ଝାରପଡ଼ା ଗଣେଶ ମଣ୍ଡପ ହାଟ ଉଚ୍ଛେଦ: ଲକ୍ଷ୍ମୀସାଗର ଥାନାରେ ବିଜେପି ଓ କଂଗ୍ରେସର ପ୍ରତିନିଧି ଦଳ

ଭୁବନେଶ୍ୱର: ରାଜଧାନୀର ଝାରପଡ଼ା ଗଣେଶ ମଣ୍ଡପ ହାଟ ଉଚ୍ଛେଦ ପ୍ରତିବାଦରେ ବିଜେପି ଓ କଂଗ୍ରେସର ପ୍ରତିନିଧି ଦଳ ଲକ୍ଷ୍ମୀସାଗର ଥାନାରେ ପହଞ୍ଚିଛନ୍ତି। ଏଣେ ବ୍ୟବସାୟୀମାନେ ବି କ୍ଷତିପୂରଣ ଦାବିରେ ଥାନା ପହଞ୍ଚିଛନ୍ତି। କ୍ଷତିପୂରଣ ଦିଆ ନ ଗଲେ ଆନ୍ଦୋଳନ ହେବ ବୋଲି ବିଜେପି ନେତାମାନେ କହିଛନ୍ତି। ତେଣେ ଘଟଣାସ୍ଥଳକୁ ମେୟର ଆସନ୍ତୁ ବୋଲି ଦାବି କଂଗ୍ରେସ ଦାବି କରିଛି।

ସୂଚନାଯୋଗ୍ୟ, ଝାରପଡ଼ା ଗଣେଶ ମଣ୍ଡପ ହାଟ ଉଚ୍ଛେଦ ପ୍ରତିବାଦରେ ଗତ ଶକ୍ରବାର ଦିନ ବିଜେପି ଓ ସ୍ଥାନୀୟ ବ୍ୟବସାୟୀଙ୍କ ପକ୍ଷରୁ କଟକ-ପୁରୀ ରାସ୍ତାର ଲକ୍ଷ୍ମୀସାଗର ଗୋଲେଇ ଛକ ନିକଟରେ ରାସ୍ତା ଅବରୋଧ କରାଯାଇଥିଲା। ଦୋକାନୀମାନଙ୍କୁ କ୍ଷତିପୂରଣ ଓ ଥଇଥାନ ଦାବିରେ ରାସ୍ତା ଅବରୋଧ କରାଯାଇଥିଲା। ଗତ ପୌର ନିର୍ବାଚନରେ ବିଜେପିର ମେୟର ପ୍ରାର୍ଥୀ ହୋଇଥିବା ଡକ୍ଟର ସୁନୀତି ମୁଣ୍ଡ, ବରିଷ୍ଠ ବିଜେପି ନେତା ବାବୁ ସିଂହ, ଜଗନ୍ନାଥ ପ୍ରଧାନ ଓ ସ୍ଥାନୀୟ ବିଜେପି କର୍ପୋରେଟର୍ ଧରିତ୍ରୀ ଜେନା ପ୍ରମୁଖ ମଧ୍ୟ ରାସ୍ତା ଅବରୋଧରେ ସାମିଲ ହୋଇଥିଲେ। ପୁଲିସ ବିକ୍ଷୋଭକାରୀମାନଙ୍କୁ ଉଠାଇନେଉଥିବାର ଦେଖିବାକୁ ମିଳିଥିଲା। ଯେପର୍ଯ୍ୟନ୍ତ ବ୍ୟବସାୟୀମାନେ ନ୍ୟାର୍ଯ୍ୟ ଦାବି ପରଇବେ ନାହିଁ, ସେ ପର୍ଯ୍ୟନ୍ତ ଏ ଆନ୍ଦୋଳନ ଜାରି ରହିବ ବୋଲି ବିଜେପି ନେତା ବାବୁ ସିଂହ କହିଥିଲେ।

ଏହି ସମୟରେ ପୁଲିସ ଓ ବିକ୍ଷୋଭକାରୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଦେଖିବାକୁ ମିଳିଥିଲା। ୩ ଏକର ୨୦୭ ଡେସମିଲ ଜାଗାରେ ୨୦୦ରୁ ଉର୍ଦ୍ଧ୍ବ ଦୋକାନ ଉଚ୍ଛେଦ ହୋଇଛି। ଉଚ୍ଛେଦ ବେଳେ ୧୪୪ ଧାରା ଲାଗୁ କରାଯାଇଥିଲା। ଏହାକୁ ନେଇ ଦୁଇ ଜଣ ଲୋକ ଆସି ଗାଳିଗୁଲଜ କରିବାରୁ ପୁଲିସ ଉଭୟଙ୍କୁ ଅଟକ ରଖିଥିବାର ସୂଚନା ମିଳିଥିଲା।