ସରକାରଙ୍କ ନିଷେଧାଦେଶକୁ ଫୁଃ! ବେଧଡ଼କ ଚାଲିଛି ଇଟାଭାଟି

ପ୍ରଶାସନ ସବୁ ଜାଣି ବି ନିରବଦ୍ରଷ୍ଟା 

ରାଉରକେଲା: ବାୟୁ ପ୍ରଦୂଷଣ ଓ ମୂର୍ତ୍ତିକା ସଂରକ୍ଷଣ ରୋକିବାକୁ ମାଟି ଇଟା ତିଆରିକୁ ସମ୍ପୂର୍ଣ୍ଣ ବ୍ୟାନ କରିଛନ୍ତି ରାଜ୍ୟ ସରକାର। ନିୟମ ଉଲ୍ଲଂଘନକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଜିଲ୍ଲାପାଳ ସ୍ଥାନୀୟ ଅଞ୍ଚଳର ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। କାଗଜ କଲମରେ ଏସବୁ ବନ୍ଦ। ହେଲେ, ବାସ୍ତବ ଚିତ୍ର କିନ୍ତୁ ଓଲଟା। ଯାହା ଜ୍ବଳନ୍ତ ଉଦାହରଣ ହେଉଛି ସୁନ୍ଦରଗଡ ଜିଲ୍ଲା। ପ୍ରଦୂଷଣ ବିଭାଗର ଛାଟ ପରେ ହାତ ଗଣତି କେତୋଟି ମାଟି ଇଟାଭାଟିକୁ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ବନ୍ଦ କରାଯାଇଛି। ହେଲେ ଏବେ ସୁଦ୍ଧା ଶହ ଶହ ମାଟି ଇଟା ଭାଟି ବେଆଇନ ଭାବେ ଚାଲିଛି।

ଇଟାଭାଟି ମାଲିକମାନେ ପ୍ରଦୂଷଣ ବିଭାଗ, ସ୍ଥାନୀୟ ତହସିଲ ଅଫିସର କର୍ମଚାରୀଙ୍କ ସହ ଭିତିରି ସଲାସୁତୁରା କରି ସରକାରଙ୍କ ନିର୍ଦ୍ଦେଶନାମାକୁ ଫୁଃ କରି ଦେଇଛନ୍ତି। ସେପଟେ ପ୍ରଦୂଷଣ ବିଭାଗର ଏସବୁ ମାଟି ଇଟାଭାଟିକୁ ଚିହ୍ନଟ କରି କାର୍ଯ୍ୟାନୁଷ୍ଠାନ ପାଇଁ ଜିଲ୍ଲାପାଳଙ୍କୁ ରିପୋର୍ଟ ଦେଇ ଚୁପ୍‌ ବସିଛି। ଫଳରେ ବର୍ଷ ବର୍ଷ ଧରି ଏସବୁ ମାଟି ଇଟାଭାଟି ବେଧଡକ ଚାଲିଛି। ପାନପୋଷ ଉପଖଣ୍ଡ ଲାଠିକଟା, ନୂଆଗାଁ, ବିଶ୍ରା ସମେତ ସୁନ୍ଦରଗଡ ଜିଲ୍ଲାର ଅନେକ ବ୍ଲକରେ ଏକାଧିକ ମାଟିଇଟା ନିର୍ମାଣ କରାଯାଉଛି।

ଫଳରେ ମୂର୍ତ୍ତିକା କ୍ଷୟ ହେବା ସହ ପ୍ରଦୂଷଣର ମାତ୍ରା ବୃଦ୍ଧି ପାଉଛି। ବିଶ୍ରା, ଲାଠିକଟା, ନୂଆଗାଁ, କୁଆରମୁଣ୍ଡା ଆଦି ଅନେକ ବ୍ଲକରେ ୩୦ରୁ ଅଧିକ ମାଟି ଇଟାଭାଟି ଚାଲିଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ଇଟାଭାଟି ମାଳିକମାନେ ମୂର୍ତ୍ତିକା କ୍ଷୟ ମୁଖ୍ୟ ନାୟକ ପାଲଟିଛନ୍ତି। ମାଟି ଇଟା ବିକ୍ରି କରି ସାଧାରଣ ଲୋକଙ୍କୁ ଶୋଷଣ କରିଚାଲିଛନ୍ତି। ବିଶ୍ରା ବ୍ଲକର ପୁରୁଣା ବିଶ୍ରା, ଗୁଡଗୁଡଜୋର, ଲାଠିକଟାର ସୁଇଡିହି ସମେତ ଅନ୍ୟାନ୍ୟ ଜାଗାରେ ବେଆଇନ ଇଟାଭାଟିଗୁଡ଼ିକୁ ଚାଲୁଥିଲେ ହେଁ ସ୍ଥାନୀୟ ପ୍ରଶାସନ ସମ୍ପୂର୍ଣ୍ଣ ନୀରବଦ୍ରଷ୍ଟା ସାଜିଛନ୍ତି। ମାଲିକମାନେ ଏସବୁ ମାଟି ଇଟାକୁ ଟ୍ରକ, ଟାକ୍ଟର, ଡମ୍ପରଯୋଗେ ବିଭି୍ନ୍ନ ସ୍ଥାନକୁ ପଠାଉଛନ୍ତି। ସ୍ଥାନୀୟ ତହସିଲର ଅଧିକାରୀମାନେ ଏଗୁଡ଼ିକ ଜବତ କରିବା ସହ ସ୍ଥାନୀୟ ପୁଲିସ ସହ ମିଶି ବେଆଇନ କାର୍ଯ୍ୟକୁ ପ୍ରୋତ୍ସାହନ ଦେଉଛନ୍ତି।

ବର୍ତ୍ତମାନ ଖଣ୍ଡେ ଇଟାକୁ ୭ରୁ ୮ ଟଙ୍କା ହିସାବରେ ବିକ୍ରି କରାଯାଉଛି। ଏପରି ଭାବେ ଗୋଟିଏ ଟ୍ରାକ୍ଟର ଇଟାକୁ ୧୦ ହଜାର, ଟ୍ରକ (୨୫୦୦) ଇଟାକୁ ୨୦ ହଜାର ଟଙ୍କା ପର୍ଯ୍ୟନ୍ତ ବିକ୍ରି କରୁଛନ୍ତି। ପୁରୁଣା ବିଶ୍ରା ଓ ଗୁଡ‌ଗୁଡଜୋର ଅଞ୍ଚଳରେ ଦୀର୍ଘ ବର୍ଷରୁ ଇଟାଭାଟି ମାଲିକମାନେ ସକ୍ରିୟ ହୋଇ ଲକ୍ଷ ଲକ୍ଷ ଟଙ୍କା ରୋଜଗାର କରୁଛନ୍ତି। ନୂଆଗାଁ ବ୍ଲକର କନ୍ଦରକେଲା ଗ୍ରାମର ମଧ୍ୟ ଇଟାଭାଟି ଦୀର୍ଘ ବର୍ଷରୁ ବେଆଇନ ଭାବେ ଚାଲୁଛି। ପ୍ରଦୂଷଣକୁ ନେଇ ସ୍ଥାନୀୟ ଲୋକ ଅନେକ ବାର ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଫଳ ଶୂନ। କେବଳ ଏତିକି ନୁହେଁ ନୂଆଗାଁ ବ୍ଲକ ହାତୀବାରି ଥାନାରୁ ମାତ୍ର ୫ କି.ମି. ଦୂର ଝାଡ଼ଖଣ୍ଡ ଓଡଗାଁରେ ଅନେକ ମାଟିଇଟା ତିଆରି ହେଉଛି। ଏହିସବୁ ଇଟାଗୁଡ଼ିକ ନୂଆଗାଁ ବ୍ଲକ ସମେତ ସୁନ୍ଦରଗଡ ବିଭିନ୍ନ ଜାଗାରେ ପଠାଯାଉଛି। ଏସବୁ ବେଆଇନ କାର୍ଯ୍ୟର ତଦାରଖ କରିବାକୁ ବ୍ଲକରେ ତହସିଲ ଅଫିସ ରହିଛି। ସ୍ଥାନୀୟ ଅଞ୍ଚଳରେ ଏସବୁ ‌ବେଆଇନ କାର୍ଯ୍ୟ ଉପରେ ଅଙ୍କୁଶ ଲଗାଇବା ପରିବର୍ତ୍ତେ କାଁ ଭାଁ ଯାଞ୍ଚ କରି ଛାଡି ଦେଉଛନ୍ତି। ଜିଲ୍ଲାର ଗୋଟିଏ କି ଦୁଇଟି ବ୍ଲକ ନୁହେଁ ପ୍ରାୟ ଅଧିକାଂଶ ବ୍ଲକ ଅଧିନରେ ଥିବା ତହସିଲ ଅଫିସର କର୍ମଚାରୀମାନେ ସରକାରଙ୍କ ନିର୍ଦ୍ଦେଶନାମାକୁ ପାଳନ କରୁ ନାହାନ୍ତି। ଯାହାର ଫଳ ଭୋଗୁଛନ୍ତି ସ୍ଥାନୀୟ ଅଞ୍ଚଳବାସୀ।

ଉଲ୍ଲେଖଯୋଗ୍ୟ, ଗତ ପ୍ରାୟ ୩/୪ ବର୍ଷ ତଳେ ସୁନ୍ଦରଗଡ ଜିଲ୍ଲାରେ ମାଟି ଇଟା ଭାଟିଗୁଡ଼ିକୁ ବନ୍ଦ କରିବାକୁ ଉଭୟ ପ୍ରଦୂଷଣ ବିଭାଗ ଓ ସ୍ଥାନୀୟ ପ୍ରଶାସନ ଅଣ୍ଟା ଭିଡିଥିଲା। ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ପ୍ରଦୂଷଣ ବିଭାଗର ଜିଲ୍ଲାର ପ୍ରାୟ ୬୦ରୁ ଅଧିକ ମାଟି ଇଟାଭାଟିଗୁଡ଼ିକ ଚିହ୍ନଟ କରିଥିଲେ। ବେଆଇନ ଭାବେ ଚାଲିଥିବା ଏସବୁ ଇଟାଭାଟିକୁ ସିଲ୍‌ କରିବାକୁ ଜିଲ୍ଲାପାଳକୁ ବିସ୍ତୃତ ରିପୋର୍ଟ ପଠାଇଥିଲେ। କାର୍ଯ୍ୟାନୁଷ୍ଠାନ ଭୟରେ କିଛି ଇଟାଭାଟି ମାଲିକ କୋର୍ଟରେ ଆଶ୍ରୟ ନେଇଥିଲେ। ଆଉ କିଛି ଇଟାଭାଟିକୁ ପ୍ରଦୂଷଣ ବିଭାଗ ଅଧିକାରୀଙ୍କ ଉପସ୍ଥିତିରେ ସ୍ଥାନୀୟ ତହସିଲଦାର ସିଲ୍‌ କରିଥିଲେ। ଚଢ଼ଉ ଭୟରେ କିଛି ମାସ ଏସବୁ ଇଟାଭାଟିଗୁଡ଼ିକୁ ବନ୍ଦ ରହିଥିଲା। ଏବେ ସ୍ଥିତି ଯଥା ପୂର୍ବଂ ତଥା ପରଂ। ମାଲିକମାନେ ସ୍ଥାନୀୟ ତହସିଲ ଅଫିସ ଓ ପ୍ରଦୂଷଣ ବିଭାଗର କର୍ମଚାରୀଙ୍କୁ ମୋଟା ଅଙ୍କର ହାତଗୁଞ୍ଜା ଦେଇ ଭାଟିଗୁଡ଼ିକୁ ଚଲାଇଛନ୍ତି। ତେବେ ସ୍ଥାନୀୟ ଅଞ୍ଚଳବାସୀଙ୍କ ବୃହତ ସ୍ବାର୍ଥ ଦୃଷ୍ଟିରୁ ବେଆଇନ ଭାବେ ଚାଲିଥିବା ଏସବୁ ମାଟି ଇଟାଭାଟିଗୁଡିକୁ ବନ୍ଦ କରିବା। ଯେଉଁ ସରକାରୀ କର୍ମଚାରୀଙ୍କ ସମ୍ପୃକ୍ତି ରହିଛି ସେମାନଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନେବାକୁ ଦାବି ହେଉଛି।

ସମ୍ବନ୍ଧିତ ଖବର