ଯାଜପୁର: ଯାଜପୁର ଜିଲ୍ଲାରେ ଦଳୀୟ ସଦସ୍ୟତା ସଂଗ୍ରହ ଅଭି‌ଯାନକୁ ନେଇ ବିଜେପି-ବିଜେଡି ମୁହାଁମୁହିଁ ହୋଇଛନ୍ତି। କିଛିଦିନ ତଳେ ବଡ଼ଚଣାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବିଜେପିର ସଦସ୍ୟତା ସଂଗ୍ରହ ଅଭିଯାନରେ ନବୀନ ସରକାର ଓ  ଯାଜପୁର ଜିଲ୍ଲାର ତିନି ପରିବାରକୁ ଟାର୍ଗେଟ୍ କରିଥିବା ବେଳେ ଆଜି ବିଜେଡି ସଦସ୍ୟତା ସଂଗ୍ରହ କାର୍ଯ୍ୟକ୍ରମରେ ପୂର୍ବତନ ବିଧାୟକ ପ୍ରଣବପ୍ରକାଶ ଦାସ (ବବି) ଏହାର କଡ଼ା ଜବାବ ରଖିଛନ୍ତି। ଯାଜପୁର ବିଜେଡିରେ ବିବାଦ ଥିଲା, ଏବେ ତାହା ଆଉ ନାହିଁ। ଯାଜପୁର ବିଜେଡି ଏକାଠି। ଯାଜପୁର ବିଜେଡି କହିଲେ ବବି-ଜିତୁ-ଡାନି ବୋଲି କହି ସେ ମୁଖ୍ୟମନ୍ତ୍ରୀଙ୍କ ତିନି ପରିବାର ଆକ୍ଷେପର ଉତ୍ତର ରଖିଥିଲେ। ଗୌତମବୁଦ୍ଧ ସଂସ୍କୃତି ଭବନରେ ଆୟୋଜିତ ବିଜେଡିର ଜିଲ୍ଲାସ୍ତରୀୟ ସଦସ୍ୟତା ସଂଗ୍ରହ ଅଭିଯାନରେ ବିଜେଡି ନେତାମାନେ ରାଜ୍ୟର ବିଜେପି ସରକାରଙ୍କୁ ସମାଲୋଚନା କରିଛନ୍ତି। ଆସନ୍ତା ପଞ୍ଚାୟତ ନିର୍ବାଚନରେ ବିଜେଡିର ଶକ୍ତି କ’ଣ ତାହା ଦେଖାଇ ଦିଆଯିବ। ନୂ୍ଆ ସରକାର ଶାସନ କରିବା ଜାଣିନାହିଁ। ତିନି ମାସ ଭିତରେ ମା’, ଯୁବକ ଓ ଜନସାଧାରଣ ତାତିଲେଣି। ସରକାରକୁ ଠିକ୍ ବାଟକୁ ଆଣିବା ପାଇଁ ବିଜେଡି ସବୁବେଳେ ସତର୍କ ଥିବା କହି ପୂର୍ବତନ ବିଧାୟକ ପ୍ରୀତିରଂଜନ ଘଡ଼ାଇ ବିଜେପିକୁ କଡ଼ା ସମାଲୋଚନା କରିଥିଲେ। 

ଯାଜପୁର ବିଜେଡି କହିଲେ ବବି-ଜିତୁ-ଡାନି
ବିବାଦ ଥିଲା, ଏବେ ଏକାଠି: ବବି

Advertisment

ଏଥିରେ ବିଜେଡି ଜିଲ୍ଲା ସଭାପତି ସରୋଜ କୁମାର ମହାପାତ୍ର ଅଧ୍ୟକ୍ଷତା କରିଥିବା ‌ବେଳେ ଯାଜପୁର ବିଧାୟିକା ସୁଜାତା ସାହୁ, ବରୀ ବିଧାୟକ ବିଶ୍ବରଞ୍ଜନ ମଲ୍ଲିକ, ପୂର୍ବତନ ସାଂସଦ ଶର୍ମିଷ୍ଠା ସେଠୀ, ଯାଜପୁରର ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ, ଧର୍ମଶାଳା ପୂର୍ବତନ ବିଧାୟକ ପ୍ରଣବ କୁମାର ବଳବନ୍ତରାୟ, ସୁକିନ୍ଦାର ପୂର୍ବତନ ବିଧାୟକ ପ୍ରୀତିରଞ୍ଜନ ଘଡ଼ାଇ ପ୍ରମୁଖ ଉପସ୍ଥିତ ଥିଲେ। ବିଜେଡି ନେତାମାନେ ରାଜ୍ୟ ବିଜେପି ସରକାରକୁ କଡ଼ା ସମାଲୋଚନା କରିବା ସହିତ ବିଜେଡିର ଶକ୍ତି ବୃଦ୍ଧି କରିବାକୁ ଦଳୀୟ ସଙ୍ଗଠକ ଓ କର୍ମୀମାନଙ୍କୁ ଆହ୍ବାନ ଦେଇଥିଲେ। ସ୍ମରଣଯୋଗ୍ୟ, ଗତ ୨୯ ତାରିଖରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବଡ଼ଚଣାର ବୁଢ଼ାକେନ୍ଦୁଆ ଗ୍ରାମକୁ ଗସ୍ତ କରି ବିଜେପି ସଦସ୍ୟତା ଅଭିଯାନରେ ସାମିଲ ହୋଇ ନବୀନ ସରକାରରେ ନାରୀ ନିର୍ଯାତନା ଓ ବିକାଶ ନାମରେ ବିନାଶ କାର୍ଯ୍ୟକ୍ରମକୁ କଡ଼ା ସମାଲୋଚନା କରିଥିଲେ। ଯାଜପୁର ଭଳି ସମୃ୍ଦ୍ଧ ଜିଲ୍ଲାକୁ ବିଜେଡିର ୩ ପରିବାର ବହୁବର୍ଷ ହେଲା ବିକାଶ ନାମରେ ବିନାଶ କରିଥିବା କହି ସମାଲୋଚନା କରିଥିଲେ। ଜବାବରେ ଆଜି ବବି କାହାର ନାମ ନ ନେଇ ଯାଜପୁର ଜିଲ୍ଲାରେ ବିଜେଡି ଅର୍ଥ ବବି- ଜିତୁ- ଡାନିଙ୍କୁ ବୁ‌ଝାଏ ବୋଲି କହିଥିଲେ। ବବି- ଜିତୁ- ଡାନି ମଧ୍ୟରେ କିଛିଟା ସମସ୍ୟା ଥିଲା। ଏବେ ନବୀନ ପଟ୍ଟନାୟକଙ୍କ ନେତୃତ୍ବରେ ବିଜେଡିକୁ ଅଧିକ ସଙ୍ଗଠିତ କରିବା ପାଇଁ ଏହି ତିନିଜଣ ଏକ ହୋଇ କାମ କରିବେ ବୋଲି ସ୍ପଷ୍ଟ କରିଥଲେ।