କୁଏତରେ ଥିବା ନିଆଳୀର ପପିନା ଲେଙ୍କାଙ୍କ ପତ୍ତା ମିଳୁନି; ଫେରିବା ବାଟକୁ ଚାହିଁ ବସିଛି ପରିବାର

ନିଆଳୀ: ଏକମାତ୍ର ରୋଜଗାରିଆ ପୁଅର ଫେରିବା ବାଟକୁ ଚାହିଁ ବସିଛି ପରିବାର । ପେଟ ପାଇଁ ଏକ ମାସ ତଳେ ବିଦେଶ ଯାଇଥିବା ପୁଅର ମିଳୁନି ଖୋଜ ଖବର । କୁଏତର ଏନଏସଏଚ କମ୍ପାନୀରେ ଜଣେ ପାଇପ୍ ଫିଟର ଭାବେ କାମ କରୁଥିଲେ କଟକ ଜିଲ୍ଲା ନିଆଳୀ ବ୍ଲକର ପପିନା ଲେଙ୍କା । ଗତ ୧୧ ତାରିଖରୁ ସେ କୁଆଡେ ନିଖୋଜ ହୋଇଯାଇଥିବା ତାଙ୍କର ସାଙ୍ଗମାନେ କହିବା ପରେ ମାଆଙ୍କ ଆଖିରୁ ଲୁହ ଶୁଖୁନି ।

ପୁଅର ଫେରିବା ବାଟକୁ ଚାହିଁ ରହିଛି ପୂରା ପରିବାର । ସେପଟେ ପ୍ରଶ୍ନ ଉଠୁଛି କେଉଁଠି ଅଛନ୍ତି ପପିନା? କାହିଁକି ଓ କେମିତି ହୋଇଗଲେ ନିଖୋଜ? ନା ନିଖୋଜ ପଛରେ ରହିଛି ଅନ୍ୟ କିଛି କାରଣ ? ଏମିତି ଅନେକ ପ୍ରଶ୍ନ ଏବେ ସନ୍ଦେହ ଘେରରେ ରହିଥିବା ବେଳେ ନିଖୋଜ ଥିବା ପୁଅକୁ ଫେରାଇ ଆଣିବା ପାଇଁ ପ୍ରଶାସନକୁ ଗୁହାରି କରିଛନ୍ତି ପପିନାଙ୍କ ପରିବାର ଲୋକେ ।