ଜାତିଭିତ୍ତିକ ଜନଗଣନା ଦାବି କଲା ବିଜେଡି: ବିଧାନସୌଧ ଫାଟକ ନିକଟରେ ଧାରଣା ଦେଲେ

ଭୁବନେଶ୍ବର: ଜାତିଭିତ୍ତିକ ଜନଗଣନା ସହ ସଂଖ୍ୟାନୁପାତରେ ସଂରକ୍ଷଣକୁ ବିଧାନସଭାରେ ପ୍ରସଙ୍ଗ କରିଛି ବିଜେଡି। ଗତକାଲି ଓ ଆଜି ଏହି ପ୍ରସଙ୍ଗରେ ବିଜେଡି ତା’ର ପ୍ରତିବାଦ ଜାରି ରଖିଛି। ଯଦିଓ ଗୃହ ଭିତରେ କଂଗ୍ରେସରେ ଘଣ୍ଟନାଦରେ ବିଜେଡିର ସ୍ବର ଶୁଣାଯାଉ ନଥିଲା ତେବେ ବାହାରେ ଏହାକୁ ଜୋର୍‌ଦାର ଉପସ୍ଥାପନ କରିଥିଲା ବିଜେଡି। ସରକାରଙ୍କ ପାଇଁ ଏହି ପ୍ରସଙ୍ଗଟି ଆଉ ଏକ ଅଡ଼ୁ୍ଆ ସୃଷ୍ଟି କରିଛି।

ଗତକାଲି ପରି ଆଜି ବି ପ୍ରଶ୍ନକାଳରେ ବିଜେଡିର ବିଧାୟକମାନେ ଏହି ପ୍ରସଙ୍ଗରେ ହୋହଲ୍ଲା କରୁଥିଲା ବେଳେ ଗୃହ କାର୍ଯ୍ୟ ମୁଲତବୀ ରହିଥିଲା। ଏହା ପରେ ବିଜେଡି ବିଧାୟକମାନେ ପ୍ଲାକାର୍ଡ ଧରି ନାରାବାଜି କରି ବିଧାନସଭା କରିଡରରେ ଶୋଭାଯାତ୍ରା କରିଥିଲେ। ସେମାନଙ୍କ ନାରାବାଜିରେ କରିଡର କମ୍ପିଥିଲା। ଏହା ପରେ ସେମାନେ ମୁଖ୍ୟମନ୍ତ୍ରୀ ପ୍ରବେଶ କରୁଥିବା ଫାଟକ ନିକଟରେ ଧାରଣା ଦେଇଥିଲେ। ସେମାନଙ୍କ ପ୍ଲାକାର୍ଡରେ ଲେଖାଥିଲା, ‘ବହୁଜନଙ୍କୁ ପ୍ରତାରଣା, ସାମାଜିକ ନ୍ୟାୟ ବାଟବଣା’,‘ଇଞ୍ଜିନିୟରିଂ, ମେଡିକାଲ ଶିକ୍ଷାରେ ଏସ୍‌ସି, ଏସ୍‌ଟି, ଓବିସିଙ୍କୁ ସଂଖ୍ୟାନୁପାତରେ ସଂରକ୍ଷଣ ଦିଅ’, ‘ଜାତି ଗଣନା ବିହାରେ କଲ, ଓଡ଼ିଶାରେ କିଆଁ ଭୁଲିଗଲ’। 

ବିଜେଡି ବିଧାୟକ ଅରୁଣ ସାହୁ ଗଣମାଧ୍ୟମରେ କହିଥିଲେ, ସରକାର କହୁଛନ୍ତି ଆମେ ଆଲୋଚନା ପାଇଁ ପ୍ରସ୍ତୁତ। ଖାଲି କ‌ହି‌ଦେଲେ ହେବନି। ଆଲୋଚନା ପାଇଁ ବାଟ ବାହାର କରନ୍ତୁ। ସରକାର କିଛି ନଶୁଣିବାରୁ ଆମେ ଆନ୍ଦୋଳନ କରି ଫାଟକ ନିକଟରେ ବସିଲୁ। ସରକାର ନଶୁଣିଲେ ବିରୋଧରେ ଗୃହକୁ କାହିଁକି ଯିବେ? ରାଜ୍ୟରେ ଏସ୍‌ସି, ଏସ୍‌ଟି ଓ ଓବିସିଙ୍କ ୯୪% ଜନସଂଖ୍ୟା। କିନ୍ତୁ ସେମାନଙ୍କୁ ଅଧିକାର ଦିଆଯାଉଛି। ଜମ୍ମୁ କାଶ୍ମିରୀରେ ଏସ୍‌ସି, ଏସ୍‌ଟି ଓ ଓବିସି ସଂରକ୍ଷଣକୁ ଏଠି ମୁଖ୍ୟମନ୍ତ୍ରୀ ସ୍ବାଗତ କଲେ। କିନ୍ତୁ ଓଡ଼ିଶାରେ କିଛି କରୁ ନାହାନ୍ତି। ବିହାରରେ ଜାତିଭିତ୍ତିକ ଗଣନା କରାଗଲା। ଓଡ଼ିଶାରେ ଅସୁବିଧା କେଉଁଠି ହେଉଛି? ଏବେ ବୈଷୟିକ ଶିକ୍ଷାରେ ମାତ୍ର ୨୦ ପ୍ରତିଶତ ସଂରକ୍ଷଣ ମିଳୁଛି। ଅନୁସୂଚିତ ଜାତିଙ୍କ ପାଇଁ ୮ ଓ ଜନଜାତିଙ୍କ ପାଇଁ ୧୨ ପ୍ରତିଶତ ସଂରକ୍ଷଣ ରହୁଛି। ଓବିସିଙ୍କୁ ଆଦୌ ସଂରକ୍ଷଣ ମିଳୁନି। ଏହା ସେମାନଙ୍କ ପ୍ରତି ଅବିଚାର। ତେଣୁ ଓଡ଼ିଶାରେ ଜାତିଭତ୍ତିକ ଜନଗଣନା ସହ ଏସ୍‌ସି ଓ ଏସ୍‌ଟିଙ୍କ ପାଇଁ ସଂରକ୍ଷଣ ଦାବି କରାଯାଇଛି। ସରକାରୀ ଦଳ ଖସିବାକୁ ଚେଷ୍ଟା କଲେ ବି ବିଜେଡି ଛାଡ଼ିବ ନାହିଁ। ଏହି ପ୍ରସଙ୍ଗରେ ଦଳ ଜୋର୍‌ଦାର ଲଢ଼େଇ କରିବ ଓ ବିଜେପି ସରକାର ଡୁବିବ।