ଡେବ୍ରିଗଡ଼ରେ ପକ୍ଷୀ ସୁରକ୍ଷା ଢ଼ିଲା

ବରଗଡ଼ : ହୀରାକୁଦ ଜଳଭଣ୍ଡାର ସଂଲଗ୍ନ ଡେବ୍ରିଗଡ଼ ଅଭୟାରଣ୍ୟରେ ପକ୍ଷୀ ସୁରକ୍ଷା ବ୍ୟବସ୍ଥା ସଂପୂର୍ଣ୍ଣ ଢିଲା ରହିଛି। ଏଥର ହୀରାକୁଦ ଜଳଭଣ୍ଡାରକୁ ରେକର୍ଡ ସଂଖ୍ୟକ ପକ୍ଷୀ ଆସିଥିବା କୁହାଯାଉଛି। ଯାହା ପରିବେଶବିତ୍‌ ଏବଂ ବନ୍ୟଜନ୍ତୁ ପ୍ରେମୀଙ୍କୁ ଆମୋଦିତ କରିଛି। କିନ୍ତୁ ବରଗଡ଼ ଜିଲ୍ଲା ଅଧୀନରେ ଥିବା ହୀରାକୁଦ ଜଳଭଣ୍ଡାର ଏବଂ ‌ଅଭୟାରଣ୍ୟରେ ପକ୍ଷୀମାନଙ୍କୁ ସୁରକ୍ଷା ଦେବା ପାଇଁ କିଛି ଠୋସ୍‌ ବ୍ୟବସ୍ଥା ନାହିଁ। ଏଠାରେ ପୂର୍ବ ଭଳି ମାଫିଆ ଏବଂ ଶିକାରୀଙ୍କ ରାଜୁତି ଚାଲିଛି। ପୂବର୍ରୁ ଅଭୟାରଣ୍ୟରେ ଠାବ ହୋଇଥିବା ଏକମାତ୍ର ମହାବଳ ବାଘକୁ ଶିକାର ପ‌େର ବି ଡେବ୍ରିଗଡ଼ରେ ଜୀବଜନ୍ତୁଙ୍କ ସୁରକ୍ଷା ପାଇଁ ଏଯାଏଁ କିଛି ଠୋସ୍ ବ୍ୟବସ୍ଥା ହୋଇନାହିଁ।

ମହାବଳ ହତ୍ୟା ଘଟଣା ପରେ ବି ବନ ବିଭାଗ କିଛି ଶିକ୍ଷା ପାଇଲା ନାହିଁ। ବର୍ତମାନ ହୀରାକୁଦ ଜଳଭଣ୍ଡାରରେ ପକ୍ଷୀଙ୍କ ସମାଗମ ହେବା ଆରମ୍ଭ ହୋଇଛି। ଜଳଭଣ୍ଡାର କୂଳରେ ଥିବା ଡେବ୍ରିଗଡ଼ ଅଭୟାରଣ୍ୟରେ ବିରଳ ପକ୍ଷୀ ରୁଣ୍ଡ ହୋଇଛନ୍ତି। ହେଲେ ଏହି ବିରଳ ଅତିଥି ପକ୍ଷୀମାନେ ଶିକାରୀଙ୍କ ଶିକାର ହେଉଛନ୍ତି। ପ୍ରତିଦିନ ଅଭୟାରଣ୍ୟରେ ଏହି କାରନାମା ଚାଲିଥିଲେ ହେଁ ପାଟ୍ରୋଲିଂ ପାଇଁ କିଛି ଠୋସ୍ ବନ୍ଦୋବସ୍ତ ହୋଇନାହିଁ। ଗତବର୍ଷ ଅଭୟାରଣ୍ୟରେ ବଜ୍ରକାପ୍ତା ଏବଂ ଅନ୍ୟ ବିରଳ ଜୀବ ଶିକାର ହୋଇଛନ୍ତି। କିନ୍ତୁ ବନବିଭାଗ ସବୁ ମାମଲାକୁ ହାଲୁକା ନେଉଛି। ଅଭୟାରଣ୍ୟର ସୀମା ବିବାଦକୁ ନେଇ ବରଗଡ଼ ଏବଂ ସମ୍ବଲପୁର ବନ ବିଭାଗ ମଧ୍ୟରେ ଦ୍ବନ୍ଦ୍ବ ଲାଗି ରହିଛି। ଅଭୟାରଣ୍ୟରେ କିଛି ଅଘଟଣ ଘଟିଲେ ଉଭୟ ଜିଲ୍ଲାର ବନ ବିଭାଗ ପରସ୍ପରକୁ ଦୋଷାରୋପ କରି ନିଜ ମୁଣ୍ଡରୁ ଅଠା ଛଡ଼ାଇଥାନ୍ତି। ପକ୍ଷୀ ଏବଂ ଜୀବଜନ୍ତୁ ସୁରକ୍ଷା ମଧ୍ୟ ଏହି ସୀମା ବିବାଦ କାରଣରୁ ସମ୍ଭବ ହେଉନାହିଁ। ଏହି ସୀମା ବିବାଦର ପରିଣାମ ଏଠାରେ ବସବାସ କରୁଥିବା ଲୋକଙ୍କୁ ଭୋଗିବାକୁ ପଡ଼ୁଛି।

ଅଭୟାରଣ୍ୟ ପାର୍ଶ୍ବରେ ବାସ କରୁଥିବା ଲୋକେ ଅଭୟାରଣ୍ୟର କେଉଁ ଜିଲ୍ଲାର, ତାକୁ ନେଇ ସବୁବେଳେ ଟଣାଓଟରା ଲାଗି ରହିଥାଏ। ବରଗଡ଼ ଜିଲ୍ଲା ଏବଂ ସମ୍ବଲପୁର ବନବିଭାଗ ଏହି ଦ୍ବନ୍ଦ୍ବ ଦୂର କରିବା ବଦଳରେ କ୍ରମଶଃ ଜଟିଳ କରି ଦେଇଛନ୍ତି। ଡେବ୍ରିଗଡ଼ ସଂଲଗ୍ନ ଏବଂ ଭିତରେ ଥିବା ଗାଁ ଗୁଡ଼ିକରେ ବର୍ଷତମାମ ଜୀବଜନ୍ତୁ ପଶି ବ୍ୟାପକ ଫସଲ ଏବଂ ଘରଦ୍ବାର ନଷ୍ଟ କରିଥାନ୍ତି। ତେବେ କ୍ଷତିଗ୍ରସ୍ତଙ୍କୁ କ୍ଷତିପୂରଣ ରାଶି କେଉଁ ଜିଲ୍ଲାର ବନ ବିଭାଗ ଦେବ, ତାହା  କେବେ ଫଇସଲା ହୋଇପାରୁନି। ଲୋକେ ସହାୟତା ରାଶି ପାଇଁ ଉଭୟ ଜିଲ୍ଲାକୁ ଦୌଡ଼ୁଛନ୍ତି। କିନ୍ତୁ ସୀମା ବିବାଦ ଯୋଗୁଁ କାହାରିକୁ ସହାୟତା ମିଳୁନାହିଁ। ତେଣୁ ଏହି ସୀମା ବିବାଦର ତୁରନ୍ତ ସମାଧାନ ସହ ଜୀବଜନ୍ତୁଙ୍କ ସୁରକ୍ଷା ପାଇଁ ଠୋସ୍‌ ପଦକ୍ଷେପ ଆରମ୍ଭ କରିବାକୁ ପରିବେଶବିତ୍‌ମାନେ ଦାବି ହୋଇଛି।