ଭୁବନେଶ୍ବର: ରାଜ୍ୟରେ ଏକାକୀ ସରକାର ଗଠନ କରିବା ପରେ ବିଜେପି ରାଜ୍ୟର ଏକ ନମ୍ବର ରାଜନୈତିକ ଦଳ ହେବାକୁ ଜୋରଦାର୍ ଉଦ୍ୟମ ଚଳାଇଛି। ସଦସ୍ୟତା ଅଭିଯାନ ଶେଷ ହେବା ପରେ ମଣ୍ଡଳ ସଭାପତି, ଜିଲ୍ଲା ସଭାପତି ଓ ରାଜ୍ୟ ସଭାପତି ଚୟନ ପ୍ରକ୍ରିୟା କରିବାକୁ ନିଷ୍ପତ୍ତି ହୋଇଥିଲା। ଡିସେମ୍ବର ୩୧ ସୁଦ୍ଧା ମଣ୍ଡଳ ସଭାପତି, ଜାନୁଆରି ୫ ସୁଦ୍ଧା ଜିଲ୍ଲା ସଭାପତି ଏବଂ ଜାନୁଆରି ୧୫ ସୁଦ୍ଧା ରାଜ୍ୟ ସଭାପତି ଚୟନ କରିବାକୁ ଜାତୀୟ ବିଜେପି ପକ୍ଷରୁ କଣ୍ଟ ଧାର୍ଯ୍ୟ ହୋଇଥିଲା। ହେଲେ ଏପର୍ଯ୍ୟନ୍ତ ଜିଲ୍ଲା ସଭାପତି ଚୟନ ହୋଇପାରିଲାନି। ଜିଲ୍ଲା ସଭାପତି ଚୟନ ହୋଇନଥିବାରୁ ‌କେବେ ରାଜ୍ୟ ସଭାପତି ଚୟନ ହେବେ ସେନେଇ ଏବେ ରାଜ୍ୟ ବିଜେପିକୁ ଚିନ୍ତା ଘାରିଲାଣି। ରାଜ୍ୟ ସଭାପତି ଚୟନ କଣ୍ଟ ଆଉ ଦୁଇ ଦିନରେ ପୂରିବ। ରାଜ୍ୟ ବିଜେପି ଏବେ ସାଙ୍ଗଠନିକ ନିର୍ବାଚନ ପ୍ରକ୍ରିୟାରେ ପଛେଇ ଯାଇଥିବା ନେଇ ଦଳର ଗୋଷ୍ଠୀ କନ୍ଦଳ ବଡ଼ କାରଣ ଥିବା କୁହାଯାଉଛି। ଦଳର ଶୀର୍ଷ ସ୍ତରରେ ଯେତିକି ବିବାଦ ଅଛି ଜିଲ୍ଲା ସ୍ତରରେ ଥିବା ବିବାଦ ତା’ଠାରୁ ଅଧିକ ବଳିଗଲାଣି। ଓଡ଼ିଶା ବିଜେପି ଏଥର ସବୁଠୁ ଅଧିକ ୭୮ଟି ବିଧାୟକ ଏବଂ ୨୦ଟି ସାଂସଦ ଜିତିଛି। ପୂର୍ବରୁ ଏତେ ସଂଖ୍ୟକ ବିଧାୟକ କି ସାଂସଦ ଦଳ ପାଖରେ ନଥିଲେ। ଏହାହିଁ ବିଜେପିର ସାଙ୍ଗଠନିକ କାର୍ଯ୍ୟକର୍ତ୍ତା ଓ ପଦ ପଦବି ନିଯୁକ୍ତିରେ ବଡ଼ ବାଧକ ସାଜିଛି। ଏବେ ଜିଲ୍ଲା ସଙ୍ଗଠନକୁ କେଉଁ ସାଂସଦ, ବିଧାୟକ ହାତରେ ରଖିବେ ତାହାକୁ ନେଇ ଟଣାଓଟରା ଚାଲିଛି। 

Advertisment

ବହୁ ସ୍ଥାନରେ ସାଂସଦମାନେ ସେମାନଙ୍କ ପସନ୍ଦର ନେତାଙ୍କୁ ମଣ୍ଡଳ ସଭାପତି ଓ ଜିଲ୍ଲା ସଭାପତି କରିବାକୁ ଚାହୁଁଛନ୍ତି। ହେଲେ କେତେକ ସ୍ଥାନରେ ବିଧାୟକମାନେ ତାଙ୍କ ନିର୍ବାଚନମଣ୍ଡଳୀରେ ତାଙ୍କ ପସନ୍ଦର ନେତା ହିଁ ମଣ୍ଡଳ ସଭାପତି ହେବେ ବୋଲି କହୁଛନ୍ତି। ଆଉ କେତେକ ସ୍ଥାନରେ ଯେଉଁଠି ବିଜେଡି, କଂଗ୍ରେସ  ଛାଡ଼ି କିମ୍ବା ଟିକେଟ ନପାଇ ଯେଉଁମାନେ ବିଜେପିରେ ମିଶିଥିଲେ ସେମାନେ ବି ତାଙ୍କ ପସନ୍ଦର ଲୋକଙ୍କୁ ପଦପଦବି ଦେବାକୁ ଚାହୁଁଛନ୍ତି। ଜିଲ୍ଲା ସଭାପତି ଚୟନ ପାଇଁ କେତୋଟି ଜିଲ୍ଲାରେ ବସିଥିବା ପ୍ରସ୍ତୁତି ବୈଠକରେ ବି ଏଭଳି ପରିସ୍ଥିତି ଉପୁଜିଲାଣି। ଜିଲ୍ଲା ମୁଖ୍ୟାଳୟରେ ଥିବା ବିଜେପି ନେତା/ବିଧାୟକ, ଜିଲ୍ଲାର ସାଂସଦ, ଜିଲ୍ଲାରେ ଯଦି ମନ୍ତ୍ରୀ ଅଛନ୍ତି ସେମାନଙ୍କ ମଧ୍ୟରେ ଟଣାଓଟରା ଚାଲିଛି ଯେ କାହା ପସନ୍ଦର ନେତା ଜିଲ୍ଲା ସଭାପତି ହେବେ। ବିବାଦ ଏତେ ଜୋର୍‌ରେ ବଢ଼ିଯାଇଛି ଯେ ରାଜ୍ୟ ବିଜେପି ପକ୍ଷରୁ ବିଭିନ୍ନ ଜିଲ୍ଲା ଓ ନିର୍ବାଚନମଣ୍ଡଳୀକୁ ନିର୍ବାଚନ ପ୍ରଭାରୀ ପଠାଯାଇଥି‌ବାବେଳେ ସେମାନଙ୍କ କଥା କେହି ଶୁଣିବା ମୁଡ୍‌ରେ ନାହାନ୍ତି। ଯେଉଁଥିପାଇଁ ଜାନୁଆରି ୫ତାରିଖ ସୁଦ୍ଧା ଚୟନ ହେବାକୁ ଥିବା ଜିଲ୍ଲା ସଭାପତି ପ୍ରକ୍ରିୟାରେ ଏପର୍ଯ୍ୟନ୍ତ ଗୋଟିଏ ବି ଜିଲ୍ଲା ପାଇଁ ସଭାପତି ବଛା ହୋଇପାରିଲାନି। କେବଳ ଏତିକି ନୁହେଁ, ନିର୍ବାଚନ ପୂର୍ବ ପର୍ଯ୍ୟନ୍ତ ଯେଉଁମାନେ ଜିଲ୍ଲା ସଂଗଠନକୁ ସମ୍ଭାଳିଥିଲେ ସେମାନେ ତାଙ୍କ ପସନ୍ଦର ନେତାଙ୍କୁ ପଦପଦବି ଦେବାକୁ ଚାହୁଁଛନ୍ତି। କିନ୍ତୁ ଏବେ ନିର୍ବାଚିତ ନେତା ତାଙ୍କୁ ପାଖ ମଡ଼ାଉନାହାନ୍ତି। ହେଲେ ସଂଗଠନ ସେମାନଙ୍କ ପାଖରେ ଥିବାରୁ ନିର୍ବାଚିତ ପ୍ରତିନିଧିଙ୍କ ଚୟନକୁ ବହୁ ଜାଗାରେ କଡ଼ା ବିରୋଧ ହେଉଛି।

ଅପରପକ୍ଷେ ଜାନୁଆରି ୩୧ ତାରିଖ ସୁଦ୍ଧା ବିଜେପିର ରାଷ୍ଟ୍ରୀୟ ସଭାପତି ଚୟନ ହେବାକୁ ଥିବାରୁ ଏହା ପୂର୍ବରୁ ଧାର୍ଯ୍ୟ ସମୟ ମଧ୍ୟରେ ରାଜ୍ୟ ସଭାପତି ଓ ରାଷ୍ଟ୍ରୀୟ ପରିଷଦ ସଦସ୍ୟ ନିର୍ବାଚନ ପ୍ରକ୍ରିୟା‌ ଶେଷ କରିବାକୁ ଜାତୀୟ ବିଜେପି ପକ୍ଷରୁ ବିହାରର ସାଂସଦ ସଂଜୟ ଜୟସ୍ବାଲଙ୍କୁ ନିର୍ବାଚନ ଅଧିକାରୀ ଭାବେ ନିଯୁକ୍ତି ଦିଆଯାଇଛି। ଜାନୁଆରି ୨ତାରିଖରୁ ଏହି ନିଯୁକ୍ତି ଦିଆଯାଇଥିଲେ ହେଁ ଶ୍ରୀ ଜୟସ୍ବାଲ ଏପର୍ଯ୍ୟନ୍ତ ଓଡ଼ିଶା ଆସିନାହାନ୍ତି। ତେଣୁ କେବେ ଓ କିପରି ଦଳର ସାଙ୍ଗଠନିକ ନିର୍ବାଚନ ପ୍ରକ୍ରିୟା ଶେଷ ହେବ ‌ତାହା ଏବେ ଦଳୀୟ ନେତାଙ୍କୁ ଘାରିଛି। ବିଜେପିର ଜଣେ ବରିଷ୍ଠ ନେତାଙ୍କ କହିବାନୁଯାୟୀ, ଏବେ ରାଷ୍ଟ୍ରୀୟ ସଭାପତି ଚୟନ ପାଇଁ ଯାହା ଯାହା ଯୋଗ୍ୟତା ଦରକାର ଓଡ଼ିଶା ବିଜେପି ପୂରଣ କରିବାକୁ ଲକ୍ଷ୍ୟ ରଖିଛି। ସରକାରୀ ଦଳ ମାନେ ବହୁ ନେତା ପଦପଦବି ପାଇବାକୁ ଆଶାୟୀ ଅଛନ୍ତି। ହେଲେ ସମସ୍ତଙ୍କୁ ତ ପଦପଦବି ମିଳିବନି। ଯେଉଁଠି ବିବାଦ ନାହିଁ ସେଠାରେ ମଣ୍ଡଳ ସଭାପତି ନିର୍ବାଚନ ସରିଛି। ଜିଲ୍ଲା ସଭାପତି ବି ନିର୍ବାଚନ ସରିଯିବ। ଆମର ଦଳର ସମ୍ବିଧାନ ଅନୁଯାୟୀ, ୫୦% ମଣ୍ଡଳ ସଭାପତି ନିର୍ବାଚିତ ହେବା ପରେ ଜିଲ୍ଲା ସଭାପତି ନିର୍ବାଚନ ପ୍ରକ୍ରିୟା ହେବ। ୫୦% ଜିଲ୍ଲା ସଭାପତି ନିର୍ବାଚିତ ହେଲେ ରାଜ୍ୟ ସଭାପତି ନିର୍ବାଚନ ପ୍ରକ୍ରିୟା ଆରମ୍ଭ ହୋଇପାରିବେ। ଏହାପରେ ରାଷ୍ଟ୍ରୀୟ ପରିଷଦ ସଦସ୍ୟ ନିର୍ବାଚନ ହେବ। ସେମାନେ ‌ହିଁ ରାଷ୍ଟ୍ରୀୟ ସଭାପତି ବାଛିବେ। ଏହାକୁ ଆଧାର କରି ଏବେ ଦଳ ଆଗଉଛି। ଏବେ ରାଜ୍ୟରେ ବିଜେପିର ୧୦୩୭ଟି ମଣ୍ଡଳ ଥିବା ବେଳେ ଏଥିରୁ ପ୍ରାୟ ୭୫୦ଟି ମଣ୍ଡଳ ସଭାପତି ନିଯୁକ୍ତ ହୋଇସାରିଲେଣି। ୩୭ଟି ସାଙ୍ଗଠନିକ ଜିଲ୍ଲା ଥିବାବେଳେ ଏଥିରୁ ଖୁବ୍‌ ଶୀଘ୍ର ୨୦ରୁ ୨୨ଟି ଜିଲ୍ଲା ସଭାପତି ନିଯୁକ୍ତ କରିବାକୁ ଲକ୍ଷ୍ୟ ରଖାଯାଇଛି। ଏହାପରେ ରାଜ୍ୟ ସଭାପତି ନିର୍ବାଚନ ପ୍ରକ୍ରିୟା ଆରମ୍ଭ ହେବ। ନୂଆ ସଭାପତି ଆସିବା ପରେ ବାକି ମଣ୍ଡଳ ସଭାପତି ଓ ଜିଲ୍ଲା ସଭାପତି ନିର୍ବାଚନ ହେବ।