କରୋନା ପାଇଁ ହଜିଗଲା ମାନବିକତା : ରାସ୍ତାରେ ୪ ଘଣ୍ଟା ପଡ଼ିରହିଲା ମୃତଦେହ
ଚିକିତ୍ସା ଅବହେଳା ଅଭିଯୋଗ, ଉତ୍ତେଜନା, ତହସିଲଦାର, ପୁଲିସ ପହଞ୍ଚିବା ପରେ ହେଲା ଶବ ସତ୍କାର
ପୁରୀ/ନିମାପଡ଼ା : କରୋନା ପାଇଁ ହଜିଗଲା ମାନବିକତା। ୪ ଘଣ୍ଟାରୁ ଅଧିକ ସମୟ ରାସ୍ତାରେ ପଡ଼ିରହିଲା କରୋନାରେ ମୃତ୍ୟୁବରଣ କରିଥିବା ବୃଦ୍ଧଙ୍କ ମୃତଦେହ। ଗତକାଲି ବିଳମ୍ବିତ ରାତିରେ ନିମାପଡ଼ା କଲେଜ କୋଭିଡ୍ କେୟାର ସେଣ୍ଟରରେ ଏଭଳି କିଛି ଦୃଶ୍ୟ ଅନେକଙ୍କୁ ମର୍ମାହତ କରିଛି। ସେପଟେ ଆକ୍ରାନ୍ତ ଓ ପରିବାର ଲୋକେ ଉତ୍ତମ ଚିକିତ୍ସା ପାଇଁ ପୁରୀ ଅବା ଭୁବନେଶ୍ବରକୁ ପଠାଇବାକୁ ବାରମ୍ବାର ନିବେଦନ କରିଥିଲେ। କିନ୍ତୁ ଡାକ୍ତରଖାନା କର୍ତ୍ତୃପକ୍ଷ ସେମାନଙ୍କ କଥା ଶୁଣିନଥିଲେ। ଯେଉଁଥିପାଇଁ ବୃଦ୍ଧ ଜଣକ ଛଟପଟ ହୋଇ ପ୍ରାଣ ହରାଇଥିବା ପରିବାର ଲୋକେ ଅଭିଯୋଗ କରିଛନ୍ତି। ଏହାକୁ ନେଇ ଗତକାଲି ରାତିରେ ଉତ୍ତେଜନା ପ୍ରକାଶ ପାଇଥିଲା। ତହସିଲଦାର, ପୁଲିସ ପହଞ୍ଚି ବୁଝାସୁଝା କରିବା ପରେ ପରିସ୍ଥିତି ଶାନ୍ତ ପଡ଼ିବା ସହ ବୃଦ୍ଧଙ୍କ ଅନ୍ତିମ ସଂସ୍କାର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ନିମାପଡ଼ା କାଜିପାଟଣାର ମହେଶ୍ବର ସ୍ବାଇଁ(୭୬) କରୋନା ଚିହ୍ନଟ ହେବାପରେ ଗତ ରବିବାର ତାଙ୍କୁ ସ୍ଥାନୀୟ ନିମାପଡ଼ା କଲେଜରେ ଥିବା କୋଭିଡ୍ କେୟାର ସେଣ୍ଟରରେ ଭର୍ତ୍ତି କରାଯାଇଥିଲା। ସେଠାରେ ରହିବାର ଦିନକ ପରେ ମହେଶ୍ବରଙ୍କ ସ୍ବାସ୍ଥ୍ୟାବସ୍ଥା ଖରାପ ହେବାରେ ଲାଗିଥିଲା। ଏଥିପାଇଁ ପରିବାର ଲୋକେ ମହେଶ୍ବରଙ୍କୁ ପୁରୀ ଅବା ଭୁବନେଶ୍ବର ପଠାଇ ଦେବାକୁ ନିବେଦନ କରିଥିଲେ। କିନ୍ତୁ ଡାକ୍ତରଖାନା ଦାୟିତ୍ବରେ ଥିବା ଡାକ୍ତର ତାଙ୍କୁ ଅନ୍ୟତ୍ର ପଠାଇବାର ବ୍ୟବସ୍ଥା କରିନଥିଲେ। ଶଯ୍ୟା ଖାଲି ନାହିଁ କହି ସେହିଠାରେ ହିଁ ତାଙ୍କର ଚିକିତ୍ସା ଜାରି ରଖିଥିଲେ। ଗତକାଲି ଅପରାହ୍ଣ ୪ଟାରେ ମହେଶ୍ବରଙ୍କ ଅବସ୍ଥା ଗୁରୁତର ହୋଇପଡ଼ିଥିଲା। ଅକ୍ସିଜେନ୍ ଦିଆଯାଇଥିଲେ ବି ସେ ନିଃଶ୍ବାସପ୍ରଶ୍ବାସ ନେଇ ପାରିନଥିଲେ। ରାତି ପ୍ରାୟ ୭ଟାରେ ଯେତେବେଳେ ମହେଶ୍ବରଙ୍କୁ ଆମ୍ବୁଲାନ୍ସରେ ପୁରୀ ନେବାର ବ୍ୟବସ୍ଥା କରାଯାଉଥିଲା, ସେହି ସମୟରେ ତାଙ୍କର ପ୍ରାଣ ଚାଲି ଯାଇଥିଲା। ସେତେବେଳେ ମହେଶ୍ବର କୋଭିଡ୍ କେୟାର ସେଣ୍ଟର ବାହାରକୁ ଚାଲି ଆସିଥିଲେ।
କୋଭିଡ୍ କେୟାର ସେଣ୍ଟର ବାହାରେ ମହେଶ୍ବରଙ୍କ ମୃତ୍ୟୁ ପରେ ସେଠାରେ ଥିବା ରାସ୍ତା ଉପରେ ତାଙ୍କୁ ଗଡ଼ାଇ ଦିଆଯାଇଥିଲା। ମହେଶ୍ବରଙ୍କ ସ୍ତ୍ରୀ କାନ୍ଦି ତଳେ ଲୋଟି ପଡ଼ୁଥିଲେ ବି କେହି ପାଖ ମାଡ଼ିନଥିଲେ। ଦୁଇ ଘଣ୍ଟାରୁ ଅଧିକ ସମୟ ସେହିଭଳି ମୃତଦେହ ପଡ଼ିରହିବା ପରେ ଉତ୍ତେଜନା ପ୍ରକାଶ ପାଇଥିଲା। କିଛି ବ୍ୟକ୍ତି ଅକ୍ସିଜେନ୍ ସିଲିଣ୍ଡରକୁ ବି ବାହାରେ ଫିଙ୍ଗାଫୋପଡ଼ା କରିଥିଲେ। ଚିକିତ୍ସା ଅବହେଳାକୁ ଦାୟୀ କରି ଡାକ୍ତରଖାନା କର୍ତ୍ତୃପକ୍ଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ। ଯଦି ପୁରୀ ଅବା ଭୁବନେଶ୍ବରକୁ ମହେଶ୍ବରଙ୍କୁ ପଠାଯାଇଥାନ୍ତା, ସେ ଆଜି ବଞ୍ଚି ଯାଇଥାନ୍ତେ ବୋଲି କହିଥିଲେ। ୪ ଘଣ୍ଟାରୁ ଅଧିକ ସମୟ ଶବ ରାସ୍ତାରେ ସେହିଭଳି ପଡ଼ି ରହିବା ପରେ ତହସିଲଦାର, ପୁଲିସ ପହଞ୍ଚି ବୁଝାସୁଝା କରିବା ସହ ରାତି ପ୍ରାୟ ୧୧ଟାରେ ସରକାରୀ ଗାଇଡ୍ଲାଇନ୍ ଅନୁଯାୟୀ ଶବ ସତ୍କାର ବ୍ୟବସ୍ଥା କରିଥିଲେ। କୋଭିଡ୍ କେୟାର ସେଣ୍ଟର ଦାୟିତ୍ବରେ ଥିବା ଡା. କ୍ଷମାନିଧି ସେଠୀ କହିଛନ୍ତି, ଚିକିତ୍ସା ପାଇଁ ଭର୍ତ୍ତି ହେବା ସମୟରେ ମହେଶ୍ବର ହୃତ୍ଜନିତ ସମସ୍ୟା ସହ ଅନ୍ୟାନ୍ୟ ରୋଗରେ ପୀଡ଼ିତ ଥିଲେ। ଡାକ୍ତରଖାନା ପକ୍ଷରୁ କିଛି ଅବହେଳା କରାଯାଇନି ବୋଲି ସେ କହିଛନ୍ତି।