ବିଜେପି ନେତାଙ୍କୁ ଥାନାଧିକାରୀଙ୍କ ମାଡ଼, ପ୍ରତିବାଦରେ ଜାତୀୟ ରାଜପଥ ଅବରୋଧ
ଖଜୁରୀପଡାରେ ଉତ୍ତେଜନା, ଥାନା ଅଧିକାରୀଙ୍କୁ ମୁଖ୍ୟାଳୟକୁ ବଦଳି
ଫୁଲବାଣୀ/ଖଜୁରୀପଡ଼ା : ଜଣେ ବିଜେପି ନେତାଙ୍କୁ କନ୍ଧମାଳ ଜିଲ୍ଲା ଖଜୁରୀପଡ଼ା ଥାନାଧିକାରୀ ବିଚ୍ରାସ୍ତାରେ ପିଟିବା ଅଭିଯୋଗ ଆସିଛି। ଏହି ଘଟଣାକୁ କେନ୍ଦ୍ରକରି ଖଜୁରୀପଡ଼ାରେ ଉତ୍ତେଜନା ଦେଖାଦେଇଛି। ବିଜେପି, ଖଜୁରୀପଡ଼ା ବଣିକ ସଂଘ ଓ ସ୍ଥାନୀୟ ବୁଦ୍ଧିଜୀବୀମାନେ ଭୁବନେଶ୍ବର-ଫୁଲବାଣୀ ଜାତୀୟ ରାଜପଥକୁ ଅବରୋଧ ଜାରି ରଖିଛନ୍ତି। କନ୍ଧମାଳ ଏସ୍ପି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ଆଇଆଇସିଙ୍କୁ ମୁଖ୍ୟାଳୟକୁ ବଦଳି କରିଥିଲେ ମଧ୍ୟ ଆନ୍ଦୋଳନକାରୀଙ୍କ ଉପରେ କୌଣସି ପ୍ରଭାବ ପଡ଼ିନି।
Sambad is now on WhatsApp
Join and get latest news updates delivered to you via WhatsApp
ଘଟଣାରୁ ପ୍ରକାଶ, ରବିବାର ଅପରାହ୍ଣ ସାଢ଼େ ୫ଟାରେ ଖଜୁରୀପଡ଼ା ଥାନାଧିକାରୀ ରମାକାନ୍ତ ପାତ୍ର ଉଠାଦୋକାନୀ ସରୋଜ ପ୍ରଧାନ ଏବଂ ତାଙ୍କ ପତ୍ନୀଙ୍କୁ ନିସ୍ତୁକ ମାଡ଼ ମାରିଥିଲେ। ଏହାସହ ଦୋକାନକୁ ଭାଙ୍ଗି ଦେଇଥିଲେ। ଖଜୁରୀପଡ଼ା ବିଜେପି ମଣ୍ଡଳ ଯୁବ ମୋର୍ଚ୍ଚା ସଭାପତି ରାଇକିଶୋର ପ୍ରଧାନ ସେଠାରେ ପହଞ୍ଚି ଘଟଣା ସଂପର୍କରେ ଆଲୋଚନା କରିଥିଲେ। ଏହି ସମୟରେ ଉତ୍ତ୍ୟକ୍ତ ଥାନାଧିକାରୀ ତାଙ୍କୁ ମଧ୍ୟ ବିଚ୍ରାସ୍ତାରେ ମାଡ଼ ମାରିଥିଲେ। ଏହାର ପ୍ରତିବାଦରେ ଖଜୁରୀପଡ଼ା ଥାନାଧିକାରୀଙ୍କ ଦବଙ୍ଗଗିରିକୁ ବିରୋଧ କରି ସ୍ଥାନୀୟ ବଣିକ ସଂଘର କର୍ମକର୍ତ୍ତା, ବିଜେପି କର୍ମକର୍ତ୍ତା ଏବଂ ସ୍ଥାନୀୟ ଅଞ୍ଚଳର ବୁଦ୍ଧିଜୀବୀ ଖଜୁରୀପଡ଼ା ମୁଖ୍ୟରାସ୍ତାକୁ ଅବରୋଧ କରିଛନ୍ତି। ଥାନାଧିକାରୀଙ୍କୁ ଗିରଫ କରାନଗଲେ ରାସ୍ତା ଅବରୋଧ ଜାରି ରହିବ ଏବଂ ଆନ୍ଦୋଳନକୁ ବ୍ୟାପକ କରାଯିବ ବୋଲି ବିଜେପି ନେତା ଭଗବାନ ମହାନ୍ତି ଚେତାବନୀ ଦେଇଛନ୍ତି। ସେହିଭଳି ଫୁଲବାଣୀରୁ ବିଜେପିର ଶତାଧିକ କର୍ମକର୍ତ୍ତା ଘଟଣାସ୍ଥଳରେ ପହଞ୍ଚି ରାସ୍ତା ଅବରୋଧରେ ସାମିଲ ହୋଇଛନ୍ତି। ରିପୋର୍ଟ ଲେଖାହେଲା ବେଳକୁ ରାସ୍ତା ଅବରୋଧ ଜାରି ରହିଛି। ଫଳରେ ଉଭୟ ପାର୍ଶ୍ବରେ ବହୁସଂଖ୍ୟାରେ ଯାନବାହନ ଅଟକି ରହିଛି। ଭୁବନେଶ୍ବରରୁ ଫୁଲବାଣୀକୁ ଯାତାୟାତ କରୁଥିବା ସମସ୍ତ ବସ୍ ଅଟକି ରହିବା ଫଳରେ ଯାତ୍ରୀମାନେ ଫସି ରହିଛନ୍ତି। ସେହିଭଳି ଥାନାଧିକାରୀଙ୍କଠାରୁ ମାଡ଼ ଖାଇଥିବା ଉଠାଦୋକାନୀ ସରୋଜ ପ୍ରଧାନଙ୍କ ପତ୍ନୀ ମୋହିନୀ ପ୍ରଧାନ ଏବଂ ବିଜେପି ଯୁବ ମୋର୍ଚ୍ଚା ମଣ୍ଡଳ ସଭାପତି ରାଇକିଶୋର ପ୍ରଧାନ ଖଜୁରୀପଡ଼ା ଥାନାରେ ଦୁଇଟି ଏତଲା ଦେଇଛନ୍ତି।