ପାରିବାରିକ କଳହର କରୁଣ ପରିଣତି, ଦେଢ଼ଶୁରର କଟୁରି ଚୋଟରେ ଭାଇବୋହୂ ଲହୁଲୁହାଣ
ବାଲିପାଟଣା: ବାଲିପାଟଣା ଥାନା ଅଭୟମୁଖୀ ଗ୍ରାମରେ ପାରିବାରିକ କଳହର କରୁଣ ପରିଣତି ଦେଖିବାକୁ ମିଳିଛି | ଦେଢ଼ଶୁର ଗୋଵିନ୍ଦ ସାହୁ କଟୁରିରେ ହାଣି ତାଙ୍କ ସାନଭାଇଙ୍କ ପତ୍ନୀ ମାନସୀ ସାହୁ (୪୦)ଙ୍କୁ ଲହୁଲୁହାଣ କରିଛନ୍ତି| ଆକ୍ରମଣରେ ମହିଳାଙ୍କ ମୁଣ୍ଡ ଏବଂ ହାତରେ ଗୁରୁତର ଆଘାତ ଲାଗିଛି | ମାନସୀଙ୍କୁ ପ୍ରଥମେ ଅଭୟମୁଖୀ ଉପ – ସ୍ୱାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା କରାଯାଇଥିଲା | ଅବସ୍ଥା ସଙ୍କଟାପନ୍ନ ହେବାରୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି |
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଦେଉଳିଧରପୁର ପଞ୍ଚାୟତ ଅଭୟମୁଖୀ ଶାସନ ଗ୍ରାମର ଗୋବିନ୍ଦ ସାହୁ ଓରଫ ବାବୁଲା ଏବଂ ତାଙ୍କ ସାନ ଭାଇ ନନ୍ଦ କିଶୋର ସାହୁ ଓରଫ ଠେକୁଆଙ୍କ ମଧ୍ୟରେ ପୂର୍ବରୁ ଜମିଜମା ବିବାଦ ଲାଗି ରହିଥିଲା | ଏ ନେଇ ଅନେକ ଥର ଥାନାରେ ଅଭିଯୋଗ ହୋଇଥିଲା | ଥାନାରେ ଅଭିଯୋଗ ହେବା ପରେ ଭଦ୍ରଲୋକଙ୍କ ଉପସ୍ଥିତିରେ ବିବାଦର ସମାଧାନ ମଧ୍ୟ ହୋଇଥିଲା | କିନ୍ତୁ ବାବୁଲା ଭଦ୍ରଲୋକଙ୍କ ନିଷ୍ପତ୍ତିକୁ ମାନି ନ ଥିଲେ| ସାନ ଭାଇର ସମ୍ପତ୍ତିକୁ ଜୋର ଜବରଦସ୍ତ ଅକ୍ତିଆର ପାଇଁ ମସୁଧା କରୁଥିଲେ | ଏହି କାରଣରୁ ୨ ଭାଇଙ୍କ ମଧ୍ୟରେ ଅନେକ ସମୟରେ କଳହ ଉପୁଜୁଥିଲା |
ସାନଭାଇର ସମ୍ପତ୍ତିରେ ବାବୁଲା ଘର ନିର୍ମାଣ ଆରମ୍ଭ କରିବାରୁ ନନ୍ଦ କିଶୋର ପୁନର୍ବାର ଥାନାକୁ ଜଣାଇଥିଲେ | ଆଜି ବାବୁଲା ଭୁବନେଶ୍ୱରରୁ ଘରକୁ ଆସି ସାନ ଭାଇର ବଜାରରେ ଥିବା ଦୋକାନ ନିକଟକୁ ଯାଇ ଥାନାରେ ପୁନର୍ବାର କ’ଣ ପାଇଁ ଜଣାଇଲୁ ବୋଲି ପଚାରିଥିଲେ| ଏହାପରେ ଭଦ୍ରଲୋକଙ୍କ ନିଷ୍ପତ୍ତିକୁ ମାନିନେବାକୁ ସାନ ଭାଇ ନନ୍ଦ କିଶୋର କହିଥିଲେ | ହେଲେ ଦିନ ପ୍ରାୟ ୧୧ଟା ସମୟରେ ବାବୁଲା ଘରକୁ ଯାଇ ନନ୍ଦ କିଶୋରଙ୍କ ଅନୁପସ୍ଥିତରେ ତାଙ୍କ ପତ୍ନୀ ମାନସୀଙ୍କ ସହିତ ଝଗଡ଼ା କରିଥିଲେ |
ଝଗଡ଼ା ବଢ଼ିବାରୁ ହଠାତ୍ ଏକ କଟୁରି ଆଣି ଭାଇବୋହୂଙ୍କୁ ଆକ୍ରମଣ କରିଥିଲେ ବାବୁଲା | କଟୁରି ଚୋଟ ବାଜି ମହିଳାଙ୍କ ହାତ ଏବଂ ମୁଣ୍ଡରେ ୨୦ରୁ ଅଧିକ ଷ୍ଟିଚ୍ ପଡ଼ିଛି ଏବଂ ତାଙ୍କ ଅବସ୍ଥା ସଙ୍କଟାପନ୍ନ ଅଛି| ଖବର ପାଇ ବନମାଳିପୁର ଫାଣ୍ଡି ପୁଲିସ ଘଟଣା ସ୍ଥଳକୁ ଯାଇ ରକ୍ତଭିଜା କଟୁରି ଜବତ କରିଛି | ମାନସୀ ମେଡିକାଲରେ ଚିକିତ୍ସାଧୀନ ଥିବା କାରଣରୁ ବର୍ତ୍ତମାନ ସୁଦ୍ଧା ଥାନାରେ କୌଣସି ଅଭିଯୋଗ ହୋଇନାହିଁ | ପୁଲିସ ଘଟଣା ତଦନ୍ତ ଜାରି ରଖିଛ |