ଗଞ୍ଜେଇ ଗାଡ଼ିରୁ ବୋମା ଜବତ, ବୋମା ନିଷ୍କ୍ରିୟକାରୀ ଟିମର ଖୋଳତାଡ଼

ସମ୍ବଲପୁର: ସମ୍ବଲପୁର ଜିଲ୍ଲା ଠେଲକୋଲୋଇ ଥାନା ଖିଣ୍ଡା ନିକଟରୁ ଏକ ଗଞ୍ଜେଇ ବୋଝେଇ କାରରୁ ବୋମା ଜବତ ହୋଇଛି। ଠେଲକୋଲୋଇ ଥାନା ପୁଲିସ ସୋମବାର ଭୋର୍ ସମୟରେ ପାଟ୍ରୋଲିଂ କରୁଥିବା ବେଳେ ଏହି ଗାଡ଼ି (ଓଆର୍ ୦୨ ବିଆର୍ ୭୦୭୦)କୁ ଜବତ କରିଥିଲା। ପୁଲିସ ଗାଡ଼ି ଦେଖି ଦୁର୍ବୃତ୍ତମାନେ ଘଟଣାସ୍ଥଳରୁ ଫେରାର୍ ହୋଇଯାଇଥିଲେ। ଗାଡ଼ିର ଚକା ଲିକ୍ ହୋଇଯିବାରୁ ଦୁର୍ବୃତ୍ତମାନେ ନୂଆ ଚକା ଲଗାଇବାକୁ ଚେଷ୍ଟା କରୁଥିବା ବେଳେ ପୁଲିସ ଟିମ୍ ପହଞ୍ଚିଥିଲା।

ଗାଡ଼ିକୁ ଯାଞ୍ଚ କରିବା ପରେ ସେଥିରେ ଗଞ୍ଜେଇ ସହ ୩-୪ଟି ବୋମା ମିଳିଥିବା ଠେଲକୋଲୋଇ ଥାନା ଅଧିକାରୀ ସୂଚନା ଦେଇଛନ୍ତି। ବୋମା ନିଷ୍କ୍ରିୟକାରୀ ଟିମ୍ ଘଟଣାସ୍ଥଳରେ ପହଞ୍ଚି ଖୋଳତାଡ଼ ଆରମ୍ଭ କରିଛି। ସନ୍ଧାନୀ କୁକୁର ମଧ୍ୟ ଘଟଣାସ୍ଥଳରେ ଥିବା ଜଣାଯାଇଛି। ତେବେ କେତେ ପରିମାଣର ଗଞ୍ଜେଇ  ଜବତ କରାଯାଇଛି, ସେନେଇ କୌଣସି ସୂଚନା ମିଳିନାହିଁ। ଏଣେ ଉଭୟ ପାର୍ଶ୍ବରୁ ଗାଡ଼ି ଚଳାଚଳ ବନ୍ଦ ରହିଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।