କରୁଣାନିଧିଙ୍କ ପାରଲୌକିକ କ୍ରିୟାରେ ମୁଖ୍ୟମନ୍ତ୍ରୀ ନବୀନଙ୍କ ତରଫରୁ ଯୋଗଦେବେ ଅର୍ଥମନ୍ତ୍ରୀ ଓ ପୂର୍ବତନ ମନ୍ତ୍ରୀ

ଭୁବନେଶ୍ୱର: ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ତଥା ଡି.ଏମ୍‌.କେ ସୁପ୍ରିମୋ ଏମ୍‌. କରୁଣାନିଧିଙ୍କ ପାରଲୌକିକ କ୍ରିୟାରେ ଅର୍ଥମନ୍ତ୍ରୀ ଶଶିଭୂଷଣ ବେହେରା ଓ ପୂର୍ବତନ ମନ୍ତ୍ରୀ ଦେବୀ ପ୍ରସାଦ ମିଶ୍ର ଯୋଗଦେବେ ବୋଲି ଜଣାପଡ଼ିଛି। ସ୍ୱର୍ଗତ କରୁଣାନିଧିଙ୍କ ବୁଧବାର ଚେନ୍ନାଇରେ ଅନ୍ତିମ ସଂସ୍କାର ହେବ। ତାଙ୍କର ବିୟୋଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ଗଭୀର ଶୋକ ଜଣାଇଛନ୍ତି। ତାମିଲନାଡୁ ରାଜନୀତିରେ କରୁଣାନିଧିଙ୍କ ବିରାଟ ଭୂମିକା ଥିଲା। ତାଙ୍କର ଶାସନ କାଳରେ ସାମାଜର ଆର୍ଥିକ ଅବସ୍ଥା ସୁଧୁରି ଥଲା। ସେହପିରି କରୁଣାନିଧି ତାମିଲନାଡୁରେ ଅନେକ ସଂସ୍କାର ଆଣିଥିଲେ ବୋଲି ନବୀନ କହିଛନ୍ତି।

ଆସନ୍ତାକାଲି ଜାତୀୟସ୍ତରରେ ପାଳନ ହେବ ଶୋକ

କରୁଣାନିଧିଙ୍କ ପରଲୋକରେ କେନ୍ଦ୍ର ସରକାର ମଙ୍ଗଳବାର ଗଭୀର ଶୋକ ଜଣାଇଛନ୍ତି। କରୁଣାନିଧିଙ୍କୁ କେନ୍ଦ୍ର ସରକାର ଜାତୀୟ ଶୋକ ପାଳନ କରିବାକୁ ନିଷ୍ପତ୍ତି ନେଇଛନ୍ତି। ଏହି ଅବସରରେ ଜାତୀୟ ରାଜଧାନୀ ନୂଆଦିଲ୍ଲୀ, ରାଜ୍ୟ ଗୁଡ଼ିକର ରାଜଧାନୀ ଓ କେନ୍ଦ୍ରଶାସିତ ଅଞ୍ଚଳର ରାଜଧାନୀରେ ବୁଧବାର ଜାତୀୟ ପତାକାକୁ ଅର୍ଦ୍ଧ ନିମିଳିତ୍ତ କରି ରଖାଯିବ। ସେହିପରି ଦେଶରେ ଥିବା ସମସ୍ତ ଜାତୀୟସ୍ତରୀୟ ସରକାରୀ କାର୍ଯ୍ୟାଳୟକୁ ବନ୍ଦ ରଖାଯିବ।

ତାମିଲନାଡୁରେ ୫ ଥର ମୁଖ୍ୟମନ୍ତ୍ରୀ ଥିବା କରୁଣାନିଧିଙ୍କ ରାଜ୍ୟର ବିକାଶରେ ସ୍ମରଣୀୟ ଭୂମିକା ଥିଲା। ସେହିଭଳି ସେ ଜାତୀୟ ରାଜନୀତିରେ ମଧ୍ୟ ଚର୍ଚ୍ଚିତ ବ୍ୟକ୍ତି ଥିଲେ। ତାମିଲନାଡୁ ଭାଷା, ସାହିତ୍ୟ ଓ ଚଳଚ୍ଚିତ୍ରକୁ କରୁଣାନିଧିଙ୍କ ଅବଦାନ ଭୁଲିହେବ ନାହିଁ ବୋଲି ନବୀନ କହିଛନ୍ତି। ତାଙ୍କ ବିୟୋଗରେ ଏକ ଯୁଗ ଶେଷ ହୋଇଛି। ତାମିଲନାଡୁ ଓ ଭାରତ ଏକ ଶକ୍ତିଶାଳୀ ପୁଅକୁ ହରାଇଛି। ତାଙ୍କ ଆତ୍ମାଙ୍କୁ ଶାନ୍ତି ମିଳିବା ପାଇଁ ନବୀନ ପ୍ରାର୍ଥନା କରିଛନ୍ତି ଏଥି ସହିତ କରୁଣାନିଧିଙ୍କ ପରିବାରଙ୍କୁ ନବୀନ ସ୍ୱାନ୍ତନା ଜଣାଇଛନ୍ତି।

ସୂଚନାଯୋଗ୍ୟ, ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ତଥା ଡିଏମକେ ମୁଖ୍ୟ ଏମ.କରୁଣାନିଧିଙ୍କର ୯୪ ବର୍ଷ ବୟସରେ ମଙ୍ଗଳବାର ପରଲୋକ ହୋଇଛି । ଏହା ଫଳରେ ସମଗ୍ର ତାମିଲନାଡୁ ରେ ଶୋକର ଛାୟା ଖେଳିଯାଇଛି । ଏହା ସହିତ ତାମିଲନାଡୁ ଓ ସମଗ୍ର ଜାତୀୟ ରାଜନୀତିରେ ଏକ ଯୁଗର ଅବସାନ ହୋଇଛି । ଗତ କିଛି ଦିନ ଧରି ସେ ଅସୁସ୍ଥ ହୋଇ କାବେରୀ ହସପିଟାଲରେ ଚିକିତ୍ସିତ ହେଉଥିଲେ । ତାଙ୍କର ମୃତ୍ୟୁ ସଂପର୍କରେ ହସପିଟାଲର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡଃ ଅରବିନ୍ଦନ ସେଲଭରାଜ ଘୋଷଣା କରିଛନ୍ତି ।

ଜୁନ ୩, ୧୯୨୪ରେ ଜନ୍ମ ହୋଇଥିବା କରୁଣାନିଧିଙ୍କ ମୂଳ ନାଁ ଥିଲା ଦକ୍ଷିଣମୂର୍ତ୍ତି । ମାତ୍ର ୧୪ ବର୍ଷ ବୟସରୁ ରାଜନୀତିରେ ପାଦ ଦେଇଥିବା କରୁଣାନିଧି ୫ ଥର ପାଇଁ ତାମିଲନାଡୁର ମୁଖ୍ୟମନ୍ତ୍ରୀ ଓ ୫୦ ବର୍ଷ ପାଇଁ ଡିଏମକେ ମୁଖ୍ୟ ଥିଲେ । ତାଙ୍କୁ ୧୪ ବର୍ଷ ହେବା ବେଳକୁ ସେ ହିନ୍ଦୀ ବିରୋଧୀ ଆନ୍ଦୋଳନରେ ଯୋଗ ଦେଇଥିଲେ ଓ ପରବର୍ତ୍ତି ବର୍ଷମାନଙ୍କରେ ଦ୍ରାବିଡ଼ ରାଜନୀତିର ଏକ ମୁଖ୍ୟ ଚେହେରା ପାଲଟିଥିଲେ ।