସେମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ମନ୍ତ୍ରୀ ଅଶୋକ ଚନ୍ଦ୍ର ପଣ୍ତାଙ୍କ ସହ ଭଦ୍ରକ ଜିଲ୍ଲାର ପୂର୍ବତନ ଓ ଏବର ସମସ୍ତ ବିଧାୟକ, ରାଜ୍ୟ ସ˚ସ୍କୃତି ବିଭାଗର ଶାସନ ସଚିବ, ନିର୍ଦ୍ଦେଶକ ଏବ˚ ଅନ୍ୟାନ୍ୟ ଅଧିକାରୀମାନଙ୍କୁ, ବିଳମ୍ବରେ ହେଲେ ମଧ୍ୟ ରାଜଧାନୀ ଭୁବନେଶ୍ବରର ରାଜଭବନ ଛକ ନିକଟରେ ବିପ୍ଳବୀ ଚକ୍ରଧରଙ୍କର ପୂର୍ଣ୍ଣାବୟବ ପ୍ରତିମୂର୍ତ୍ତି ପ୍ରତିଷ୍ଠା କରାଇଥିବାରୁ କୃତଜ୍ଞତା ଜଣାଇବା ସହ ଏହି ଜନନେତାଙ୍କ ସ୍ମୃତି ଓ କୀର୍ତ୍ତିରାଜିକୁ ବଞ୍ଚେଇ ରଖିବା ଲାଗି ଛାତ୍ରଛାତ୍ରୀମାନଙ୍କ ଭିତରେ ପ୍ରବନ୍ଧ ଓ ବକ୍ତୃତା ପ୍ରତିଯୋଗିତା ପାଇଁ ମଧ୍ୟ ପ୍ରସ୍ତାବ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ ଯେ ବିପ୍ଳବୀ ଚକ୍ରଧର ବେହେରା ଅଧୁନା ଭଦ୍ରକ ଜିଲ୍ଲା ଅନ୍ତର୍ଗତ ଆଙ୍କପଡ଼ା ଗ୍ରାମରେ ୧୮୯୪ ମସିହା ଜୁଲାଇ ୧୬ ତାରିଖରେ ଜନ୍ମ ନେଇଥିଲେ ଏବ˚ ୧୯୭୩ ମସିହା ଜାନୁଆରି ୧ ତାରିଖରେ ହଳଦିଆଠାରେ ତାଙ୍କର ପରଲୋକ ହୋଇଥିଲା। ତାଙ୍କର ଜୀବନ ସ˚ଗ୍ରାମ ରୋମାଞ୍ଚକର ତଥା ବିସ୍ମୟକର ଥିଲା। ସେ କନିକା ପ୍ରଜା ଆନ୍ଦୋଳନର ନେତୃତ୍ବ ନେବା ସହ ଏହି ଅଞ୍ଚଳ ଚାଷୀମାନଙ୍କ ସମସ୍ୟାକୁ ଉତ୍କଳମଣି ଗୋପବନ୍ଧୁ ଦାସ, ମହାତ୍ମା ଗାନ୍ଧୀ ଏବ˚ ହରେକୃଷ୍ଣ ମହତାବଙ୍କ ଦୃଷ୍ଟିକୁ ଆଣିଥିଲେ। ସେ ଏକାଧିକବାର ଚାନ୍ଦବାଲି ବିଧାୟକ ଭାବେ ନିର୍ବାଚିତ ହୋଇଥିଲେ। କନିକାର ରାଜଶାସନ ଓ ବ୍ରିଟିଶ ଶାସନ ବିରୋଧରେ ସ˚ଗ୍ରାମ କରି ସେ ବହୁବାର କାରାବରଣ କରିଥିଲେ। ସେ କେବଳ ଜନନେତା ନୁହେଁ, ଜଣେ ସମାଜ ସ˚ସ୍କାରକ, ସାମ୍ବାଦିକ ଏବ˚ ସାରସ୍ବତ ସାଧକ ଥିଲେ। ଏଭଳି ଜଣେ ପ୍ରବାଦ ପୁରୁଷଙ୍କ ସ୍ମୃତିରକ୍ଷା ନିମନ୍ତେ ରାଜ୍ୟ ସରକାର ଚଳିତ ବର୍ଷଠାରୁ ଯଥାଯଥ ପଦକ୍ଷେପ ଗ୍ରହଣ କରିବେ ବୋଲି ଚକ୍ରଧର ସ୍ମୃତି ସମିତି ପକ୍ଷରୁ ଶାନ୍ତିଲତା ନାଗ, ନରହରି ସେଠୀ, ଧୀରେନ୍ଦ୍ର ବେହେରା ଏବ˚ ଗୌରହରି ଦାସ ପ୍ରମୁଖ ମୁଖ୍ୟମନ୍ତ୍ରୀଙ୍କ ନିକଟରେ ଦାବି ଜଣାଇଛନ୍ତି।