ରାଜ୍ୟର ତିନି ପଛୁଆ ଜିଲ୍ଲା ପାଇଁ ମୁଖ୍ୟମନ୍ତ୍ରୀଙ୍କ ଘୋଷଣା ଲୋକ ଦେଖାଣିଆ : ବିଜେପି
ତିନି ଜିଲ୍ଲାରେ ୨୫୦ରୁ ଅଧିକ ଡାକ୍ତର ପଦବି ଖାଲି, ବିନା ଡାକ୍ତରରେ କି ରୋଗୀ ସେବା କରିବେ ସରକାର
ଭୁବନେଶ୍ବର : ମୋ ସରକାର ଯୋଜନା ପରିପ୍ରେକ୍ଷୀରେ ରାଜ୍ୟର ତିନି ପଛୁଆ ଜିଲ୍ଲା ମାଲକାନଗିରି, ନବରଙ୍ଗପୁର ଓ କୋରାପୁଟ ପାଇଁ ମୁଖ୍ୟମନ୍ତ୍ରୀଙ୍କ ଘୋଷଣାକୁ ସମାଲୋଚନା କରିଛି ବିଜେପି। ଏହି ଘୋଷଣା ସ୍ଥାନୀୟ ସମସ୍ୟାର ସମାଧାନରେ ସହାୟକ ହେବ ନାହିଁ, ବରଂ କେବଳ ଲୋକଦେଖାଣିଆ ପଦକ୍ଷେପ ବୋଲି ମାଲକାନଗିରି ବିଧାୟକ ଆଦିତ୍ୟ ମାଢ଼ୀ, ନବରଙ୍ଗପୁରର ପୂର୍ବତନ ସାଂସଦ ବଳଭଦ୍ର ମାଝୀ ଓ କୋରାପୁଟର ପୂର୍ବତନ ସାଂସଦ ଜୟରାମ ପାଙ୍ଗୀ ଏକ ମିଳିତ ପ୍ରେସ୍ ବିବୃତିରେ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ବିଜେପିର ଏହି ତିନି ନେତା କହିଛନ୍ତି, ରାଜ୍ୟ ସ୍ବାସ୍ଥ୍ୟ ମନ୍ତ୍ରୀ ଗତ ବିଧାନସଭାରେ କୋରାପୁଟ ଜିଲ୍ଲାରେ ୧୧୨, ନବରଙ୍ଗପୁରରେ ୯୯ ଓ ମାଲକାନଗିରିରେ ୬୪ ଡାକ୍ତର ପଦବି ଖାଲି ଅଛି ବୋଲି ତଥ୍ୟ ଦେଇଥିଲେ। ବିନା ଡାକ୍ତରରେ ନବୀନ ବାବୁ କି ରୋଗୀ ସେବା କରିବେ ? କୋରାପୁଟ ମେଡିକାଲ କଲେଜରେ ଥିବା ୧୫ଟି ଆଇସିୟୁ ବେଡ୍ ମଧ୍ୟରୁ ଭେଷଜ, ଶଲ୍ୟ ଓ ଶିଶୁରୋଗ ବିଭାଗକୁ ମାତ୍ର ୫ଟି େଲଖା ଦିଆଯିବା ସମୁଦ୍ରକୁ ଶଙ୍ଖେ। ଏହି ମେଡିକାଲ୍ କଲେଜରେ ଭେଷଜ ବିଭାଗର ପ୍ରଫେସର ଓ ଅାସିଷ୍ଟାଣ୍ଟ୍ ପ୍ରଫେସର ପଦବି ଖାଲି ଅଛି। ଏଠାରେ କାଜୁଆଲିଟି ଏ ପର୍ଯ୍ୟନ୍ତ କାର୍ଯ୍ୟକ୍ଷମ ହୋଇ ନାହିଁ। ୩୦ଟି ଫାର୍ମାସିଷ୍ଟ ପଦବି ମଧ୍ୟରୁ ମାତ୍ର ୪ଟି ପୂରଣ ହୋଇଛି। ଏଥିରେ କି ସ୍ବାସ୍ଥ୍ୟସେବା ଯୋଗାଇ ଦିଆଯାଉଛି ବୋଲି ବିଜେପି ପ୍ରଶ୍ନ କରିଛି।
ମାଲକାନଗିରି, ନବରଙ୍ଗପୁର ଓ କୋରାପୁଟ ଜିଲ୍ଲାେର ଗର୍ଭବତୀ ମା’ ଓ ନବଜାତକ ମୃତ୍ୟୁ ହାର ଉଦ୍ବେଗଜନକ ରହିଛି। ୨୦ ବର୍ଷରେ ଏହି ଜିଲ୍ଲାର ସ୍ବାସ୍ଥ୍ୟସେବା କାହିଁକି ବିପର୍ଯ୍ୟସ୍ତ ହୋଇପଡ଼ିଛି ବୋଲି ସରକାର ତାହାର ଉତ୍ତର ଦିଅନ୍ତୁ। ମାଲକାନଗିରି ଜିଲ୍ଲାରେ ଜାପାନୀ ଜ୍ବର ସମୟରେ ଉପାନ୍ତ ଅଞ୍ଚଳମାନଙ୍କରେ ଡାକ୍ତର ନ ଥିଲେ। ଏବେ ବି ପରିସ୍ଥିତିରେ ଉନ୍ନତି ଆସି ନାହିଁ। ତେଣୁ ମୁଖ୍ୟମନ୍ତ୍ରୀ ପ୍ରତୀକାତ୍ମକ ଭେଳିକି ନ ଦେଖାଇ ଜିଲ୍ଲାବାସୀଙ୍କ ପାଇଁ ସ୍ବାସ୍ଥ୍ୟସେବା କ୍ଷେତ୍ରରେ ଠୋସ୍ ପଦକ୍ଷେପ ନେବାକୁ ବିଜେପିର ତିନି ନେତା ଦାବି କରିଛନ୍ତି।