ସୀମାନ୍ତରେ ଏନ୍‌କାଉଣ୍ଟର, ୫ ନକ୍ସଲ ମୃତ

ମାଲକାନଗିରି: ମାଲକାନଗିରି ସୀମାନ୍ତ ଛତିଶଗଡ଼ର ନାରାୟଣପୁର, ଦନ୍ତେଵାଡ଼ା ଏବଂ କୋଣ୍ଡାଗାଓଁର ସୀମାନ୍ତବର୍ତ୍ତୀ ଅଞ୍ଚଳରେ ସୁରକ୍ଷାକର୍ମୀ ଓ ନକ୍ସଲମାନଙ୍କ ମଧ୍ୟରେ ଗୁଳିବିନିମୟ ହୋଇଛି। ଗୁଳିବିନିମୟରେ ୫ ଜଣ ନକ୍ସଲ ନିହତ ହୋଇଥିବାବେଳେ ୩ ଜଣ ଡିଆର୍‌ଜି ଯବାନ ଆହତ ହୋଇଥିବା ସୂଚନା ମିଳିଛି। ବିଶେଷ ସୂତ୍ରରୁ ଖବର ପାଇ ପୁଲିସ, ଡିଆର୍‌ଜି ଯବାନ ଓ ଆଇଟିବିପି ଯବାନମାନେ ନାରାୟଣପୁର, ଦନ୍ତେଵାଡ଼ା ଓ କୋଣ୍ଡାଗାଓଁ ସୀମାନ୍ତବର୍ତ୍ତୀ ଜଙ୍ଗଲରେ କମ୍ବିଂ ଅପରେସନ କରିଥିଲେ। ଆଜି ଦ୍ବିପ୍ରହରରେ ନକ୍ସଲ ଓ ଯବାନଙ୍କ ମଧ୍ୟରେ ଗୁଳିବିନିମୟ ହୋଇଥିଲା।

ଦୀର୍ଘ ସମୟ ଧରି ଗୁଳିବିନିମୟ ପରେ ନକ୍ସଲ ଛତ୍ରଭଙ୍ଗ ଦେଇଥିଲେ। ଏହାପରେ ଯବାନମାନେ ଘଟଣାସ୍ଥଳରେ ସର୍ଚ୍ଚ ଅପରେସନ କରୁଥିବାବେଳେ ୫ ଜଣ ନକ୍ସଲଙ୍କ ମୃତଦେହ ଉଦ୍ଧାର କରାଯାଇଛି। ସେହିପରି ନକ୍ସଲ ଗୁଳିରେ ୩ ଜଣ ଯବାନ ଆହତ ହୋଇଛନ୍ତି। ତୁରନ୍ତ ଆହତ ଯବାନମାନଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା। ଚିକିତ୍ସା ପରେ ଯବାନମାନେ ବିପଦମୁକ୍ତ ଥିବା କୁହାଯାଇଛି। ଏହି ଘଟଣା ପରେ ଉକ୍ତ ଜଙ୍ଗଲକୁ ଅଧିକ ସଂଖ୍ୟାରେ ଯବାନମାନେ ପହଞ୍ଚି ସର୍ଚ୍ଚ ଅପରେସନ୍‌ କରୁଥିବା ଜଣାପଡ଼ିଛି।