କୋଲକାତାରୁ କନ୍ଧମାଳ ଯାଉଥିଲା ବିସ୍କୁଟ ବୋଝେଇ ଟ୍ରକ୍‌, ରାସ୍ତା ମଝିରେ ଜଳିଗଲା

ବାହାନଗା: ବାହାନଗା ବ୍ଲକ ବାହାନଗା-ଗୋପାଳପୁର ରାସ୍ତା ଷଠୀ ଓ ପଣ୍ଡାଣୁଣି ମଝିରାସ୍ତାରେ ଏକ ବିସ୍କୁଟ ବୋଝେଇ ଟ୍ରକ୍ ଜଳି ଯାଇଛି। ସୂଚନା ଅନୁସାରେ, ଓଡି ୦୧କେ ୯୯୦୨ ଏକ ଟ୍ରକ୍ କୋଲକାତାରୁ ବିସ୍କୁଟ ବୋଝେଇ କରି କନ୍ଧମାଳ ଯାଉଥିଲା। ବିଳମ୍ବିତ ରାତିରେ ଗାଡ଼ିରେ ସଟସର୍କିଟ ହୋଇ ନିଆଁ ଲାଗି ଯାଇଥିଲା। ରାସ୍ତା ଉପରେ ଗାଡ଼ିଟି ହୁତୁ ହୁତୁ ହୋଇ ଜଳୁଥିବା ବେଳେ ଡ୍ରାଇବର କୌଣସି ପ୍ରକାରେ ଗାଡ଼ିଟିକୁ ରାସ୍ତାକଡ଼କୁ ନେଇ ଆସିଥିଲେ। ଖବର ପାଇ ଷଠୀରୁ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା। ଅଗ୍ନିକାଣ୍ଡରେ ଟ୍ରକ୍ ସହିତ ସେଥିରେ ଥିବା ବିସ୍କୁଟ ପୋଡ଼ି ପାଉଁଶ ହୋଇଯାଇଛି। ଉକ୍ତ ଟ୍ରକର ମାଲିକ ସୋର ଅଞ୍ଚଳର ଆଲୋକ ସାହୁ ବୋଲି ଜଣାପଡ଼ିଛି।