ମେଡିକାଲ କଲେଜ ଓ ହସ୍ପିଟାଲ ପାଇଁ ରକ୍ତସଂଗ୍ରହ ଭ୍ୟାନ୍
ଭୁବନେଶ୍ବର : ସ୍ବେଚ୍ଛାକୃତ ରକ୍ତଦାନ କାର୍ଯ୍ୟକ୍ରମକୁ ବିକେନ୍ଦ୍ରୀକରଣ କରି ଏହାକୁ ଅଧିକ ସୁଦୃଢ଼ କରିବା ପାଇଁ ସ୍ବାସ୍ଥ୍ୟ ବିଭାଗ ନିଷ୍ପତ୍ତି ନେଇଛି। ରାଜ୍ୟରେ ଥିବା ୭ଟି ସରକାରୀ ମେଡିକାଲ କଲେଜ ଓ ହସ୍ପିଟାଲ ସମେତ ରାଉରକେଲା ଆର୍ଜିଏଚ୍ ଓ ବରଗଡ଼ ପାଇଁ ରକ୍ତ ସଂଗ୍ରହ ଭ୍ୟାନ୍ର ବ୍ୟବସ୍ଥା କରାଯିବ। ଘରୋଇ ଡାକ୍ତରଖାନାଗୁଡ଼ିକରେ ଥିବା ରକ୍ତଭଣ୍ଡାର ସହ ସମନ୍ବୟ ରଖି କାର୍ଯ୍ୟ କରିବାକୁ ପରାମର୍ଶ ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ରକ୍ତ ସଂଚାଳନ ପରିଷଦର ୩୧ତମ ପରିଚାଳନା କମିଟି ବୈଠକ ଆଜି ସ୍ବାସ୍ଥ୍ୟ ସଚିବ ଡା. ପ୍ରମୋଦ କୁମାର ମେହେର୍ଦାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି। ୨୦୧୯/୨୦ବର୍ଷ ପାଇଁ ୨୮ କୋଟି ୭୫ଲକ୍ଷ ଟଙ୍କାର ବ୍ୟୟବରାଦ ଅନୁମୋଦିତ ହୋଇଛି। ରାଜ୍ୟରେ ଆବଶ୍ୟକ ପଡ଼ୁଥିବା ୪.୫ଲକ୍ଷ ୟୁନିଟ୍ ରକ୍ତ ସଂଗ୍ରହ ଧାର୍ଯ୍ୟ ଲକ୍ଷ୍ୟକୁ ଶତ ପ୍ରତିଶତ ହାସଲ କରିବା ପାଇଁ ନିଷ୍ପତ୍ତି ହୋଇଛି। ସରକାରୀ ଡାକ୍ତରଖାନାମାନଙ୍କରେ ଚିକିତ୍ସିତ ରୋଗୀମାନଙ୍କୁ ସରକାର ମାଗଣାରେ ରକ୍ତ ଯୋଗାଇ ଦେଉଛନ୍ତି। ଏହାସହ ହେମୋଗ୍ଲୋବିନୋପାଥି ରୋଗୀଙ୍କ ପାଇଁ ଯାତାୟାତ ବାବଦକୁ ୫ଶହ ଟଙ୍କା ପ୍ରଦାନ କରାଯାଉଛି। ୨୦୧୮ ମାର୍ଚ ୧ତାରିଖରୁ ଚଳିତ ମାର୍ଚ ୩୧ତାରିଖ ସୁଦ୍ଧା ୧୧,୭୦୬ଜଣ ଏଭଳି ରୋଗୀ ଉପକୃତ ହୋଇଛନ୍ତି। ରକ୍ତ ସଂଚାଳନ ପରିଷଦ କାର୍ଯ୍ୟଧାରାରେ ପରିବର୍ତନ ଆଣି ସ୍ବେଚ୍ଛାକୃତ ରକ୍ତ ସଂଗ୍ରହ କ୍ୟାମ୍ପ ଆୟୋଜନ ଆଦିକୁ ଅଧିକ ସୁଦୃଢ଼ କରିବାକୁ ନିର୍ଦେଶ ଦିଆଯାଇଛି।