ଯାଜପୁରରେ ବିଜେପି ଭାଗ ଭାଗ: ଟିକେଟ ପାଇଁ ‌ଶକ୍ତି ପ୍ରଦର୍ଶନ

ଯାଜପୁର: ଯାଜପୁର ଜିଲ୍ଲାରେ ଶାସକ ବିଜେଡିକୁ ମୁଖ୍ୟତଃ ବିଜେପି ଟକ୍କର ଦେଉଛି। ନିକଟରେ ଶେଷ ହୋଇଥିବା ୫ଟି ରାଜ୍ୟର ବିଧାନସଭା ନିର୍ବାଚନରେ ବିଜେପିର ଭଲ ପ୍ରଦର୍ଶନ ଯୋଗୁଁ ତୃଣମୂଳରେ ଦଳୀୟ କର୍ମୀ ଓ ସମର୍ଥକ ବେଶ ଉତ୍ସାହିତ ଅଛନ୍ତି। ମାତ୍ର ଯାଜପୁର ଜିଲ୍ଲାର ଏକାଧିକ ନିର୍ବାଚନମଣ୍ଡଳୀରେ ବିଜେପିର ଗୋଷ୍ଠୀ ବିବାଦ ଓ ଦଳୀୟ ଟିକଟ ପାଇବା ପାଇଁ ନେତାଙ୍କ ଶକ୍ତି ପ୍ରଦର୍ଶନ ଦଳ ପାଇଁ ଚିନ୍ତାର କାରଣ ହୋଇଛି। ଯାଜପୁର ଜିଲ୍ଲାର ୭ଟି ବିଧାନସଭା ଆସନ ମଧ୍ୟରୁ ୪ଟି ଆସନରେ ବିଜେପିର ଏକାଧିକ ନେତା ଏବେ ଟିକଟ ପାଇଁ ଦାବିଦାର। ଆଶାୟୀ ବିଧାୟକ ପ୍ରାର୍ଥୀମାନେ ନିଜ ନିଜ ସମର୍ଥକମାନଙ୍କୁ ନେଇ ଶକ୍ତି ପ୍ରଦର୍ଶନ କରିବାରେ ଲାଗିପଡ଼ିଲେଣି। ଆଜି କୋରେଇ ଓ ଧର୍ମଶାଳାରେ ସମାନ୍ତରାଳ ଭାବେ ବିଜେପିର ଦୁଇ ଦୁଇଟି କାର୍ଯ୍ୟକ୍ରମ ହୋଇଛି।

ପ୍ରକାଶ ଥାଉକି ଗତ ବିଧାନସଭା ନିର୍ବାଚନରେ ବଡ଼ଚଣା ଓ ବରୀରେ ବିଜେପି ଶାସକ ଦଳକୁ କଡ଼ା ଟକ୍କର ଦେଇଥିଲା। ଅଳ୍ପ ଭୋଟ ବ୍ୟବଧାନରେ ବଡ଼ଚଣା ଓ ସାନି ମତଦାନ ପରେ ବରୀରେ ବିଜେଡି ପ୍ରାର୍ଥୀ ବାଜିମାତ କରିଥିଲେ। ଏବେ ଗୋଷ୍ଠୀ ବିବାଦ ପ୍ରାୟ ସବୁ ଦଳକୁ ଆକ୍ରାନ୍ତ କରିଥିବା ବେଳେ ବିଜେପି ସେ ଦିଗରେ ଆଗରେ ଅଛି। ବରୀ ଓ କୋରେଇରେ ବିଜେଡିର ଏକାଧିକା ନେତା ନିର୍ବାଚନ ପାଇଁ ଶକ୍ତି ପ୍ରଦର୍ଶନ କରୁଛନ୍ତି। ଅପରପକ୍ଷରେ ସୁକିନ୍ଦା, ବଡ଼ଚଣା ଓ ବରୀ ବ୍ୟତୀତ ଅନ୍ୟ ୪ଟି ଆସନ ଧର୍ମଶାଳା, କୋରେଇ, ଯାଜପୁର ଓ ବିଂଝାରପୁରରେ ବିଜେପିର ଏକାଧିକ ନେତା ଦଳୀୟ ବ୍ୟାନରରେ କର୍ମୀମାନଙ୍କୁ ନେଇ ଭିନ୍ନ ଭିନ୍ନ କାର୍ଯ୍ୟକ୍ରମ କରିବାରେ ଲାଗିଛନ୍ତି। ଆଜି ଧର୍ମଶାଳା ବ୍ଲକ୍‌ରେ ରାଜ୍ୟ ସରକାରଙ୍କର ଦୁର୍ନୀତି, ଅନୀତିକୁ ବିରୋଧ କରାଯିବା ସହ କେନ୍ଦ୍ର ସରକାରଙ୍କର ଜନହିତକର କାର୍ଯ୍ୟକ୍ରମର ପ୍ରଚାର ପାଇଁ ବିଜେପି ନେତ୍ରୀ ସ୍ମୃତିରେଖା ପହି ଓ ସର୍ବେଶ୍ବର ବେହୁରା ଏକାଠି ହୋଇଥିଲେ। ଏଥିରେ ଜିଲ୍ଲା ସଭାପତି ଗୌତମ ରାୟ, ବିଭିନ୍ନ ନିର୍ବାଚନମଣ୍ଡଳୀର ନେତା ସାମିଲ ହୋଇଥିଲେ। ଅପରପକ୍ଷରେ ଆଜି ଧର୍ମଶାଳାର ଯୁବନେତା ହିମାଂଶୁ ଶେଖର ସାହୁ (ଲିକୁ ସାହୁ) ଓ ପୂର୍ବତନ ଜିଲ୍ଲାପରିଷଦ ସଭାପତି ବିଜେଡିର ପୁରୁଖାନେତା ନରେଶ ମହାନ୍ତି ପ୍ରମୁଖ ଭୁବନେଶ୍ବରରେ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ଉପସ୍ଥିତିରେ ବିଜେପିରେ ସାମିଲ ହୋଇଛନ୍ତି। ସେଠାରୁ ଫେରିବା ପରେ ଚଣ୍ଡିଖୋଲରୁ କୁଆଖିଆ ପର୍ଯ୍ୟନ୍ତ ବିଶାଳ ଶୋଭାଯାତ୍ରାରେ ଆସି ଶକ୍ତି ପ୍ରଦର୍ଶନ କରିଛନ୍ତି। ଯାହାକୁ ନେଇ ଧର୍ମଶାଳାର ବିଜେପି କର୍ମୀ ଓ ସ୍ଥାନୀୟ ନେତୃତ୍ବ ଦ୍ବନ୍ଦ୍ବରେ ପଡ଼ିଛନ୍ତି।

ଅନୁରୂପ ଭାବେ କୋରେଇରେ ଗତଥରର ବିଜେପି ବିଧାୟକ ପ୍ରାର୍ଥୀ ବିଶ୍ବଜିତ ନାୟକ ବିଭିନ୍ନ କାର୍ଯ୍ୟକ୍ରମ କରୁଛନ୍ତି। ଏଭଳି ସ୍ଥିତିରେ ଆଜି ବିଜେପିର ଯୁବନେତା ଆଲେକଜାଣ୍ଡର ଦାସ ଜନଜାଗରଣ କାର୍ଯ୍ୟକ୍ରମ କରି ଶକ୍ତି ପ୍ରଦର୍ଶନ କରିଛନ୍ତି। ଶ୍ରୀ ଦାସ ଆଗାମୀ ନିର୍ବାଚନରେ ପ୍ରାର୍ଥୀ ହେବେ ବୋଲି ତାଙ୍କ ସମର୍ଥକମାନେ ସାମାଜିକ ଗଣମାଧ୍ୟମରେ ପ୍ରଚାର କରୁଛନ୍ତି। ଜିଲ୍ଲାର ବିଭିନ୍ନ ନିର୍ବାଚନମଣ୍ଡଳୀରେ ବିଜେପି ନେତା ଭାଗ ଭାଗ ହୋଇଯାଇଥିବାରୁ ରାଜନୈତିକ ପାଣିପାଗ ଗୋଳିଆ ହେବାରେ ଲାଗିଛି।