ଗୁଡ଼ାରି: ଭାରୋତ୍ତୋଳନ ପ୍ରତିଯୋଗିତାରେ ଦିଲ୍ଲୀ ଓ କୋଲକାତାରେ ସ୍ବର୍ଣ୍ଣ ପଦକ ହାସଲ କରିଛନ୍ତି। ଆସନ୍ତା ନଭେମ୍ବରରେ ହରିୟାଣାରେ ଅନୁଷ୍ଠିତ ହେବାକୁ ଥିବା ଜାତୀୟ ସ୍ତରୀୟ ପ୍ରତିଯୋଗିତାରେ ମଧ୍ୟ ଭାଗ ନେବେ। କିନ୍ତୁ ପ୍ରତିଯୋଗିତାରେ ଭାଗ ନେବା ଆର୍ଥିକ ସମ୍ବଳର ଅଭାବ ସାଙ୍ଗକୁ ମିଳିପାରୁନି ସରକାରୀ ପ୍ରୋତ୍ସାହନ। ଫଳରେ ପ୍ରତିଯୋଗିତାରେ ଅଂଶଗ୍ରହଣ କରିବାକୁ ହାତ ପତାଇଛନ୍ତି କ୍ରୀଡ଼ାବିତ୍‌ ବୀରେନ୍ଦ୍ର ଶବର।

Advertisment

ବାଧକ ସାଜିଛି ଅର୍ଥ, ମିଳୁନି ସରକାରୀ ପ୍ରୋତ୍ସାହନ
ଭାରୋତ୍ତୋଳନରେ ଜିତିଛନ୍ତି ସ୍ବର୍ଣ୍ଣପଦକ
ଜେରକ୍ସ ଦୋକାନ କରି ପୋଷୁଛନ୍ତି ପେଟ

ଗୁଡ଼ାରି ବ୍ଲକ୍‌ କଦମା ଗ୍ରାମର ବୀରେନ୍ଦ୍ର ଜନ୍ମରୁ ବାପ ଛେଉଣ୍ଡ। ଗତ ବର୍ଷ ମାଆ ମଧ୍ୟ ଆରପାରିକୁ ଚାଲିଗଲେ। ୨୦୧୨ରେ ବୀରେନ୍ଦ୍ର ଚନ୍ଦ୍ରପୁର ହାଇସ୍କୁଲରୁ ମାଟ୍ରିକ୍ ପାସ କରିବା ପରେ ରାୟଗଡ଼ା କଲେଜରେ ଯୁକ୍ତ ଦୁଇ ବାଣିଜ୍ୟ ପାଠ୍ୟକ୍ରମରେ ନାମ ଲେଖାଇଥିଲେ। ପ୍ରଥମ ବର୍ଷ ପାସ କରିବା ପରେ ଦ୍ବିତୀୟ ବର୍ଷ ଫି’ ଦାଖଲ କରିନପାରିବାରୁ ପରୀକ୍ଷା ଦେବାରୁ ବଞ୍ଚିତ ହୋଇଥିଲେ। ବର୍ତ୍ତମାନ ରାୟଗଡ଼ା ସହରର ଆମ୍ବଗୁଡ଼ାରେ ଏକ ଜେରକ୍ସ ଦୋକାନ କରି ବୀରେନ୍ଦ୍ର ଚଳୁଛନ୍ତି। ଭାରୋତ୍ତୋଳନରେ ରୁଚି ରଖିଥିବା ବୀରେନ୍ଦ୍ର ରାୟଗଡ଼ା ସହିଦ ଲକ୍ଷ୍ମଣ ନାୟକ ଜିମ୍‌ରେ କୋଚ ଦୋରା କୋଣ୍ଡାଗିରିଙ୍କ ଅଧୀନରେ ପ୍ରଶିକ୍ଷଣ ନେଉଛନ୍ତି। ବୀରେନ୍ଦ୍ର କହିଛନ୍ତି ଖେଳରେ ଆଗକୁ ବଢ଼ିବା ପାଇଁ ସେ ବହୁତ ସ୍ବପ୍ନ ଦେଖିଛନ୍ତି। କିନ୍ତୁ ଆର୍ଥିକ ସ୍ଥିତି ଖରାପ କାରଣରୁ ଅନେକ ଜାତୀୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରିପାରୁନାହାନ୍ତି। 

ସରକାରୀ ଓ ବେସରକାରୀ ସ୍ତରରେ ଆର୍ଥିକ ସାହାଯ୍ୟ ମିଳିଲେ ରାୟଗଡ଼ା ସମେତ ଓଡ଼ିଶାର ଟେକ ରଖି ପାରିଥାନ୍ତେ। ନିଜ ସ୍ବପ୍ନକୁ ସାକାର କରିବା ପାଇଁ ବୀରେନ୍ଦ୍ର ବହୁବାର ଜିଲ୍ଲାପାଳଙ୍କ ସମେତ ଲୋକ ପ୍ରତିନିଧିଙ୍କ ଦ୍ବାରସ୍ଥ ହୋଇଛନ୍ତି। ହେଲେ କେବଳ ପ୍ରତିଶ୍ରୁତିରେ ହିଁ ସନ୍ତୁଷ୍ଟ ହେବାକୁ ପଡ଼ିଛି। ଗୁଡ଼ାରି ବିଡ଼ିଓ ସୁଚିସ୍ମିତା ବେହେରା ବୀରେନ୍ଦ୍ରଙ୍କ ସମ୍ପର୍କରେ ଅବଗତ ହେବା ପରେ କହିଛନ୍ତି ଜିଲ୍ଲାସ୍ତରୀୟ ଅଧିକାରୀଙ୍କ ସହ ଆଲୋଚନା କରି ପଦକ୍ଷେପ ନେବେ। ଗୁଡ଼ାରି ଏନ୍‌ଏସି କାର୍ଯ୍ୟ ନିର୍ବାହୀ ଅଧିକାରୀ ପ୍ରସନ୍ନ କୁମାର ପାଢ଼ୀ କହିଛନ୍ତି ଏନ୍‌ଏସି ପକ୍ଷରୁ ଆର୍ଥିକ ସହଯୋଗର କୌଣସି ବ୍ୟବସ୍ଥା ନାହିଁ। ଜିଲ୍ଲା କ୍ରୀଡ଼ା ଅଧିକାରୀଙ୍କ ସହ ଆଲୋଚନା କରି ସ୍ଥାନୀୟ ଜିମ୍‌ରେ କୋଚ ଭାବେ ନିଯୁକ୍ତି ଦେବା ନିମନ୍ତେ ଅନୁରୋଧ କରିବି। ଗୁଣପୁର ବିଧାୟକ ସତ୍ୟଜିତ ଗମାଙ୍ଗ କହିଛନ୍ତି ମୋ ନିର୍ବାଚନ ମଣ୍ଡଳୀର ଏଭଳି ପ୍ରତିଭାକୁ ନିଶ୍ଚିତ ଭାବେ ଆଗକୁ ନେବା ନିମନ୍ତେ ପଦକ୍ଷେପ ନେବି। ପୂର୍ବରୁ ଏମିତି ଅନେକ ପ୍ରତିଶ୍ରୁତିରେ ବୀରେନ୍ଦ୍ରଙ୍କୁ ସନ୍ତୁଷ୍ଟ ହେବାକୁ ପଡ଼ିଥିବା ବେଳେ ହରିଆଣା ଗସ୍ତ ପୂର୍ବରୁ ବିଡିଓ, କାର୍ଯ୍ୟ ନିର୍ବାହୀ ଅଧିକାରୀ ଓ ବିଧାୟକ କ’ଣ ପଦକ୍ଷେପ ନେଉଛନ୍ତି ତାହା ଦେଖିବାର କଥା।