ପାଟଣାଗଡ଼: ବଲାଙ୍ଗୀରର ପାଟଣାଗଡ଼ଠାରେ ସୁକତେଲ ନଦୀ ଉପରେ ନିର୍ମାଣ ହେଉଥିବା ଏକ ପୋଲ ଭୁଶୁଡି ପଡିଛି | ବ୍ରିଜର ଭଗ୍ନାଂଶ ତଳେ ଚାପି ହୋଇ ୨ ଜଣ ଶ୍ରମିକଙ୍କର ମୃତ୍ୟୁ ଘଟିଛି | ମୃତ ଦୁଇ ଶ୍ରମିକ ରାଜ୍ୟ ବାହାରର ବୋଲି ଜଣାପଡିଛି | ମିଳିଥିବା ସୂଚନା ମୁତାବକ ପାଟଣାଗଡ଼ ବ୍ଲକ ଅନ୍ତର୍ଗତ ତମିଆ ଓ ମୁଦଲସର ଗ୍ରାମ ମଝିରେ ପ୍ରବାହିତ ହେଉଥିବା ସୁକତେଲ ନଦୀ ଉପରେ ୫ ବର୍ଷ ତଳେ ବ୍ରିଜ ନିର୍ମାଣ ହୋଇଥିଲା |
Sambad is now on WhatsApp
Join and get latest news updates delivered to you via WhatsApp
ତେବେ ବର୍ତ୍ତମାନ ସୁଦ୍ଧା ଠିକା ସଂସ୍ଥାର କୌଣସି କର୍ମଚାରୀ ପହଞ୍ଚିନଥିବାବେଳେ ତହସିଲଦାର ଡ.ପୁଷ୍ପାଞ୍ଜଳି ପଣ୍ଡା, ସବକଲେକ୍ଟର ପଦ୍ମନାଭ ପୁରୋହିତ, ପାଟଣାଗଡ଼ ବିଧାୟକ ସରୋଜ କୁମାର ମେହର, ଏସଡିପିଓ ସୁରେଶ କୁମାର ନାଏକଙ୍କ ସହ ଅଗ୍ନିଶମ ଓ ପୁଲିସ ଟିମ ଉଦ୍ଧାର କାର୍ଯ୍ୟରେ ଲାଗିଛନ୍ତି । ଏଠାରେ ସୂଚନା ଥାଉ କି ୨୦୧୫ ମସିହା ଜୁଲାଇ ୩ ତାରିଖରେ ଏହି ବ୍ରିଜକୁ ତତ୍କାଳୀନ ବିଧାୟକ କନକ ବର୍ଦ୍ଧନ ସିଂହଦେଓ ଉଦଘାଟନ କରିଥିଲେ |
୬ କୋଟି ୯୯ ଲକ୍ଷ ଟଙ୍କା ବ୍ୟୟରେ ଏହି ସେତୁ ନିର୍ମାଣ ହୋଇଥିବାବେଳେ ନିର୍ଦ୍ଧାରିତ ସମୟର ୬ ମାସ ପୂର୍ବରୁ କାମ ସାରିଥିବାରୁ ରାଜ୍ୟ ସରକାରଙ୍କ ପକ୍ଷରୁ ପ୍ରାୟ ୪୦ ଲକ୍ଷ ଟଙ୍କାର ପୁରସ୍କାର ଠିକାସଂସ୍ଥାକୁ ମିଳିଥିଲା । ତେବେ ନିମ୍ନମାନର କାମ ଯୋଗୁଁ ୨ରୁ ତିନି ମାସ ମଧ୍ୟରେ ଏହି ବ୍ରିଜ ଦବିବାକୁ ଲାଗିଥିଲା | ଯାହାକୁ ନେଇ ରାସ୍ତା ଓ ଗୃହନିର୍ମାଣ ବିଭାଗ ପକ୍ଷରୁ ବ୍ରିଜ ମରାମତି ପାଇଁ ସମ୍ପୃକ୍ତ ଠିକାଦାରଙ୍କୁ କୁହାଯାଇଥିଲା |ଠିକାଦାର ଜଣକ ବ୍ରିଜ ମରାମତି କରାଇବାକୁ ରାଜ୍ୟ ବାହାରୁ ଶ୍ରମିକଙ୍କୁ କାମରେ ନିୟୋଜିତ କରିଥିଲେ | ତେବେ ଆଜି ମରାମତି କାମବେଳେ ହଠାତ ବ୍ରିଜ ଭୁଶୁଡିପଡିଥିଲା |