ଭୁବନେଶ୍ୱର: କେନ୍ଦ୍ର ସରକାରଙ୍କ ନୂଆ କୃଷି ଆଇନକୁ ବିରୋଧ କରି ଆଜି କୃଷକ ସଂଗଠନଗୁଡ଼ିକ ପକ୍ଷରୁ ଭାରତ ବନ୍ଦ ଡାକରା ଦିଆଯାଇଥିଲା। ତେବେ ରାଜ୍ୟର ବିଭିନ୍ନ ସ୍ଥାନରେ ଆଜି ସକାଳୁ ‘ଭାରତ ବନ୍ଦ’ର ଆଂଶିକ ପ୍ରଭାବ ପଡିଥିବା ଦେଖିବାକୁ ମିଳିଛି । ରାଜ୍ୟର ଅନେକ ସ୍ଥାନରେ ଦୋକାନବଜାର ବନ୍ଦ ରହିଥିବା ବେଳେ ଯାନବାହାନ ଚଳାଚଳ ବ୍ୟାହତ ହୋଇଥିଲା। ଆଜିର ଭାରତ ବନ୍ଦକୁ ଦେଶର ୧୮ଟି ରାଜନୈତିକ ଦଳ ସମର୍ଥନ କରୁଥିବାରୁ ଏହାର ନେତା ଓ କର୍ମୀ ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରିଥିଲେ । ନବନିର୍ମାଣ କୃଷକ ସଂଗଠନ ପକ୍ଷରୁ ବନ୍ଦକୁ ସବୁ ବର୍ଗର ଲୋକ ସମର୍ଥନ ଦେବା ପାଇଁ ନିବେଦନ କରାଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ସିପିଆଇ, ଅଖିଳ ଭାରତ କୃଷକ ସଭା, ଏଆଇଟିୟୁସି ଓ ବିଜେଏମ୍ୟୁ ପକ୍ଷରୁ ବିଭିନ୍ନ ସ୍ଥାନରେ ପିକେଟିଂ ହୋଇଥିଲା । ଅଲ୍ ଇଣ୍ଡିଆ ଫର୍ୱାର୍ଡ ବ୍ଲକ୍ ଓ ଏହାର ଗଣସଂଗଠନଗୁଡ଼ିକ ମଧ୍ୟ ବନ୍ଦକୁ ସମର୍ଥନରେ ରାସ୍ତାକୁ ଓହ୍ଲାଇ ଥିଲେ। ରାଷ୍ଟ୍ରୀୟ ମଜଦୁର୍ କଂଗ୍ରେସ ଓ ଓଡ଼ିଶା ନିର୍ମାଣ ଶ୍ରମିକ ଫେଡେରେସନ୍ ବନ୍ଦକୁ ସମର୍ଥନ ଜଣାଇ ଏଥିରେ ସାମିଲ୍ ହୋଇଥିଲେ।
ଆଜିର ଭାରତ ବନ୍ଦକୁ ନେଇ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି ଯେ ବନ୍ଦ ଡାକରା ସମ୍ପୂର୍ଣ୍ଣ ସଫଳ ହୋଇଛି | ଯେଉଁ ୩ଟି କଳା ଆଇନ କେନ୍ଦ୍ର ସରକାର ପାରିତ କରିଥିଲେ ଓ ବିଜେଡି ଏହାକୁ ସମର୍ଥନ କରିଥିଲା, ଆଜି ଜନସାଧାରଣ ବନ୍ଦ ପାଳନକୁ ସମର୍ଥନ କରି ତାହାର ଜବାବ ଦେଇଛନ୍ତି | ସେହିପରି ରାଜ୍ୟ ବିଜେପି ସଭାପତି ସମୀର ମହାନ୍ତି କହିଛନ୍ତି ଯେ ଜନଧନ ଖାତାଠାରୁ ଆରମ୍ଭ କରି ସର୍ବନିମ୍ନ ସହାୟକ ମୂଲ୍ୟ ପ୍ରତି ବର୍ଷ ବୃଦ୍ଧି କରାଯାଉଛି | ଫସଲ ବୀମା ଯୋଜନାରେ ବି ବ୍ୟାପକ ଚାଷୀ ଉପକୃତ ହେଉଛନ୍ତି | ସେହିପରି ବିଜେଡି ନେତା ପଦ୍ମନାଭ ବେହେରା କହିଛନ୍ତି ଯେ ଚାଷୀଙ୍କ ସହ ବିଜେଡି ରହିଛି ଓ ଚାଷୀଙ୍କ ଦାବି ପୂରଣ ହେବା ଦରକାର | ସଂସଦରେ ଚାଷୀ ବିଲର କିଛି ଅଂଶକୁ ବିଜେଡି ବିରୋଧ କରିଛି |